Kolose 3:4 - Uisneno In Kabin ma Prenat: Rais Manba'an Fe'u nok Reta' Ahun-hunut

⁴ Kristus anmoin et hi neekm ein, ma In anmoeꞌ ki mmoin batuur amsaꞌ. Oras In nkoen On anfain neem, hi mpoi mibu-bua mok Ne ambi pinaꞌ ma krahaꞌ.

Kolose 3:4 ပူးပေါင်းရင်းမြစ်များ

Naiꞌ Mateos 13:43

Mes tuaf-tuaf reꞌ anmoin nok amnonot ma amneot natuin Uisneno In romin, sin of natuan nok sin Aam Usif anbin sonaf neno tunan. Anbi bare naan, sin maask ein anpinan on reꞌ manas. Onaim tuaf-tuaf reꞌ he nahiin Kau, amtakan hi ruikm ein, ma mneen mirek-rekoꞌ!”

Naiꞌ Lukas 17:30

Onaim hi mpaant om! Kais-kaisaꞌ Mansian Batuur-Batuur naan anfain neem, ma mansian ein suma nmonin on reꞌ biasa. Mes nok askeken ate, In nboor neem.

Naiꞌ Yohanis 11:25

Onaim Naiꞌ Yesus naꞌuab am nak, “Au es reꞌ umonib ufaniꞌ amaets ein. Ma Au es reꞌ aꞌfee ꞌmonit reꞌ amneot ma amnonot. Onaim tuaf reꞌ anpirsai Kau of napeni ꞌmonit naan, maski in nmaet.

Naiꞌ Yohanis 14:3

Oras Au ꞌnao ꞌrair, ma ubarab aꞌrair bare ꞌeu ki, Au of aꞌfain ꞌuum he hi mituin Kau. Nok ranan naan, Au ꞌbi mee te, hi mbi naan amsaꞌ.

Naiꞌ Yohanis 14:6

Onaim Naiꞌ Yesus natoon am nak, “Ka nmuiꞌ fa ranan es antein reꞌ neik mansian ii ntean Au Amaꞌ abit sonaf neno tunan. Suma nanete npeꞌo haa Kau. Fin Au reꞌ ia, ranan teu Uisneno. Au reꞌ ia, es reꞌ aꞌnaaꞌ saaꞌ reꞌ batuur. Ma Au reꞌ ia, es reꞌ aꞌnonaꞌ ma ꞌfee ꞌmonit reꞌ amneot ma amnonot.

Naiꞌ Yohanis 17:24

Aam Honiꞌ. Au ꞌroim he mansian ii arsin reꞌ Ho mnonaꞌ ma mfee Kau sin reꞌ naan, nabu-buan nok Kau. Fin Au ꞌroim he sin bisa nkius niit nak, Ho maikas muꞌrat-ratan Kau. Fin Ho mneek main Kau, oras Hit ka tmoeꞌ pah-pinan ia fa feꞌ.

Naiꞌ Yohanis 20:31

Mes rasi reꞌ au ꞌtui ꞌrari ꞌbi surat reꞌ ia, au ꞌtui, maut he hi mpirsai mmak, Naiꞌ Yesus naan, es reꞌ Kristus reꞌ Uisneno nbaꞌan nain he nreek Ee neem. Naiꞌ Yesus naan, es reꞌ Uisneno In Anah amsaꞌ. Ma oras hi mpirsai Je, hi mipeni ꞌmonit reꞌ amneot ma amnonot reꞌ ka natfeek niit fa, natuin hi mjair Iin na.

Haef ein sin Retaꞌ 3:15

Onaim hi es reꞌ amroor miis Naiꞌ Yesus. Te kaah, In es reꞌ Uuf neu ꞌMonit. Amneon ii, In nmaten nrair jen, mes Uisneno namonib nafainꞌ Ee naꞌko In aꞌmaten. In reꞌ ia, es reꞌ hai miit Ee nok hai maatm ein kiim.

Roma 8:18

Mes natuin au teenb ii te, susat ma nanaꞌrenat reꞌ hit tapein je oras ia maꞌkaaf aah, karu hit tataib ee nok rais maꞌtain ein reꞌ Uisneno of naruruꞌ ma nakriraꞌ sin neun kit.

