ဟေ​ဗြဲ 1 - ခေတ်သစ်​မြန်မာ သမ္မာကျမ်း ခေတ်သစ်​မြန်မာ သမ္မာကျမ်း
ဟေ​ဗြဲ 1

¹ ရှေး​ကာလ​၌ ဘုရားသခင်​သည် ကျွန်ုပ်တို့​၏ ဘိုးဘေးများ​ကို ပရောဖက်များ​မှတစ်ဆင့် အကြိမ်ကြိမ် နည်းလမ်း​အမျိုးမျိုး​ဖြင့် စကားပြောတော်မူ၏။

² ဤ​နောက်ဆုံးသော​နေ့ရက်များ​တွင်​မူ ဘုရားသခင်​သည် မိမိ​သားတော်​မှတစ်ဆင့် ကျွန်ုပ်တို့​အား စကား​ပြောတော်မူ၏။ ဘုရားသခင်​သည် သားတော်​ကို အရာ​အားလုံး​၏ အမွေခံ​ဖြစ်စေတော်မူ​ပြီး ထို​သားတော်​အားဖြင့် စကြဝဠာ​ကို ဖန်ဆင်းတော်မူ၏။

³ သားတော်​သည် ဘုရားသခင်​၏ ဘုန်းရောင်ခြည်​နှင့် ထွန်းတောက်​လျက်​ရှိပြီး ဘုရားသခင်​၏ စစ်မှန်သည့် စရိုက်​လက္ခဏာ​ကို ထင်ရှားစေတော်မူ၏။ ကိုယ်တော်​သည် မိမိ​၏​တန်ခိုးကြီးသော အမိန့်တော်​ဖြင့် အရာ​အားလုံး​ကို တည်တံ့​စေတော်မူ​ကာ လောကီသားတို့​၏ အပြစ်များ​ကို ဖယ်ရှား​ပြီးနောက် အထက်​ကောင်းကင်ဘုံ​၌ ဘုန်းကြီးသော​တန်ခိုးရှင်​၏ လက်ယာတော်​ဘက်​၌ ထိုင်တော်မူ၏။

⁴ သားတော်​သည် ကောင်းကင်တမန်တို့​ထက် ကြီးမြတ်သော​နာမ​ကို ရရှိသည်​နှင့်​အညီ ကောင်းကင်တမန်တို့​ထက် အလွန်​ကြီးမြတ်တော်မူ၏။

⁵ ဘုရားသခင်​သည် မည်သည့်​ကောင်းကင်တမန်​ကို​မျှ “သင်​သည် ငါ့​သား​ဖြစ်၏။ ယနေ့​ပင် ငါ​သည် သင်​၏ ဖခင်​ဖြစ်လာ၏” ဟူ၍ လည်းကောင်း၊ “ငါ​သည် သူ​၏​ဖခင်​ဖြစ်မည်။ သူ​သည် ငါ့​သား ဖြစ်​လိမ့်မည်” ဟူ၍ လည်းကောင်း မိန့်တော်မမူခဲ့။

⁶ ဘုရားသခင်​သည် မိမိ​၏​သားဦး​ကို ဤ​လောက​သို့ စေလွှတ်တော်မူ​သောအခါ “ဘုရားသခင်​၏ ကောင်းကင်တမန်​အားလုံးတို့​သည် ထို​အရှင်​ကို ကိုးကွယ်​ရမည်” ဟု မိန့်တော်မူ၏။

⁷ ဘုရားသခင်​သည် ကောင်းကင်တမန်များ​အကြောင်း​ကို ဖော်ပြ​ရာတွင် “ကိုယ်တော်​သည် မိမိ​၏​ကောင်းကင်တမန်များ​ကို လေ​ကဲ့သို့ ဖြစ်စေတော်မူ၏။ မိမိ​၏​အမှုထမ်းများ​ကို မီးလျှံ​ကဲ့သို့ ဖြစ်စေတော်မူ၏” ဟု မိန့်တော်မူ၏။

⁸ သို့သော် သားတော်​နှင့် ပတ်သက်၍ “အို ဘုရားသခင်… ကိုယ်တော်​၏​ရာဇပလ္လင်​သည် ထာဝရ​တည်တံ့၏။ ကိုယ်တော်​၏​နိုင်ငံတော်​သည် တရားမျှတမှု​ဖြင့် အုပ်စိုးသော​နိုင်ငံ ဖြစ်ပါ၏။

⁹ ကိုယ်တော်​သည် ဖြောင့်မတ်ခြင်း​ကို နှစ်သက်​ပြီး တရားမဲ့ခြင်း​ကို မုန်းတော်မူ၏။ ထို့ကြောင့် ကိုယ်တော်​၏ ဘုရားသခင်​တည်းဟူသော ဘုရားသခင်​သည် ကိုယ်တော်​၏ အပေါင်းအဖော်များ​ထက် ကိုယ်တော်​ကို ချီးမြောက်​ကာ ဝမ်းမြောက်ခြင်း​ဆီ​သွန်းလောင်း​၍ ခန့်ထားတော်မူသည်” ဟု မိန့်တော်မူ၏။

¹⁰ ထို့ပြင် ဘုရားသခင်​သည် မိမိ​သားတော်​အား “ထာဝရဘုရား… ကိုယ်တော်​သည် အစအဦး​၌ မြေကြီး​ကို တည်​၍ ကိုယ်တော်​၏ လက်တော်​ဖြင့် ကောင်းကင်​ကို ဖန်ဆင်းတော်မူ၏။

¹¹ ကောင်းကင်​နှင့်​မြေကြီး ပျက်စီးသွားမည် ဖြစ်​သော်လည်း ကိုယ်တော်​သည် ထာဝရ​တည်တော်မူ​လိမ့်မည်။ ကောင်းကင်​နှင့်​မြေကြီး​သည် အဝတ်​ကဲ့သို့ ဟောင်းနွမ်းသွား​လိမ့်မည်။

¹² ကိုယ်တော်​သည် ကောင်းကင်​နှင့် မြေကြီး​ကို ဝတ်ရုံ​သဖွယ်​ခေါက်တော်မူ​သဖြင့် ၎င်းတို့​သည် အဝတ်လဲ​သကဲ့သို့ ပြောင်းလဲ​လိမ့်မည်။ သို့ရာတွင် ကိုယ်တော်​သည် ပြောင်းလဲတော်မမူ။ ကိုယ်တော်​၏ အသက်တော်​သည်​လည်း ကုန်ဆုံးတော်မမူ” ဟု မိန့်တော်မူ၏။

¹³ ဘုရားသခင်​သည် မည်သည့်​ကောင်းကင်တမန်​ကို​မျှ “သင်​၏​ရန်သူတို့​ကို သင်​၏​ခြေတင်ခုံ​မဖြစ်စေမီ​အထိ ငါ​၏ လက်ယာဘက်​၌ ထိုင်လော့” ဟု မိန့်တော်မမူခဲ့ပေ။

¹⁴ သို့ဖြစ်လျှင် ကောင်းကင်တမန်များ​သည် ကယ်တင်ခြင်း​အမွေခံမည့်​သူများ​ကို အစေခံ​ရန် ဘုရားသခင်​စေလွှတ်တော်မူသော အစေခံ​ဝိညာဉ်များ ဖြစ်ကြသည်​မဟုတ်လော။