Matio 11 - La Bible en Malgache

¹ Ary rehefa vitan’i Jesosy ny hafatrafatra ho an’ny mpianany roa amby folo lahy dia niala teo Izy hampianatra sy hitoriteny any amin’ireo tanànany.

Ny fanontanian’i Jaona Mpanao batisa

² Rehefa ren’i Jaona, tao an-tranomaizina, ny asa nataon’i Kristy*, dia naniraka ny mpianany izy

³ hilaza Aminy hoe: Ianao va ilay ho avy sa mbola hafa no andrasantsika?

⁴ Ary Jesosy namaly azy ireo hoe: Mandehana ianareo ka ambarao amin’i Jaona izao renareo sy hitanareo izao:

⁵ Mahiratra ny jamba, afaka mandeha tsara ny mandringa, diovina ny boka, malady ny marenina, atsangana ny maty ary itoriana ny Filazantsara ny mahantra.

⁶ Ary sambatra izay tsy ho tafintohina noho ny Amiko.

⁷ Nony lasa ireny, vao nilaza ny amin’i Jaona tamin’ny vahoaka Jesosy ka niteny hoe: Hizaha inona no nandehananareo nankany an-tany efitra? Volotara nohozongozonin’ny rivotra va?

⁸ Sa hizaha inona no nandehananareo? Olona mirentirenty fitafy va? Indro, ny mirentirenty fitafy dia any amin’ny tranon’ny mpanjaka.

⁹ Sa hizaha inona no nandehananareo? Mpaminany va? Eny, hoy Aho aminareo, sady mihoatra lavitra noho ny mpaminany izy.

¹⁰ Izy no ilay voasoratra hoe: «Indro Aho maniraka ny irako hialoha Anao, izay hamboatra ny lalanao eo alohanao» (Mal 3.1).

¹¹ Lazaiko aminareo marina tokoa: Amin’izay nateraky ny vehivavy dia tsy mbola nisy nitsangana izay lehibe noho i Jaona Mpanao batisa; nefa ny kely indrindra amin’ny fanjakan’ny lanitra dia lehibe noho izy.

¹² Ary hatramin’ny andron’i Jaona Mpanao batisa ka mandraka ankehitriny ny fanjakan’ny lanitra dia rombahina, ary ny mpandrombaka dia maka azy an-keriny.

¹³ Fa ny mpaminany rehetra sy ny lalàna dia naminany hatramin’i Jaona.

¹⁴ Ary raha mety mandray ianareo dia izy no ilay Elia izay ho avy.

¹⁵ Izay manan-tsofina hoenti-mihaino, aoka izy hihaino.

¹⁶ Fa tahaka ny inona no hanoharako ity taranaka ity? Tahaka ny ankizy madinika mipetraka eny an-tsena izy, izay miantso ny namany ka miteny hoe:

¹⁷ Efa nitsoka sodina taminareo izahay nefa tsy nandihy ianareo, efa nihira hira fisaonana izahay nefa tsy niteha-tratra ianareo.

¹⁸ Fa tonga i Jaona, tsy nihinana na nisotro, ka hoy ny olona: Manana demonia* izy.

¹⁹ Tonga kosa ny Zanak’Olona*, mihinana sy misotro, ka hoy ny olona: Indro olona fatra-pitia hanina sy mpisotro divay, sakaizan’ny mpamory hetra sy ny mpanota. Fa ny fahendrena dia hamarinin’ny asany.

Ireo tanàna nandà tsy hino

²⁰ Ary tamin’izay Jesosy dia niteny mafy ireo tanàna izay vao avy nanaovany ny ankamaroan’ny asany lehibe, satria tsy nibebaka ireo, ka hoy Izy:

²¹ Lozanao, ry Korazina! Lozanao, ry Betsaida! Fa raha mba tany Tiro sy Sidona no natao ny asa lehibe izay natao teo aminareo dia ho efa nibebaka ela tamin’ny akanjo fisaonana sy ny lavenona ireny.

²² Fa lazaiko aminareo fa ho moramora kokoa ny ho amin’i Tiro sy Sidona amin’ny andro fitsarana noho ny ho aminareo.

²³ Ary ianao, ry Kapernaomy, hasandratra hatrany an-danitra va ianao? Hietry hatrany amin’ny fitoeran’ny maty* ianao; fa raha mba tany Sodoma no natao ny asa lehibe izay natao teo aminao dia ho naharitra ambaraka androany izy.

²⁴ Fa lazaiko aminareo fa ho moramora kokoa ny ho amin’ny tany Sodoma amin’ny andro fitsarana noho ny ho aminao.

Ny Ray, ambaran’ny Zanaka

²⁵ Tamin’izany andro izany koa Jesosy niteny hoe: Midera Anao Aho, Ray ô! Tompon’ny lanitra sy ny tany, fa nafeninao tamin’ny hendry sy ny manan-tsaina izany zavatra izany nefa nasehonao tamin’ny zaza madinika.

²⁶ Eny, Ray ô! Satria izany no sitraponao.

²⁷ Ny zavatra rehetra dia natolotry ny Raiko Ahy; ary tsy misy mahalala tsara ny Zanaka, afa-tsy ny Ray; ary tsy misy mahalala tsara ny Ray, afa-tsy ny Zanaka sy izay tian’ny Zanaka hanehoana Azy.

²⁸ Mankanesa atỳ amiko, ianareo rehetra izay miasa fatratra sy mavesatra entana, fa Izaho no hanome anareo fitsaharana.

²⁹ Ento ny ziogako ka mianara amiko; fa malemy fanahy sady tsy miavona am-po Aho; dia hahita fitsaharana ho an’ny fanahinareo ianareo.

³⁰ Fa mora ny ziogako ary maivana ny entako.