Roma 8:19

Te kaah, areꞌ saaꞌ-saaꞌ reꞌ Uisneno nmoeꞌ sin nbin neon goe tnanan ma nbin pah-pinan, anpaon ma namnaun, ma nromin he nitan In naruruꞌ ma nakriraꞌ nak, In aanh ein reꞌ batuur ii, esan reꞌ sekau. Fin In nroim he naruruꞌ ma nakriraꞌ In aanh ein reꞌ batuur neu sin nok neek marine.

1 Korintus 1:7

Onaim hi mtoupu mrair areꞌ rais arekot sin reꞌ Uisneno In Asmanan anbatin nfee neu Iin na. Ka nabait fa saaꞌ es aꞌkreꞌo msaꞌ. Rarit hi mpa-pao neno naan, reꞌ of Uisneno nfei je he naruruꞌ ma nakriraꞌ hit Usiꞌ Yesus Kristus, neu mansian ii ok-okeꞌ.

1 Korintus 15:43

Oras hit tsuub amates, hit tnaben tak, aof amates naan anꞌoemeet. Mes karu atoniꞌ naan anmoni nfain, in ro npiin ma nakraah! Fin in nakninuꞌ nrair. Amates ka bisa nmoeꞌ fa saaꞌ-saaꞌ oras ansuub ee. Mes oras in nmoni nfain, in maꞌtain besi ntein!

2 Korintus 4:17

Fin tatuin hit tenab, oras ia hit tapein susat humaꞌ-humaꞌ. Mes hit ro he tamnau tak, Uisneno of nait naꞌratan kit. Es naan ate, hit taan saaꞌ reꞌ njair oras ia, ka nmuiꞌ fa upan saaꞌ-saaꞌ?

Filipi 3:21

Kristus of naꞌbaniꞌ hit ao-akratiꞌ reꞌ bisa anmaet reꞌ ia, he anjair aof feꞌu reꞌ ka nmaet niit fa, nahuum on reꞌ In aon aꞌpinaꞌ ma akrahaꞌ naan. In naꞌbaniꞌ hit aok ein, anpaek In kuasa koꞌu. Ma In npaek kuasa naan amsaꞌ, he nmoeꞌ areꞌ saaꞌ-saaꞌ reꞌ anbi mee-mee jah, naꞌruriꞌ ma nbaisenun natuin In aprenat.

2 Naiꞌ Timotius 1:1

Timotius, atoin reko! Surat reꞌ ia naꞌko au, naiꞌ Paulus kau, reꞌ Uisneno neikn On anruur kau he ꞌjair Yesus Kristus In haef. Sin nreek haefan kau he ꞌnao utoon rasi nmatoom nok ꞌmonit reꞌ batuur, reꞌ Uisneno nbaꞌan he nfee je neu areꞌ apirsait ein neun Yesus Kristus. Timotius! Ho on reꞌ au aanh aa kuuk. Onaim au ꞌonen he hit Amaꞌ Uisneno, ma hit Usiꞌ, Yesus Kristus, anneek ko, nakriraꞌ Sin neek reok goe neu ko, ma nfee ko ꞌmonit ambi mamut, rameꞌ es nok es, ma taininaꞌ.

2 Naiꞌ Timotius 4:8

Oras ia, au ꞌpao-pao rais jes feꞌ. Es reꞌ, kraa-mnatuꞌ reꞌ Usiꞌ napaar ee neu sekau-sekau reꞌ in aꞌmoin ee namneo ma namnoon. Hit Usiꞌ naan, afeek rasi amneot. In ka npiir fa humaf. Antea in oors ate, In of annonaꞌ kau kraa mnatuꞌ naan. Ka neu au ꞌmees fa, mes sekau-sekau reꞌ anneek Ee, ma anpa-pao Goe he nkoen On anfain neem, sin napein akraa mnatuꞌ on naan amsaꞌ.

Naiꞌ Titus 2:13

Oras ia, hit tpa-pao, he oras Yesus Kristus ankoen On anfain neem, In neem anbi pinaꞌ ma krahaꞌ! Naan anjair tetus neu kit ok-okeꞌ. In reꞌ naan, hit Usiꞌ reꞌ maꞌtaniꞌ nneis, reꞌ nsoi nafetin naan kit.

