Isaia 1 - Baiboly Protestanta Malagasy 2011

FIZARANA VOALOHANY

¹ Ny fahitan’Isaia zanak’i Amoza, izay hitany ny amin’ny Joda sy i Jerosalema tamin’ny andron’i Ozia, i Jotama, i Ahaza ary i Hezekia, izay samy mpanjakan’ny Joda.

Nikomy nanohitra NY TOMPO ny Israely

² Mihainoa ry lanitra! Atongilano ny sofinao ry tany! Fa NY TOMPO no miteny hoe: Nitaiza sy nahalehibe zaza Aho, kanjo nikomy Tamiko ireo.

³ Ny omby dia mahalala ny tompony, ary ny boriky dia mahalala ny fihinanam-bilon’ny tompony; fa ny Israely no tsy mahalala, ny oloko no tsy mahazo an-tsaina.

Tsy misy izay tsy potika ao Joda

⁴ Indrisy! Firenena mpanota, olona mavesa-keloka, taranaka mpanao ratsy, zanaka mpanao meloka! Nahafoy NY TOMPO izy, nanamavo ny Iray Masin’ny Israely, efa nikomy izy.

⁵ Nahoana no mbola te hokapohina ihany ianareo noho izao fikomianareo lalandava izao? Henika aretina ny loha manontolo ary marary ny fo manontolo.

⁶ Hatrany am-paladia ka hatrany an-tampon-doha dia tsy misy izay tsy marary, ratra sy dian-kapoka ary fery vao tsy voatsabo na voafehy na voalemin’ny diloilo.

⁷ Lao ny taninareo; voadoro tamin’ny afo ny tanànanareo; lanin’ny hafa firenena eo imasonareo ny tanimbolinareo. Lao izy, toy ny efa noravan’ny hafa firenena.

⁸ Nilaozana i Ziona zanakavavy, tahaka ny trano rantsan-kazo ao anaty tanim-boaloboka sy tahaka ny trano fialofan’ny mpiandry voly ao anaty tanim-boatango, tahaka ny tanàna natao fahirano.

⁹ Raha tsy Andriamanitra, Tompon’izao rehetra izao, no namela olona vitsivitsy tamintsika, dia efa tonga tahaka an’i Sodoma isika ary nitovy tamin’i Gomora.

Fanompoam-pivavahana maharikoriko an’Andriamanitra

¹⁰ Henoy ny tenin’NY TOMPO, ry mpitondra an’i Sodoma! Atongilano amin’ny lalànan’Andriamanitsika ny sofinareo, ry vahoakan’i Gomora!

¹¹ Hataoko inona ny zavatra betsaka vonoinareo ho fanatitra? Hoy NY TOMPO. Efa tofoka amin’ny ondrilahy atao fanatitra dorana manontolo sy ny jaboran’ny zanak’omby mifahy Aho; tsy sitrako ny ran’ny vantotra ombilahy sy ny an’ny zanak’ondry ary ny an’ny osilahy.

¹² Rehefa tonga miseho eo anatrehako ianareo, iza moa no nitady anareo hanitsakitsaka ny kianjako?

¹³ Aza mitondra fanati-poana intsony, fahavetavetana amiko ny fofony; ny amin’ny voaloham-bolana sy ny Sabata ary ny fiantsoam-pivoriana: Tsy zakako ny fivoriana masina haroharoam-paharatsiana!

¹⁴ Halako ny voaloham-bolanareo sy ny andro firavoravoanareo, mavesatra amiko izany; sasatra mitondra azy Aho.

¹⁵ Raha mamelatra ny tanana ianareo dia hitampi-maso tsy hijery anareo Aho; eny, na dia manao vavaka be dia be aza ianareo dia tsy hihaino Aho; Feno ran’olona ny tananareo.

¹⁶ Misasà ianareo, diovy ny tenanareo, esory tsy ho eo anoloan’ny masoko ny ratsy fanaonareo; atsaharo ny fanaovan-dratsy;

¹⁷ Mianara hanao ny tsara, katsaho ny rariny, anaro ny mpampahory, omeo rariny ny kamboty, arovy ny mpitondratena.

¹⁸ Avia ary hifandahatra isika, hoy NY TOMPO. Na dia mena toy ny jaky aza ny fahotanareo dia ho tonga fotsy tahaka ny orampanala, Na dia mangatrakatraka tahaka ny sily aza dia ho tonga tahaka ny volon’ondry fotsy.

¹⁹ Raha manaiky sy mankatò ianareo dia hihinana ny voka-tsoa amin’ny tany;

²⁰ fa raha mbola mandà sy mikomy ihany ianareo dia ho lanin’ny sabatra. Ny vavan’NY TOMPO no niteny.

Hodiovin’Andriamanitra i Jerosalema

²¹ Indrisy! Tonga janga ity tanàna nahatoky! Feno ny rariny izy taloha sady nitoeran’ny fahamarinana, fa ankehitriny kosa dia mpamono olona no ao aminy!

²² Tonga tain-drendrika ny volafotsinao; voatsatso tamin’ny rano ny divainao.

²³ Ireo lehibenao dia mpikomy sady naman’ny mpangalatra; samy tia kolikoly sy fatra-pitady tambitamby avokoa izy rehetra; tsy mba omeny rariny ny kamboty ary tsy avelany hoentina eo aminy ny adin’ny mpitondratena.

²⁴ Noho izany dia hoy NY TOMPO, Andriamanitra Tompon’izao rehetra izao, Ilay Maherin’ny Israely: E! Hamely ny mpanohitra Ahy Aho ary hamaly faty ny fahavaloko.

²⁵ Hamerina ny tanako ho aminao indray Aho ka hodioviko amin’ny sirahazo ianao hahafahan’ny tain-drendrikao anao; hesoriko ny firaka rehetra aminao.

²⁶ Dia hampodiko ho toy ny teo aloha ny mpitsaranao ary ho toy ny tamin’ny voalohany ny mpanolotsainanao. Rehefa afaka izany, ianao dia hantsoina hoe Tanànan’ny fahamarinana, Tanàna mahatoky.

²⁷ Havotana amin’ny fitsarana i Ziona ary izay miverina ao dia havotana amin’ny fahamarinana.

²⁸ Samy haringana avokoa ny mpikomy sy ny mpanota; eny, ho lany ritra izay mahafoy NY TOMPO.

²⁹ Fa hahazo henatra ianareo noho ny amin’ny hazo terebinta izay nifalianareo ary hangaihay ianareo noho ny amin’ny saha izay nofidinareo.

³⁰ Fa ho tahaka ny hazo terebinta malazo ravina ianareo sady ho tahaka ny saha tsy misy rano.

³¹ Ny mahery dia ho tahaka ny vohavoha, ny asany dia ho tahaka ny kilalaon’afo; hiaraka hirehitra izy roa tonta ary tsy hisy hamono ny afo.