Kolose 3:12 - Uisneno In Kabin ma Prenat: Rais Manba'an Fe'u nok Reta' Ahun-hunut

¹² Uisneno anpiir ma anbetis naan ki, natuin In nneek ki. In sairt ii he hi mjair In tuaf akninuꞌ reꞌ aꞌtetaꞌ naꞌko mansian bian sin. Es naan ate, hi ro he mjair tuaf reꞌ aturun, reꞌ neek reko, neek aꞌparat, neek maꞌnuraꞌ, ma neek sabaar.

Kolose 3:12 ပူးပေါင်းရင်းမြစ်များ

Naiꞌ Mateos 24:22

Mes hi mꞌua reok, fin Uisneno naꞌparan neno naan. Karu kaah fa te, ka tiit tain fa tuaf reꞌ ntahan he nmoin nabaar. Mes, natuin Uisneno nneek In tuaf ein reꞌ In npiir nain sin, es naan ate In naꞌparan neon suust ein naan.

Naiꞌ Mateos 24:24

Fin of anmuiꞌ tuaf anpoi ma npaas ok nak, ‘Au reꞌ ia, Kristus!’ Ma bian antein nak, ‘Au reꞌ ia, Uisneno In mafefa kninuꞌ.’ Sin of anmoꞌen rais sanmakat humaꞌ-humaꞌ anpaken niutn ein sin kuasa he nputa-kriu atoniꞌ. Sin nsoob ein he napoi Uisneno Iin na msaꞌ.

Naiꞌ Mateos 24:31

Rarit Au ꞌpaek toꞌis reꞌ in haan ee maꞌtaniꞌ he uprenat Uisneno In ameupt ein etan sonaf neno tunan annaon naꞌbuaꞌ tuaf reꞌ Au ꞌpiir ꞌaan sin naꞌkon pah-pinan ia pani-mpain, naꞌko pasaꞌ maans ee ꞌsaen tar antea pasaꞌ neon-teas, naꞌko pasaꞌ ponain tar antea pasaꞌ haaꞌ-nua.”

Naiꞌ Markus 13:20

Karu Uisneno ka naꞌparan fa neon suust ein naan, ka tiit fa tuaf he nmoni nkoon. Mes natuin Uisneno nneek niis In aan piir ein, es naan ate In naꞌparan neon suust ein naan.

Naiꞌ Markus 13:22

Ma of anmuiꞌ atoniꞌ reꞌ anpoi ma npaas in aꞌbasan am nak, ‘Au reꞌ ia, Kristus!’ Bian anteniꞌ nak, ‘Au reꞌ ia, Uisneno In mafefa kninuꞌ.’ Sin of anmoꞌen rais sanmakat humaꞌ-humaꞌ neik kuasat naꞌkon niut reꞌuf he nputa-kriu. Sin namin ranan humaꞌ-humaꞌ he karu reko te, sin nasekeb Uisneno Iin na.

Naiꞌ Markus 13:27

Rarit Au of aꞌreun Uisneno In ameupt ein naꞌkon sonaf neno tunan, he nnaon nabuabaꞌ areꞌ tuaf ein reꞌ Au ꞌpiri ꞌrair sin, naꞌkon pah-piin ii tuuk am tuuk, naꞌkon pasaꞌ neon-saet tar antea pasaꞌ neon-teas, naꞌkon pasaꞌ ponain tar antea pasaꞌ haaꞌ-nua.”

Naiꞌ Lukas 1:78

Natuin Uisneno neekn ee maꞌnuraꞌ ma nꞌoeteen neu kit, etun In nfee kit oras ma eti mainuan feꞌu, nahuum on reꞌ maan asaet-apisar reꞌ neik meꞌu ma piin feꞌu. Hit reꞌ abitan metan-meisꞌokan in nanan, ma hit reꞌ amtaus rais nitu-ꞌmaten kit, natuin hit ka taraem ok fa feꞌ tok Uisneno, of hit tapein paku ma meꞌu he nnao naat kit teu raan mamut ma rameꞌ.”

Naiꞌ Lukas 18:7

Karu nna-nao ma in nturun bifee banuꞌ naan, Uisneno of anturun Iin na msaꞌ, reꞌ anꞌoen ein fai-manas he ntotin turun-babat naꞌkon Na. Mes Uisneno ka nfeꞌ-feꞌen fa.

Roma 1:7

Etun au ꞌsonuꞌ surat ia ꞌeu ki, hi abit Roma, ma umnaub ki mꞌak, Uisneno anneek ki. In ntoit ki msaꞌ he hi mjair Iin na reꞌ ammoni kninuꞌ. Au ꞌonen he hit Amaꞌ Uisneno, ma hit Usiꞌ Yesus Kristus, nakriraꞌ Sin nekak arekot, ma nfee ki mamut, rameꞌ es nok es, ma taininaꞌ.

