Matio 12 - Baiboly Protestanta Malagasy 2011

Ny nanotazan’ny mpianatra salohim-bary tamin’ny Sabata

¹ Tamin’izany andro izany Jesosy nandeha namakivaky tanimbary iray tamin’ny Sabata; ary noana ny mpianany ka nanoty salohim-bary dia nihinana.

² Fa nony nahita izany ny Fariseo dia niteny Taminy hoe: Indro ny mpianatrao manao izay tsy azo atao amin’ny Sabata.

³ Fa hoy Izy taminy: Tsy mbola novakinareo va ny teny milaza ilay nataon’i Davida, raha noana izy mbamin’ireo izay nanaraka azy,

⁴ fa niditra tao amin’ny tranon’Andriamanitra izy ka nihinana ny mofo atao fanatitra, izay tsy azony na ireo izay nanaraka azy hanina, afa-tsy ny mpisorona ihany?

⁵ Ary mbola tsy novakinareo ao amin’ny lalàna va fa amin’ny Sabata ny mpisorona ao amin’ny tempoly dia mandika ny Sabata, kanefa tsy manan-tsiny?

⁶ Dia lazaiko aminareo fa misy eto lehibe noho ny tempoly.

⁷ Fa raha fantatrareo izay hevitry ny teny hoe: «Famindrampo no sitrako fa tsy fanatitra alatsa-dra» (Hos 6.6), dia tsy mba nanameloka ny tsy manan-tsiny ianareo.

⁸ Fa Tompon’ny Sabata ny Zanak’Olona.

Ilay lehilahy iray maty tanana

⁹ Nony niala teo Jesosy dia niditra tao amin’ny sinagoga;

¹⁰ ary indro, nisy lehilahy maty tanana teo. Ary nanontanian’ny olona Izy hoe: Mety va ny manasitrana amin’ny Sabata? Mba hiampangany Azy izany.

¹¹ Ary hoy Izy taminy: Iza aminareo moa, raha manana ondry iray ka latsaka any an-kady amin’ny Sabata, no tsy handray sy hampiakatra azy?

¹² Ary tsy mihoatra lavitra noho ny ondry va ny olona? Koa amin’izany dia mety ny manao soa amin’ny Sabata.

¹³ Dia hoy Izy tamin’ilay lehilahy: Atsory ny tananao. Dia natsotrany ny tanany ka sitrana tahaka an’ilay ilany.

¹⁴ Dia niala teo ny Fariseo ka nikaon-doha ny amin’izay hamonoany Azy.

Jesosy, ilay Mpanompon’Andriamanitra

¹⁵ Fa Jesosy nahalala izany ka niala teo. Ary nisy olona betsaka nanaraka Azy ka nositraniny avokoa izy rehetra;

¹⁶ ary nandrara azy Izy tsy hanao izay hahafantarana Azy,

¹⁷ mba hahatanteraka izay nampilazaina an’Isaia mpaminany hoe:

¹⁸ «Indro ny Mpanompoko izay nofidiko, ny Malalako izay sitraky ny foko indrindra; hapetrako ao Aminy ny Fanahiko ary hitory ny rariny amin’ny Jentilisa Izy.

¹⁹ Tsy hifanditra na hiantso mafy Izy; tsy hisy handre ny feony any an-dalana;

²⁰ Tsy hotapahiny ny volotara torotoro ary tsy hovonoiny ny lahin-jiro manetona, ambara-pamoakany ny rariny ho mpandresy;

²¹ ary ny anarany no hitokian’ny Jentilisa» (Isa 42.1-4).

Manana izay ifandraisany amin’ny demonia va Jesosy?

²² Noentina tany amin’i Jesosy koa ny lehilahy iray izay demoniaka sady jamba no moana; dia nositraniny ka niteny ilay moana sady nahita.

²³ Dia talanjona ny vahoaka rehetra ka niteny hoe: Moa Ity va ilay Zanak’i Davida?

²⁴ Fa nony ren’ny Fariseo izany dia hoy izy ireo: Ilehity tsy mandroaka ny demonia afa-tsy amin’ny alalan’i Belzeboba, lohan’ny demonia.

²⁵ Ary Jesosy nahafantatra ny eritreriny dia niteny tamin’ireo hoe: Ho foana ny fanjakana rehetra izay miady an-trano; ary tsy haharitra ny tanàna rehetra, na ny trano, izay miady an-trano.

²⁶ Raha i Satana no mandroaka an’i Satana dia miady an-trano izy; koa ahoana no haharetan’ny fanjakany?

²⁷ Ary raha amin’ny alalan’i Belzeboba no amoahako ny demonia, amin’ny alalan’iza kosa no mba androahan’ny zanakareo azy? Noho izany dia izy ireo ihany no ho mpitsara anareo.

²⁸ Fa raha ny Fanahin’Andriamanitra kosa no amoahako ny demonia dia efa tonga aminareo sahady ny fanjakan’Andriamanitra.

