1 Korintus 2:3 - Uisneno In Kabin ma Prenat: Rais Manba'an Fe'u nok Reta' Ahun-hunut

³ Neno naan, oras au ubua ꞌok ki, au ꞌnaben ate, au ka ubeiꞌ fa, ma au umtau ma uꞌtaꞌi msaꞌ.

1 Korintus 2:3 ပူးပေါင်းရင်းမြစ်များ

Haef ein sin Retaꞌ 17:1

Rarit naiꞌ Paulus ma naiꞌ Silas annaon nkonon. Sin nkono haa kota es, kaan ee, Amfipolis, neun kota es anteniꞌ, kaan ee, Apolonia. Naꞌko naan, sin nnaon nkonon ma ntean kota Tesalonika. Anbi kota naan, anmuiꞌ atoin Yahudis sin uim onen es.

Haef ein sin Retaꞌ 18:1

Oras naan, uis koꞌu keser Roma, kaan ee naiꞌ Klaudius. In natoꞌon atoin Yahudis sin, rarit in nriuꞌ napoitan sin naꞌko kota Roma nbi propinsi Itali. Onaim sin nsisaeꞌn ok neun mee-mee. Anmuiꞌ naan atoin Yahudis tuaf es, kaan ee naiꞌ Akila, ma nok in fee je, bi Priskila. Sin nua sin naen anpoin naꞌkon propinsi Itali, nnaon neu kota es, kaan ee, Korintus. Naiꞌ Akila reꞌ ia, naꞌko propinsi Pontus. In meupn ii, es reꞌ nmoeꞌ bareꞌ naꞌko pasu. Oras naan, naiꞌ Paulus annao nasaitan kota Atena, ma in nnao neu kota Korintus amsaꞌ. Anbi naan, naiꞌ Paulus anmakhiin ein nok naiꞌ Akila ma bi Priskila, natuin in amoeꞌ bare naꞌko pasu msaꞌ. Sin natua nabuan, ma nmeup nabuan.

Haef ein sin Retaꞌ 18:12

Oras naan, sin nasaeb tuaf es njair gubernur anbi propinsi Akaya. In kaan ee, naiꞌ Galio. Onaim atoin Yahudis sin anmaꞌakoran ma sin nheer neik naiꞌ Paulus annao neu gubernur feꞌu, anbi bare feek rasi.

Haef ein sin Retaꞌ 18:6

Mes anmuiꞌ atoin Yahudis reꞌ nraban naiꞌ Paulus piut, ma sin naꞌuab namouf goe. Rarit in ntekar afu skukuk naꞌko in baer paken, njair tanar nak, in ka nfairori nteniꞌ sin fa, natuin sin ka nromin fa he ntoup Rais Reko reꞌ in natoon neu sin. Onaim in naꞌuab am nak, “Hi reꞌ ia, ro bainesiꞌ ki! Hi on he mikosob kiim hi ruikm ein! Mes maut nai! Hi of mitaah kiim hi saant ein. Anmurai naꞌko oras ia, au ka ꞌmuꞌi ꞌteniꞌ fa urusan ꞌok atoin Yahudis ki. Au he ꞌnao unoniꞌ uuf aꞌtetaꞌ reꞌ ka atoin Yahudis fa.”

2 Korintus 10:1

Au naiꞌ Paulus kau, tua. Au es reꞌ aꞌtui ꞌbi ia. Of anmuiꞌ tuaf naꞌko ki reꞌ mitenab on nai: karu au ubua ꞌok ki, au umaeb ok he uꞌuab maat-maat. Mes karu au uꞌroo uꞌko ki, au ubrain he uꞌuab ka uꞌaib fa, tua. On naan, aa oo? Te kaah, au ꞌtoit he hi mneen ma mitniin kau, natuin Kristus In nekan arekot neu ki, ma In neekn ee maꞌnuraꞌ neu ki.

2 Korintus 10:10

Mes atoin ein naan naꞌuab ein am nak, “Kais amfairoir ma mtoe mituin naiꞌ Paulus. Fin maski in suurt ee maꞌtaniꞌ, mes karu in nmees neem ate, in aꞌoret ma in uab ee ka nmuiꞌ fa kuasa.”

2 Korintus 13:4

Oras sin naꞌmaet Je nbi hau nehe, batuur In ka naꞌbeꞌif, fin In nafetin anrair In kuasa. Mes Uisneno nfee nrair kuasa neu Kristus he In nmoin oras ia. Rarit maski hit reꞌ tjair Iin na reꞌ tnaben tak, hit ka taꞌbeiꞌ fa, mes Uisneno nfee kit ꞌmoin feꞌu. Etun hai bisa mtuthae ki mpaek In kuasa.

2 Korintus 13:9

Karu hi miꞌbeiꞌ, ma hai mꞌoer, hai mmariin ahaa. Fin hai mꞌonen amtoit he Uisneno nanokab ki ntein.

2 Korintus 4:1

Uisneno naruruꞌ ma nakriraꞌ nrair In rais kasian neu kai. Es naan ate, In nreek haefan kai he mitoon meu tuaf anmatoom nok In Rais Manbaꞌan Feꞌu. Etun es hai mtahan ma maran piut, ma ka mꞌoer fa.

2 Korintus 4:16

Es naan ate, hit ttahan ma tmaran piut, ma ka tꞌoer fa. Maski hit aok ii namreuꞌ, mes Uisneno nhaꞌtain hit nekak neno-neno.

2 Korintus 6:4

Ma areꞌ saaꞌ-saaꞌ ii reꞌ hai mmoeꞌ sin, hai mꞌusaha he miruruꞌ ma mikriraꞌ mak, hai reꞌ ia, Uisneno In ameup rekon. Onaim maski hai mipein susat, mipein haꞌmuꞌit, aiꞌ mmoni mbi taisibu, mes hai mtahan ma maran piut aah.

2 Korintus 7:15

Onaim ansuun oras in namnau hi ꞌmoeꞌm ein, ma hi uab ein, in maneekn ee neu ki naꞌbaab on piut. Ma in namnau msaꞌ oras in neit anbi naan, hi mtoup goe meik rais hormaat, mes hi mitenab nok au suurt aan amsaꞌ.

2 Korintus 7:5

Oras hai iim ambi propinsi Makedonia, hai mhae mmaet, fin hai mipein susat humaꞌ-humaꞌ. Hai mmatoe mok tua sonaꞌ. Anbi hai neekm ein hai mimtau msaꞌ.

Efesus 6:5

On naan amsaꞌ ameupt ein! Hi es-es ate ro he mumtau ma musmanan hi usim reꞌ naprenat ki anbi pah-pinan, ma mtornaat ma mitniin ee. Kais ammepu stenaꞌ-stenaꞌ, mes mituin batuur-batuur hi usim in romin, on reꞌ hi mituin batuur-batuur Kristus In romin.