Roma 13:14

Mes reko nneis, hi miꞌbaniꞌ hi neekm ein he mjair huma meseꞌ on reꞌ hit Usiꞌ Yesus Kristus, reꞌ Uisneno nreek Ee neem. Ma karu ho mroim he mmoeꞌ rasi reꞌ ka batuur fa, kais amkonan he ho mmoeꞌ mutuin ho romim rafuꞌ-rafuꞌ on reꞌ naan. Maran ma mtahan ho tuam aan, tua!

Roma 9:11

Oras bi Ripka ka nahoniꞌ naan sin fa feꞌ, sin ka nmoeꞌ nitan fa feꞌ rais reko, aiꞌ rais maufinu. Maski on naan amsaꞌ, mes Uisneno natoon nain neu bi Ripka anmatoom nok riꞌaan koen reꞌ npoi nahunu mnak, “Taatf aan of anjair ameput neu in orif.” Uisneno natoon on naan, he naruruꞌ ma nakriraꞌ am nak, karu In npiir naan tuaf es, In nahini nrair nak, In he npaek tuaf naan nahuum on mee. Rarit Uisneno npiir riꞌaan muniꞌ naan he njair Iin ja. In ka nperluu fa he npao he nkius riꞌaan muniꞌ naan he nmoeꞌ on mee, natuin Uisneno nahiin nain.

1 Korintus 13:4

Fin rais manekat naan, namiin, tua. Rais manekat naan, sabaar, tua. Rais manekat naan, ka natiun nahiin fa, tua. Rais manekat naan, ka naikas ma naꞌratan nahiin fa in tuan aa, tua. Rais manekat naan, ka nabeoꞌ fa, tua.

2 Korintus 6:6

Hai mtahan ma maran nok neek akninuꞌ msaꞌ. Hai mihiin rasi mfaun anmatoom nok Uisneno. Hai mtahan ma msabaar. Hai mmoeꞌ rais reko meu tuaf. Hai mkonan Uisneno In Asmanan he nꞌator kai. Hai mneek tuaf batuur-batuur amsaꞌ, ma ka mputa-kriu fa.

Galatia 5:6

Maski atoin aꞌheriꞌ, aiꞌ kaah, naan ka pentiing fa. Mes reꞌ pentiing ii es reꞌ tuaf apirsait neu Kristus, ma anneek tuaf bian sin.

Efesus 1:4

Oras pah-pinan ia ka njair fa feꞌ, Uisneno anneek ma npiir naan kit, he tjair Kristus Iin na. In nroim he hit tmoni kninuꞌ tar antea tuaf ka napein fa mainuan he nakuu kit.

Efesus 4:2

Nok ranan naan, hi ro he mmoin nok neek aꞌparat, ma neek ba-baun es nok es. Anbi rais manekat, hi ro he msabaar ma mihiin batuur-batuur es nok es. Karu naꞌko hi arki anmuiꞌ tuaf naim rasi nok tuaf es ate, kais ammaktoꞌon.

Efesus 4:24

he hi mjair mansian feꞌu, natuin In human ma In masan. Es naan ate, hi ro he miruruꞌ ma mikriraꞌ neek feꞌu, reꞌ kninuꞌ ma mneꞌo.

Efesus 4:32

Reko nneis hi mmanek-neek, ma mmoeꞌ ꞌmoeꞌ reko es nok es. Hi ro he mnikan main sanat naꞌko tuaf-tuaf reꞌ nmoeꞌ sanat neu ki, ma mfee ne saok sanat ma ampon, on reꞌ Uisneno nsaok ma nnoes nain hi saant ein, natuin hi mmafutuꞌ mok Kristus.

Filipi 1:8

Uisneno neikn On nahiin nak, au neek ii namnau ki batuur. Natuin au manekak ꞌeu ki naan, nahuum on reꞌ Yesus Kristus In manekan.

1 Tesalonika 5:15

Mimnau! Kais ambaras ꞌmoeꞌ amreꞌut nok ꞌmoeꞌ amreꞌut. Mibarab hi tuam ein naan he mmoeꞌ rais reko meu areꞌ too mfaun. Kais ammoeꞌ reok goah meu hit aok-bian sin kuuk, mes meu tuaf bian amsaꞌ.

