Jeremia 30 - Baiboly Protestanta Malagasy 2011

Tebiteby sy famonjena

¹ Izao no teny tonga tamin’i Jeremia avy tamin’NY TOMPO:

² Izao no lazain’NY TOMPO, Andriamanitry ny Israely: Soratinao amin’ny boky ny teny rehetra izay nolazaiko taminao.

³ Fa indro, avy ny andro, hoy NY TOMPO, izay hampodiko ny oloko, dia ny Israely sy ny Joda, avy amin’ny fahababoany, hoy NY TOMPO; eny, hampody azy ho amin’ny tany izay nomeko ny razany Aho, dia ho azy izany.

⁴ Ary izao no teny izay nolazain’NY TOMPO ny amin’ny Israely sy ny Joda,

⁵ eny, izao no lazain’NY TOMPO: Feo mampangovitra no renay; tahotra no misy fa tsy fiadanana.

⁶ Anontanionareo ka jereo, raha mba misy lehilahy mihetsi-jaza; koa nahoana no samy hitako manery ny andilany amin’ny tanany avy ny lehilahy rehetra, ohatra ilay efa mihetsi-jaza iny, sady ny tarehy rehetra dia efa tonga hatsatra avokoa?

⁷ Indrisy! Lehibe izany andro izany ka tsy misy tahaka azy; andro fahoriana ho an’i Jakoba izany, nefa ho voavonjy ho afaka amin’izany ihany izy.

⁸ Fa amin’izany andro izany, hoy Andriamanitra, Tompon’izao rehetra izao, dia hotapahiko ny ziogany ho afaka amin’ny vozonao, hotapahiko koa ny kofehy namatorana anao, ary tsy hampanompo anao intsony ny firenena hafa;

⁹ fa hanompo NY TOMPO Andriamaniny sy i Davida mpanjakany izay hatsangako ho azy izy.

¹⁰ Koa aza matahotra ianao, ry Jakoba mpanompoko, hoy NY TOMPO; ary aza mivadi-po, ry Israely; fa indro, hovonjeko avy any lavitra ianao ary hovonjeko avy any amin’ny tany izay nahababo azy ny taranakao; dia hiverina i Jakoba ka hiadana sy handry fehizay, ary tsy hisy olona hanaitaitra azy intsony.

¹¹ Fa momba anao Aho mba hamonjy anao, hoy NY TOMPO; koa na dia levoniko aza ny firenena rehetra izay nampielezako anao dia tsy mba holevoniko kosa ianao; nefa kosa mba hanariko araka ny onony ihany ianao, fa tsy dia havelako fotsiny amin’izao.

Faharatrana sy fanasitranana

¹² Fa izao no lazain’NY TOMPO: Tsy misy fanafodiny ny faharatranao ary tsy azo sitranina ny ferinao.

¹³ Tsy misy miaro anao amin’izay mahazo anao; tsy misy famehezana hitsaboana ny ferinao; ary tsy misy fanafody hanasitranana anao.

¹⁴ Ireo tia anao dia efa nanadino anao avokoa, tsy mba notadiaviny ianao; fa famelin’ny fahavalo no namelezako anao, dia ny famaizana tsy mitsitsy, noho ny habetsahan’ny helokao sy ny hamaroan’ny fahotanao.

¹⁵ Nahoana ianao no mitaraina noho ny faharatranao sy noho ny fanaintainanao izay tsy azo atsahatra? Fa noho ny habetsahan’ny helokao sy ny hamaroan’ny fahotanao no nanaovako izany taminao.

¹⁶ Koa izay rehetra mihinana anao dia mba hohanina, ary izay rehetra mampahory anao dia ho lasan-ko babo; izay mamabo anao dia hobaboina ary izay rehetra mandroba anao dia hatolotro horobaina.

¹⁷ Fa hotanterahiko ny fanasitranana anao, eny, hositraniko ny faharatranao, hoy NY TOMPO. Noho ny nitenenany anao hoe: Ilay noroahina, sy hoe: I Ziona tsy misy mpitady ity,

Havaozin’Andriamanitra ny vahoakany

¹⁸ dia izao no lazain’NY TOMPO: Indro, haveriko amin’ny laoniny ny tranolain’i Jakoba, ary ny fonenany dia hamindrako fo; koa ny tanàna dia haorina eo amin’ny havoanany, ary ny lapan’ny mpanjaka dia haorina indray eo amin’izay toerany marina.

¹⁹ Ary hisy fisaorana sy feon’ny mifaly avy ao aminy; dia hahamaro azy Aho ka tsy hihena ny isany, sady hanome voninahitra azy Aho ka tsy hambaniana izy.

²⁰ Ny zanany koa dia ho tahaka ny tany aloha, ny fiangonany dia hampitoerina eo anatrehako ary hovaliko izay rehetra mampahory azy.

²¹ Ary ny lehibeny dia ho avy ao aminy ihany, ny mpanapaka azy koa dia ho avy ao aminy ihany; hampanakaiky azy Aho ka hanatona Ahy izy, fa iza moa no sahy hanao ny ainy ho antoka ka hanatona Ahy? Hoy NY TOMPO.

²² Ho oloko ianareo ary Izaho ho Andriamanitrareo.

Ny tadion’NY TOMPO

²³ E! Ny tadion’NY TOMPO! Mivoaka ny fahatezerana sy ny tadio mitambolimbolina ka miantonta amin’ny lohan’ny ratsy fanahy.

²⁴ Ny firehetan’ny fahatezeran’NY TOMPO dia tsy hitsahatra raha tsy efany sy tanterany ny hevitry ny fony; mbola ho fantatrareo any am-parany ny amin’izany.