Kolose 1:11 - Uisneno In Kabin ma Prenat: Rais Manba'an Fe'u nok Reta' Ahun-hunut

^11-13 Hai mꞌonen amtoti msaꞌ he Uisneno nfee In kuasa maꞌtaniꞌ naan, he hi bisa misaah areꞌ kanan rasi nok neek sabaar. Hai mtoit he hi neekm ein nahenun nok rais marine, he hi mtoit makasi piut-piut meu Amaꞌ Uisneno. Fin In nfei ranan he hi bisa mtoup pusaak naꞌko sonaf neno tunan. Pusaak naan, In nfee je neu areꞌ kanan apirsait neu Yesus Kristus. Natuin In nsoi nafetin kit naꞌko kuasa meisꞌokan, rarit nataam kit tjair Yesus Kristus Iin na, he tatua tbi meuꞌ-sineꞌ. In nait naꞌratan Yesus Kristus amsaꞌ, he njair hit Usif. Naiꞌ Yesus naan, Uisneno In Aan nekaꞌ.

Kolose 1:11 ပူးပေါင်းရင်းမြစ်များ

Haef ein sin Retaꞌ 1:8

Onaim karu Uisneno In Asmaan Akniunꞌ ee neem antaam neu ki, of hi mipein ꞌbeꞌif ma maꞌtanif. Rarit hi ro he mnao mitoon meu areꞌ mansian ii ok-okeꞌ anmatoom nok Kau. Mitoon meu abitan kota Yerusalem, abitan propinsi Yudea ma propinsi Samaria, tar antea pah-pinan ia nfuun am nateef.”

Haef ein sin Retaꞌ 5:41

Rarit haef ein naan annao npoi nasaitan bare naan. Sin natenab am nak, maut he sin kaank ein namreꞌun natuin sin nok Naiꞌ Yesus, mes sin nmarinan, natuin Uisneno nahiin nak sin ro pantas he nasaah haꞌmuꞌit on reꞌ naan. Etun sin neek ein anmariin anmaten.

Roma 2:7

Fin tuaf reꞌ anmoeꞌ rais reko piut-piut, In of anfeen sin ꞌmonit amneot reꞌ ka natfeek niit fa. Sin esan reꞌ antoupun rais hormaat, kaan reko, ma nmonin piut-piut nok Ne.

1 Korintus 16:13

Hi ro he mpaant om rek-reko! Hi ro he maran ma mtahan he mpirsai piut meu Uisneno! Kais mimtau! Amhaꞌtain jom!

2 Korintus 4:7

Maski hai reꞌ ia, suma mansian biasa goah, mes Uisneno ntao baer maꞌosaꞌ ia nbi hai neekm ein. Naan on reꞌ tuaf es natunuꞌ baer maꞌosaꞌ nbi ꞌnai konat. Baer maꞌosaꞌ naan es reꞌ Uisneno In meꞌu. Kninuꞌ nrair nak, kuasa reꞌ maꞌtaniꞌ reꞌ nbi kai, ka naꞌuu ma naꞌbaaꞌ fa naꞌko kai, mes naꞌuu ma naꞌbaaꞌ naꞌko Uisneno.

Efesus 3:16

Au ꞌonen he In nfee tetus-athoen neu ki natuin In nekan arekot maꞌtaniꞌ naan. Ma au aꞌtoit he In nsonuꞌ In Asmaan ee msaꞌ, ma anfee kuasa, maut he hi neekm ein naan naꞌbeꞌin.

Efesus 4:2

Nok ranan naan, hi ro he mmoin nok neek aꞌparat, ma neek ba-baun es nok es. Anbi rais manekat, hi ro he msabaar ma mihiin batuur-batuur es nok es. Karu naꞌko hi arki anmuiꞌ tuaf naim rasi nok tuaf es ate, kais ammaktoꞌon.

Efesus 6:10

Au he usoup goen. Onaim amneen mirek-rekoꞌ au uab muniꞌ reꞌ ia. Hi ro he mnaaꞌ miher-heran hi rais pirsait meu Uisneno, natuin In reꞌ naan, hi Usiꞌ, ma In kuasan naan, maꞌtain reꞌuf. Naan es reꞌ nhaꞌtain ma naꞌbeꞌib ki.

Filipi 4:13

Au bisa usaah areꞌ kanan rasi, natuin Kristus es reꞌ anhaꞌtain ma ntao kau ꞌbeꞌif maꞌtaniꞌ.

2 Naiꞌ Petrus 1:6

Mes kais suma mtea haa naan. Minoniꞌ he hi mbi moint ii in nanan hi mtahan maan hi tuam ein naan. Mes naan ka nanokab fa feꞌe msaꞌ. Ansuun oras hi mipein susat, hi ro he maran ma mtahan piut, kais amtet-koit. Mes ammoꞌe nneis naꞌko naan antein. Ammoeꞌ areꞌ kanan rasi mituin Uisneno In romin.

Naiꞌ Judas 1:25

Suma Uisneno kuun, es reꞌ anjair Usif batuur, Suma In kuun es reꞌ bisa nsoi nafetin kit! Rarit In npaek hit Usiꞌ Yesus Kristus, he nsoi nafetin kit. Onaim areꞌ kanan rais hormaat ii, tbaiseun ma tasaeb sin teu Ne. Areꞌ rais mapinaꞌ-makrahaꞌ, Iin na. In kuasa, koꞌu ma ꞌnae reꞌuf. Ma In hak he naprenat, naꞌko afi unuꞌ, ntea oras, tabu ma eti ia, tar antea nabar-baar. Batuur on naan, tua! Naꞌko kau, Au, naiꞌ Judas, kau, tua.

Rasi Mnitas neu naiꞌ Yohanis 14:12

Onaim areꞌ kanan rasin naan, sin sairt ii nak, Uisneno In tuaf-tuaf sin ro he nnenan narek-rekoꞌ In Kabin ma Prenat, npirsain piut-piut neun Naiꞌ Yesus, ma kais antet-kotin. Rarit au ꞌneen hanaf es naꞌko neon goe tnanan natoon kau mnak, “Yohanis! Ho ro he mtui mak on nai: anmurai oras ia, oras apirsait ein neu Usif Yesus anmaten, sin napenin rasi mnisat.” Rarit Uisneno In Asmaan Akninuꞌ nataah am nak, “Batuur! Sin of nisan batuur! Natuin sin napenin haꞌmuꞌit humaꞌ-humaꞌ nbin pah-pinan, mes sin naran ma ntahan batuur-batuur he natuin Uisneno piut-piut. Onaim Uisneno of anbaras sin maskeet ein, ma sin of ka nmonin fa nbin rais haꞌmuꞌit antenin anbin sonaf neno tunan.”