2 Naiꞌ Timotius 1:9

Natuin Uisneno es ansoi nafetin naan kit naꞌko hit saant am penu sin. Ma In es anpiir naan kit he tjair In tuaf ein reꞌ atmoni kninuꞌ. In nakriraꞌ In nekan reok goe neu kit, natuin In nneek kit. Te kaah, hit ka tmoeꞌ tiit fa saaꞌ-saaꞌ es, he hit masoꞌik he ttoup In arekon. Uisneno ka nmoeꞌ pah-pinan ia fa feꞌ, mes In nafeek anrair he nreek Yesus Kristus neem, he nakriraꞌ In nekan arekot, ma nsoi nafetin kit. Rarit Yesus Kristus neem anrair, ma nfei nrair sarit naan, Ma In naseer rasi ꞌmaten in kuasan! Ia njair Rais Reko! Onaim sekau-sekau reꞌ anpirsai neu Yesus Kristus, ka nmate ntein fa goen, mes anmoin piut nok Uisneno.

2 Naiꞌ Timotius 2:10

Onaim au ubarab au tuak ii he usaah kuuk maꞌneꞌat humaꞌ-humaꞌ. Asar Uisneno In tuaf ein reꞌ In npiir naan sin naan, napenin saok sanat ma rasi ꞌhonis. Fin Uisneno of nait naꞌratan sin piut, natuin sin antaam anjarin Yesus Kristus Iin na.

Naiꞌ Titus 1:1

Titus, atoin reko! Surat reꞌ ia, naꞌko au naiꞌ Paulus kau, Uisneno In aan renu-aan rekaꞌ, ma Yesus Kristus In haef. In nreek haefan kau he ꞌnao ꞌhaꞌtain neek pirsait ꞌeu tuaf ein reꞌ In npiir naan sin. In nreek haefan kau msaꞌ he utoon raan amneot he sin nmonin natuin Uisneno In romin. Nok ranan naan, Uisneno In nonot-asar sin, nafnekan he nmonin nok Ne piut-piut. Oras Uisneno ka najarib fa pah-pinan ia fa feꞌe te, In nbaꞌan nain nak, In nonot-asar sin of anmonin piut nok Ne. Ma In ka napoi nahiin fa. Antea in oors aa on naan ate, Uisneno natoon maat-maat am nak, In he nsoi nafetin mansian ii naꞌko sin saant ein, he sin bisa nmoin nabar-baran nok Ne. Rarit In naprenat kau, he ꞌnao utoon Rais Reko naan ꞌeu mansian ii ok-okeꞌ ꞌbi mee-mee. Titus! Ho on reꞌ au aanh aa kuuk, natuin hit nua kit atpirsai teu Kristus. Onaim au ꞌonen ꞌeu Amaꞌ Uisneno, ma Yesus Kristus reꞌ nsoi nafetin kit, he Sin nakriraꞌ Sin nekak arekot neu ko, he ho mmoni mbi mamut, rameꞌ es nok es, ma taininaꞌ.

2 Naiꞌ Petrus 1:10

Aok-bian manekat arki! Oras ia, hi ro mhaek maꞌtaniꞌ mtein. Uisneno npiir naan ki he mjair Iin na, rarit hi iim meu Ne. Oras ia, hi ro he miruruꞌ ma mikriraꞌ mak, hi mtaam amjair In nonot-asar. Karu rasin ia reꞌ au ꞌait sin feꞌe na naꞌbaab ok piut anbi hi ꞌmoinm ein, hi of ka mmouf main fa.

1 Naiꞌ Yohanis 4:19

Hit tmaneek es nok es, natuin Uisneno anneek nahunun kit.

2 Naiꞌ Yohanis 1:13

Uisneno npiir ho tataꞌ msaꞌ. In aanh ein ansoun ein haan tabes ma haan buseet neu sin ainaꞌ sin etan naan. On reꞌ naan, tua. Haan buseet naꞌko au, naiꞌ Yohanis kau, tua.

Rasi Mnitas neu naiꞌ Yohanis 17:14

Uisf ein reꞌ naan, sin of anmakenan nraban ꞌBib-kaes Anaꞌ naan. Mes ꞌBib-kaes Anaꞌ naan nok Iin na, of niis nain sin ok-okeꞌ. Tuaf-tuaf reꞌ natuin ꞌBib-kaes Anaꞌ naan, esan reꞌ tuaf-tuaf reꞌ In npiir ma nbetis, ma noꞌen naan sin, reꞌ sin naran ma natuin Ee. Sin of nisan, natuin ꞌBib-kaes Anaꞌ naan maꞌtain reꞌuf. Suma In kuun, Usif ansae faof usif, ma ꞌNakaf nsae fafo ꞌnakaf.