Filipi 2:9 - Uisneno In Kabin ma Prenat: Rais Manba'an Fe'u nok Reta' Ahun-hunut

⁹ Natuin In nnekaꞌpaar on reꞌ naan, etun Uisneno nait ma nanaib naꞌrat-raatn Ee, ma nnonaꞌ nfee Ne kanaf reꞌ maꞌtaniꞌ nneis. Ka tiit fa kanaf reꞌ maꞌtaniꞌ nneis naꞌko In kanan.

Filipi 2:9 ပူးပေါင်းရင်းမြစ်များ

Retaꞌ Ahun-hunut 3:15

Au of aꞌmoeꞌ ko mok bifee naan, ammamuus piut. Hi sufam-kauꞌm ein on naan amsaꞌ. Ho sufam-kauꞌm ein of anrau sin haek-tiik ein. Mes in sufan es, of antuut nakrat-ratiꞌ ho ꞌnakam.”

Naiꞌ Mateos 11:27

Anꞌonen anrair on naan ate, Naiꞌ Yesus naꞌuab neu abitan reꞌ naan am nak, “Amneen mirek-rekoꞌ! Au Amaꞌ abit sonaf neno tunan, anfee nrair kuasa sin ok-okeꞌ neu Kau. Tuaf reꞌ nahiin Kau batuur-batuur ii, suma meseꞌ, es reꞌ Au Amaꞌ. Ma Tuaf reꞌ nahiin batuur-batuur Au Amaꞌ, suma Amaꞌ In Anah, es reꞌ Au reꞌ ia. Ma Au ꞌpiir tuaf bian sin he ꞌeut ma utoon ꞌeu sin, he sin nahiin narek-reokꞌ Ee.

Naiꞌ Mateos 28:18

Rarit In neem anpaumak-maak sin, ma naꞌuab am nak, “Uisneno nfee Kau kuasat he Au uprenat saaꞌ-saaꞌ ii ok-okeꞌ nbi sonaf neno tunan ma nbi pah-pinan ia.

Naiꞌ Lukas 10:22

Rarit Naiꞌ Yesus natoon neu too mfaun ein am nak, “Amneen, oo! Au Amaꞌ et sonaf neno tunan, anfee nrair Kau areꞌ kanan kuasa sin ok-okeꞌ. Suma Au Amaꞌ nmees jah, es reꞌ nahiin Kau rek-reok gui nak, Au reꞌ ia sekau. Ma suma Amaꞌ In Anah, es reꞌ Au, es reꞌ uhiin Au Amaꞌ urek-reokꞌ ee ꞌak, Amaꞌ naan sekau. Ma Au ꞌpiir tuaf-tuaf bian sin, he utonan sin, maut he sin nahiin Je rek-reko msaꞌ.”

Naiꞌ Yohanis 13:3

Naiꞌ Yesus nahini nrair nak, Uisneno es anhaef Ee neem anbi pah-pinan ia, ma ka ꞌroo fa ntein, In ro he nfain neu Uisneno. Ma In nahini msaꞌ nak, In Amaf abit sonaf neno tunan annonaꞌ ma nfee areꞌ saaꞌ ii ok-okeꞌ neu In aꞌniman.

Naiꞌ Yohanis 17:11

Au ka utua uꞌbaar aꞌtein fa ꞌbi pah-pinan ia, natuin ka ꞌroo fa ntein ate, Au he ꞌfain ꞌeit ꞌeu Ko. Mes atoin ein reꞌ ia, ro he natua nabaran nbin pah-pinan ia. Aam, Ho kninuꞌ teeb. Onaim Au ꞌtoit he Ho mpafaꞌ ma mpanat sin, ampaek Ho kuasam reꞌ Ho mfee mrair je meu Kau. Au ꞌtoti msaꞌ he sin nmafutun njarin meseꞌ, on reꞌ Au ꞌmafutu ꞌjair meseꞌ ꞌok Ko, tua.

Naiꞌ Yohanis 17:12

Oras Au ꞌbi pah-pinan ia ꞌok sin, Au ꞌpijaar sin natuin sin njarin Ho ngguin een. Au ꞌpanat urek-rekoꞌ sin, maut he sin anmafutun piut nok Ko, tua. Ka tiit fa tuaf es, reꞌ namneuk. Suma naiꞌ Judas kuun es reꞌ napasib in tuan, natuin saaꞌ reꞌ Ho Suur Akninuꞌ ntui nain je naꞌko unuꞌ.