Atoin Ibranis 9:28

On naan amsaꞌ Kristus. In nmaet nok ranan In nnonaꞌ ma nfee In tuan he njair fuaꞌ-turuꞌ no meesꞌ aah. Ma In of ankoen On anfain neem amsaꞌ. Mes In ka nꞌurus fa sanat antein, natuin In nasoup mepu nana goen. Mes reꞌ In of anꞌurus, es reꞌ In he nsoi nafetin neu areꞌ tuaf reꞌ nafnekan ma nharap neu Ne.

1 Naiꞌ Petrus 1:13

Es naan ate, hi ro he mibarab piut he mihiin mirek-rekoꞌ rasin reꞌ ia ok-okeꞌ. Ampanat mirek-rekoꞌ he hi mitenab namneo ma namnoon. Mibarab piut he hi mpirsai piut meu Yesus Kristus tar antea In nkoen On anfain neem. Natuin anbi oras naan, Uisneno he naruruꞌ ma nakriraꞌ In nekan arekot neu ki.

1 Naiꞌ Petrus 5:4

Naiꞌ Yesus reꞌ naan, In on reꞌ Aꞌnaak Atukus. Oras In ankoen On anfain neem, Uisneno nroim he nfee ki hi upam, natuin hi mꞌurus Iin na nok rek-reko. Upaf naan, ka bisa nreuꞌ fa, fin in ntahan nabar-baar.

1 Naiꞌ Yohanis 2:28

On nai, riꞌaan ein! Hi ro he mmoni mmafuut piut mok Kristus. Maut he oras In nkoen On nfain neem, hi kais mimtau ma kais mimaeb om amhake mbi In human ma In matan.

1 Naiꞌ Yohanis 3:2

Riꞌaan amaneekt ein arki! Hit tjari trair Uisneno In aanh ein, mes ka mahiniꞌ fa feꞌ hit of atjair on mee ttein. Reꞌ hit tahiin ji on nai: oras Kristus ankoen On anfain neem, hit tjair on reꞌ In imsaꞌ, natuin hit tkius ma tiit Ee maat-maat.

1 Naiꞌ Yohanis 5:12

Onaim tuaf reꞌ nmafuut nok Uisneno In Anah, napeni ꞌmonit abar-barat nok Ne. Mes tuaf reꞌ ka nmafuut fa nok Uisneno In Anah, ka napein fa ꞌmonit on naan.

Naiꞌ Judas 1:24

Oras ia, hit tait pures-boꞌis ma mnaikas teu Uisneno! Natuin In kuun es reꞌ bisa npafaꞌ ma npanat ki, he hi kais mispae, mistuun ma mtaikoib. Ma In kuun es reꞌ neik ki, he hi mhake mbi Uisneno In human ma In matan, fin In kuun es reꞌ nakninuꞌ ki, es naꞌ hi ka mꞌoemeet fa goen. Hi mkoen om iim meik huum kumani ma huum akmoe, fin In mapinaꞌ-makrahaꞌ!

Rasi Mnitas neu naiꞌ Yohanis 2:7

Amneen mirek-rekoꞌ saaꞌ reꞌ Uisneno In Asmaan ee natoon neu In jemaaꞌt ein. Sekau naran ma natuin Kau tar antea in nmaet, Au of aꞌfee ne mainuan, he naah hau fuaꞌ reꞌ anbi Uisneno In poꞌon. Fin sekau naah hau fuaꞌ naan ate, in napeni ꞌmonit batuur reꞌ ka natfeek fa.’ ”

Rasi Mnitas neu naiꞌ Yohanis 22:1

Rarit ameput naꞌko sonaf neno tunan tuaf es nakriraꞌ kau noe jes, reꞌ oe nasai nbi bare naan neik rasi ꞌhonis. Oe naan kniun ii on reꞌ ninu. In nasai npoi naꞌko Uisneno nok ꞌBib-kaes Anaꞌ Sin aꞌtoko prenat.

Rasi Mnitas neu naiꞌ Yohanis 22:14

Tuaf-tuaf reꞌ ansafen nrair sin paken, anꞌua paꞌen ma nꞌua rekon. Fin sin of napenin hak he ntaman npeꞌon eon koꞌu neun kota naan in nanan. Tuaf-tuaf reꞌ anmonin nrarin nok akninuꞌ, anꞌua paꞌen ma nꞌua rekon. Fin sin of napenin mainuan he nbukae hau fua roet reꞌ neiki ꞌhonis abar-barat.