Jeremia 22 - Baiboly Protestanta Malagasy 2011

Fampitandremana ny fianakavian’ny mpanjakan’ny Joda

¹ Izao no lazain’NY TOMPO: Midìna any amin’ny tranon’ny mpanjakan’ny Joda ka lazao any izao teny izao hoe:

² Henoy ny tenin’NY TOMPO, ry mpanjakan’ny Joda, izay mipetraka amin’ny sezafiandrianan’i Davida, dia ianao sy ny mpanomponao ary ny vahoakanao izay miditra amin’ireto vavahady ireto:

³ Izao no lazain’NY TOMPO: Manaova fitsarana marina ianareo ka afaho amin’ny tanan’ny mpampahory ny olona voaroba; aza mampahory na mampidi-doza amin’ny vahiny, ny kamboty sy ny mpitondratena, ary aza mandatsaka ny ran’ny tsy manan-tsiny amin’ity toerana ity.

⁴ Fa raha mankatò izany teny izany tokoa ianareo dia hisy mpanjaka hipetraka eo amin’ny sezafiandrianan’i Davida hiditra amin’ity vavahady ity mitaingina kalesy fitondra miady sy soavaly, dia izy sy ny mpanompony ary ny vahoakany.

⁵ Fa raha tsy hihaino izany teny izany kosa ianareo dia ny tenako no ianianako, hoy NY TOMPO, fa ho lao tokoa ity trano ity.

⁶ Fa izao no lazain’NY TOMPO ny amin’ny mpanjakan’ny Joda sy ny mpianakaviny: Amiko ianao dia tahaka an’i Gileada sy ny tampon’i Libanona, nefa hataoko tonga tany efitra sy tanàna tsy onenana.

⁷ Ary hanendry mpandrava hamely anao Aho, ary samy hitondra ny fiadiany avy izy; dia hokapain’ireo ny sederanao voafantina ka hariany ao anaty afo.

⁸ Ary firenena maro no handalo ity tanàna ity ka samy hiteny amin’ny namany avy hoe: Nahoana NY TOMPO no dia nanao izao tamin’ity tanàna lehibe ity?

⁹ Dia izao no ho valiny: Noho ny nahafoizany ny faneken’NY TOMPO Andriamaniny sy ny niankohofany tamin’ny andriamanitra hafa sy ny nanompoany ireny.

Ny amin’i Saloma, mpandimby an’i Josia

¹⁰ Aza mitomany ny maty ianareo, na misaona azy; mitomania sy midradradradrà noho ilay efa lasan-ko babo; fa tsy hiverina intsony izy na hahita ny tany nahaterahany.

¹¹ Fa izao no lazain’NY TOMPO ny amin’i Saloma, zanak’i Josia, mpanjakan’ny Joda, dia ilay nanjaka nandimby an’i Josia rainy, izay efa niala tamin’ity tany ity: Tsy hiverina atỳ intsony izy

¹² fa ho faty any amin’ny tany izay nitondrana azy ho babo, ary tsy hahita ity tany ity intsony.

Teny mamely an’i Joiakima, mpandimby faharoa an’i Josia

¹³ Lozan’izay manorina ny tranony amin’ny tsy rariny sy ny rihany ambony amin’ny fitaka ka mampiasa maina ny namany, nefa tsy mandoa ny karamany,

¹⁴ sady miteny hoe: Hanao trano lehibe ho ahy aho sy efitrano ambony malalaka, ary holoahany hisy varavarankely sady hasiany valin-drihana sedera sy hohosorana loko menamena.

¹⁵ Mpanjaka va ianao ka ataonao be sedera noho ny an’ny sasany ny tranonao? Tsy nihinana sy nisotro va ny rainao? Nefa nanao fitsarana marina izy! Nambinina izy tamin’izany.

¹⁶ Nitsara ny adin’ny ory sy ny mahantra izy; nambinina izy tamin’izany. Tsy izany va no fahalalana Ahy? Hoy NY TOMPO.

¹⁷ Nefa tsy misy alehan’ny masonao sy ny eritreritrao afa-tsy ny filan-karena ihany sy ny fandatsahana ny ran’ny tsy manan-tsiny ary ny fampahoriana sy ny fanaovana an-keriny.

¹⁸ Ary noho izany dia izao no lazain’NY TOMPO ny amin’i Joiakima, zanak’i Josia, mpanjakan’ny Joda: Ny olona dia tsy hisaona azy hoe: Indrisy, tompokolahy! Na: Indrisy, tompokovavy! Ny olona dia tsy hitomany azy hoe: Indrisy, tompoko! Na: Indrisy ny voninahiny!

¹⁹ Halevina toy ny fandevina boriky izy ka hotaritarihina sy hariana any ivelan’ny vavahadin’i Jerosalema.

Henatra sy fahafaham-baraka ho an’ny Jerosalema

²⁰ Miakara any Libanona ka miantsoantsoa mafy; asandrato any Basana ny feonao ary miantsoantsoa mafy avy eny Abarima, fa ringana avokoa ireo tia anao.

²¹ Efa niteny taminao Aho, fony ianao mbola nipetraka tsy nanana ahiahy; nefa hoy ianao: Tsy hihaino aho. Fanaonao hatry ny fony ianao mbola tanora ny tsy mihaino ny teniko.

²² Hopaohin’ny rivotra ny mpitondra anao rehetra, ary ho lasan-ko babo ireo tia anao, eny, ho menatra sy hangaihay tokoa ianao noho ny haratsianao rehetra.

²³ Ry ilay mponina any Libanona, izay manao ny akaninao eny amin’ny sedera, indrisy ny fisentoanao, rehefa hiharan’ny faharariana ianao, toy ny fanaintainan’ny vehivavy eo am-piterahana!

Ny amin’i Jekonia, zanakalahin’i Joiakima

²⁴ Raha velona koa Aho, hoy NY TOMPO, na dia ho peratra fitombo-kase amin’ny tanako ankavanana aza ianao, ry Jekonia, zanak’i Joiakima, mpanjakan’ny Joda, dia hotsoahako hiala eo ianao

²⁵ ka hatolotro eo an-tanan’izay mitady ny ainao sy eo an-tanan’izay atahoranao, dia eo an-tanan’i Nebokadnezara, mpanjakan’i Babilona, sy eo amin’ny tanan’ny Kaldeana.

²⁶ Ary ianao sy ny reninao niteraka anao dia hariako any an-tany hafa izay tsy nahaterahanareo ka any no hahafatesanareo.

²⁷ Fa ny tany iriny hiverenana dia tsy hiverenany.

²⁸ Moa va ity lehilahy Jekonia ity dia vilany efa fanary sy efa torotoro, na fanaka tsy misy ilàna azy intsony no dia nariana izy sy ny taranany ka natsipy any amin’ny tany tsy fantany?

²⁹ Ry tany! Ry tany! Ry tany! Henoy ny tenin’NY TOMPO.

³⁰ Izao no lazain’NY TOMPO: Soratinareo ho tsy manan-taranaka ity lehilahy ity, dia lehilahy tsy hambinina amin’ny androny; fa tsy hisy amin’ny taranany izay hambinina ka hipetraka eo amin’ny sezafiandrianan’i Davida, na hanapaka ao amin’ny Joda intsony.