²⁹ Fa hataon’ny olona ahoana no fiditra ao an-tranon’ny mahery handroba ny entany raha tsy afatony aloha ny mahery? Dia izay vao handroba ny ao an-tranony izy.

³⁰ Izay tsy momba Ahy dia manohitra Ahy; ary izay tsy miara-mamory amiko dia mampihahaka.

Ny zanak’olombelona dia hotsaraina amin’ny teniny

³¹ Noho izany, lazaiko aminareo hoe: Hahazo famelan-keloka ny olona amin’ny ota sy fitenenan-dratsy samihafa rehetra; fa tsy hahazo famelan-keloka ny olona amin’ny fitenenan-dratsy ny Fanahy Masina.

³² Ary na iza na iza no milaza teny hanohitra ny Zanak’Olona dia hahazo famelan-keloka ihany; fa na iza na iza no miteny hanohitra ny Fanahy Masina dia tsy mba hahazo famelan-keloka, na amin’izao fiainana izao, na amin’ny ho avy.

³³ Koa ataovy tsara ny hazo mbamin’ny voany, na ataovy ratsy ny hazo mbamin’ny voany; fa ny voany no ahafantarana ny hazo.

³⁴ Ry taranaky ny menarana! Hataonareo, izay ratsy fanahy, ahoana no fahay miteny zavatra tsara? Fa avy amin’ny haben’ny ao am-po no itenenan’ny vava.

³⁵ Avy amin’ny rakitra tsara no amoahan’ny olona tsara fanahy zavatra tsara; ary avy amin’ny rakitra ratsy kosa no amoahan’ny olona ratsy fanahy zavatra ratsy.

³⁶ Ary lazaiko aminareo fa hampamoahina ny olona amin’ny andro fitsarana noho ny amin’ny teny rehetra tsy misy antony izay nataony.

³⁷ Fa ny teninao no hanamarinana anao ary ny teninao no hanamelohana anao.

Ny famantarana ny amin’i Jona; ny mpanjakavavy avy any atsimo

³⁸ Ary tamin’izany, ny sasany tamin’ireo mpanoradalàna sy Fariseo, dia niteny Taminy hoe: Mpampianatra ô, ta hahita famantarana avy Aminao izahay.

³⁹ Fa Jesosy namaly azy ireo hoe: Izay taranaka ratsy fanahy sy mijangajanga dia fatra-pitady famantarana; nefa tsy hisy famantarana homena azy, afa-tsy famantarana ny amin’i Jona mpaminany;

⁴⁰ fa tahaka ny nitoeran’i Jona telo andro sy telo alina tao an-kibon’ny hazandrano lehibe dia toy izany no hitoeran’ny Zanak’Olona telo andro sy telo alina ao anatin’ny tany.

⁴¹ Ny olona tany Ninive dia hiara-mitsangana amin’ity taranaka ity amin’ny andro fitsarana ka hanameloka azy; fa nibebaka izy ireo tamin’ny toritenin’i Jona; nefa indro, misy lehibe noho i Jona eto.

⁴² Ny mpanjakavavy avy tany atsimo dia hiara-mitsangana amin’ity taranaka ity amin’ny andro fitsarana ka hanameloka azy; fa avy tany amin’ny faran’ny tany izy hihaino ny fahendren’i Solomona; nefa indro, misy lehibe noho i Solomona eto.

Ny fiverenan’ny fanahy maloto

⁴³ Raha miala amin’ny olona ny fanahy maloto dia mandeha mitety ny tany tsy misy rano izy, mitady fitsaharana, nefa tsy mahita.

⁴⁴ Dia hoy izy: Hody any amin’ny tranoko izay nialako aho; ary nony tonga izy dia hitany fa foana ny trano sady efa voafafa no voalamina.

⁴⁵ Ary mandeha izy ka mitondra fanahy fito hafa koa izay ratsy noho izy miaraka aminy; dia miditra ireo ka mitoetra ao; ary ny fiafaran’izany olona izany dia tonga ratsy noho ny voalohany. Dia tahaka izany koa no ho amin’ity taranaka ratsy fanahy ity.

Ny tena fianakavian’i Jesosy

⁴⁶ Ary raha mbola niteny tamin’ny vahoaka Jesosy, indreo ny reniny mbamin’ireo rahalahiny, nijanona teo alatrano nitady hiresaka Taminy.

⁴⁷ Ary nisy iray niteny Taminy hoe: Indreo ny reninao mbamin’ny rahalahinao, mijanona ato alatrano mitady hiresaka Aminao.

⁴⁸ Fa namaly an’ilay nilaza Taminy izy hoe: Iza moa no reniko ary iza no rahalahiko?

⁴⁹ Sady nanondro ny mpianany tamin’ny tanany Izy no niteny hoe: Indreo no reniko sy rahalahiko;

⁵⁰ fa na iza na iza no manao ny sitrapon’ny Raiko izay any an-danitra dia izy no rahalahiko sy anabaviko ary reniko.