Naiꞌ Yohanis 17:5

Unuꞌ te, oras Hit ka tmoeꞌ pah-pinan ia fa feꞌ, Au ubu-bua ꞌok Ko, tua. Oras naan, Au pinak ma krahak nahuum on reꞌ Ho pinam ma kraham. Oras ia, Au he ꞌfain ꞌeit ꞌeu Ko. Onaim Au ꞌtoit he Ho mait muꞌrat-ratan Kau, maut he Au pinak ma krahak anfain on reꞌ unuꞌ naan, tua.”

Haef ein sin Retaꞌ 5:31

Oras ia, Uisneno nait naꞌratan Naiꞌ Yesus, he njair In Tua Pirsaꞌi. Naiꞌ Yesus annaaꞌ kuasat on reꞌ uis kouꞌ goes. In nfei ranan, he nsoi nafetin mansian ii naꞌko sin saant am penu sin. In nfee kit ranan, neu too Israꞌel, he tasaitan hit saant ein ok-okeꞌ, ma ttebi tfain tatuin Uisneno in raan amneot. Nok ranan naan, Uisneno In neekn ee naꞌ ansesuum ma nmuin een, tar antea In ka nsoꞌi ntein fa too Israꞌel hit saant ein.

Efesus 1:10

Ma of antea in oras, Yesus Kristus anjair Aꞌnakat amsaꞌ he nꞌator saaꞌ-saaꞌ reꞌ anbi pah-pinan ma sonaf neno tunan.

Kolose 1:18

In es reꞌ anjari ꞌNakaf neu apirsait ein ok-okeꞌ, ma apirsait ein anjarin on reꞌ In aon. Fin In es reꞌ nanaob sin ok-okeꞌ. Naꞌko areꞌ kanan amates reꞌ anmoni nfanin, In es reꞌ pentiing anneis-neisi, maut he In es reꞌ naꞌraat anneis-neis naꞌko areꞌ kanan saaꞌ-saaꞌ ii ok-okeꞌ.

2 Tesalonika 1:12

Karu hi mmoin nok ranan reꞌ naan ate, of biak ein nait naꞌratan Usif Yesus In kanan. Ma hi of mipein boꞌis ma mnaikas amsaꞌ, natuin hi mituin Ee. Rasin reꞌ ia ok-okeꞌ of anjarin, natuin hit Amaꞌ Uisneno, ma hit Usiꞌ Yesus Kristus, Sin neek rekon.

Atoin Ibranis 1:4

Uisneno In ameput sonaf neno tunan sin ro maꞌtain ein. Mes In Anah maꞌtain reꞌuf, anneis naꞌko sin ok-okeꞌ. Uisneno In pangkat es reꞌ aꞌraat reꞌuf. Ma In nfee In pangkat naan neu In Anah. Etun In Anah, anneis nain In ameupt ein sonaf neno tunan.

Atoin Ibranis 1:9

Ho nekam naan anmariin oras Ho mkius tuaf-tuaf anmoni mneꞌo ma namnoon. Mes Ho nekam naan ansuus oras Ho mkius tuaf-tuaf reꞌ aꞌmoink ein anbeon ma npenun. Etun Ho neekm aan anmariin, he Au ꞌoop minaꞌ ꞌeu Ho ꞌnakam, he usaeb ꞌpiruꞌ-baru he Ho mjair Usif reꞌ Ho maꞌtanim amneis muꞌko biak ein.”

Atoin Ibranis 12:2

Ma oras hit ttaen, hit kais atniik aiꞌ tasnekuꞌ ꞌrii ma ꞌneꞌu, mes atkius teu Naiꞌ Yesus anmees. Natuin In es reꞌ anfei ma naruruꞌ ranan he hit bisa tpirsai Uisneno. Ma In of anturun ma nbaab kit he bisa tpirsai piut-piut tar namsoup. Hi mimnau, aiꞌ? Oras Naiꞌ Yesus napein haꞌmuꞌit ma maꞌneꞌat anbi hau nehe, atoniꞌ anraitn Ee ma nkanaꞌpaar Ee, mes In naran ma ntahan. Natuin In nahiin nak, In haꞌmuꞌit naan oekꞌ een, In neekn ee of anmainua ma nmariin. Naan ro batuur. Fin In nmate nrair, onaim Uisneno nait nasaeb Ee ma ntook et Uisneno In abnapan aꞌneꞌu, he Sin nua sin napreent ein buꞌ-buaꞌ.

Atoin Ibranis 2:9

Mes anmuiꞌ Tuaf es, reꞌ bisa naprenat areꞌ saaꞌ-saaꞌ ii okeꞌ. In reꞌ naan, es reꞌ Naiꞌ Yesus. In neem natua ntahan anbi pah-pinan, ma anjair mansian reꞌ nasaah haꞌmuꞌit tar antea anmaet. In nmaet on reꞌ naan, he nakriraꞌ ma naruruꞌ Uisneno In nekan arekot neu mansian. Rarit Uisneno nboiꞌs Ee ma naꞌraatn Ee, he In naprenat areꞌ saaꞌ-saaꞌ reꞌ Uisneno anmoꞌe nrair sin naan.

1 Naiꞌ Petrus 3:22

Oras ia, Naiꞌ Yesus ansae nfain et sonaf neno tunan. Anbi nee In ntook et bare mahormaat reꞌuf anbi Uisneno In aon-bian aꞌneꞌu. Rarit ameupt ein abitan sonaf neno tunan, areꞌ kuasa sin ok-okeꞌ, ma areꞌ anaaꞌ kuasa bian sin, ro he nneen ma natniin Kristus.

2 Naiꞌ Petrus 1:17

Neot es, hai mibua mok Naiꞌ Yesus anbi Uisneno In aꞌtoꞌef akninuꞌ. Onaim Aam Uisneno kuun es reꞌ natoon anmatoom nok Naiꞌ Yesus In pinan ma krahan. Fin oras naan, hai mneen haanf es, reꞌ reok reꞌuf anpoi naꞌko neon goe mnak, “In reꞌ ia, Au Aan nekaꞌ. In nhariin Au nekak.”

3 Naiꞌ Yohanis 1:7

Sin nnaon nfuun am natefan he nanoniꞌ tuaf-tuaf anmatoom nok Yesus Kristus. Mes sin ka napenin fa turun-babat saaꞌ-saaꞌ naꞌko tuaf reꞌ ka npirsai fa Kristus.

Rasi Mnitas neu naiꞌ Yohanis 1:5

Au ꞌtoti msaꞌ he Yesus Kristus nakriraꞌ In nekan arekot neu ki, he hi bisa mmoni mbi mamut, rameꞌ es nok es, ma taininaꞌ. In naꞌuab piut-piut ma maat-maat anmatoom nok saaꞌ-saaꞌ reꞌ Uisneno natoon neu Ne. Unuꞌ te, In nmaet batuur-batuur, mes Uisneno namonib nafainꞌ Ee, he In njair tua unu reꞌ anmoni nfain naꞌko ꞌmaten. In anjair Aꞌnaak Usif amsaꞌ neu areꞌ kanan usif anbi pah-pinan. Natuin Naiꞌ Yesus anneek kit, es naan ate In natꞌopab In naaꞌ ee nasai neu kit. Nok ranan In aꞌmaten naan, In anfei ranan he nsoi nafetin naan kit naꞌko hit saant ein sin kuasan.

Rasi Mnitas neu naiꞌ Yohanis 11:15

Rarit Uisneno In ameput naꞌko sonaf neno tunan no hiutn ii nfuu in toꞌis. Nok askeken ate, au ꞌneen aꞌroots ii neman naꞌkon sonaf neno tunan am nak, “Oras ia, anaaꞌ aprenat anbi pah-pinan, suma arahaa Uisneno ma Yesus Kristus, es reꞌ Tuaf reꞌ Uisneno npiir ma mbetis nain Je naꞌko afi unuꞌ. Uisneno of annaaꞌ aprenat piut-piut on reꞌ Usif, tar antea nabar-baar.”

Rasi Mnitas neu naiꞌ Yohanis 19:16

Anbi Atoniꞌ naan In tai-paken naan, ma In pusun, anmuiꞌ tuis nak on nai: Usif ansae faof areꞌ kanan usif, ꞌNakaf ansae faof areꞌ kanan ꞌnakaf.

Rasi Mnitas neu naiꞌ Yohanis 3:21

Sekau reꞌ naran ma natuin Kau tar antea in nmaet, Au of aꞌfee ne hak, he ntook ma naprenat nok Kau. Natuin Au ꞌaran ma utuin Au Amaꞌ amsaꞌ, etun oras ia Au ꞌtook ma uprenat ꞌok Ne.

Rasi Mnitas neu naiꞌ Yohanis 5:12

Sin arsin ansiin nok hana ꞌnaek am nak, “Hai maikas miꞌratan ꞌBib-kaes Anaꞌ reꞌ maroroꞌ ꞌmaten naan, Natuin In ro es ansium ma ntoup hai pures ma boꞌis sin! In kuasan kuun, ro kouꞌ besi. In aꞌmuꞌin kuun, ro mfau reꞌuf. In ronen ma tenab, ro ka nsaan niit fa. In maꞌtanin kuun, ro maꞌtain besi. Hai maikas miꞌratan In kanan. Hai miꞌruriꞌ ma mhormaat Ee. Hai mpures ma mboiꞌs Ee.”