Tononkiran’i Solomona 4 - Baiboly Katolika

¹ Eny, tsara tarehy ianao, ry malalako; eny tsara tarehy ianao. Masom-boromahailala ny masonao saronan’ny voalinao; ny volonao toy ny andian’osivavy, miantsampitsampy eny ankisolosolon’ny tendrombohitr’i Galaada.

² Ny nifinao, toy ny andian’ondrivavy voahety, miakatra avy any amin’ny fampandroana azy, samy manana anaka kambana, ary tsy misy bada izy ireo na dia iray aza.

³ Tahaka ny kofehy jaky ny molotrao, ary mahafinaritra ny vavanao; tahaka ny voan’ampongabendanitra misasaka ny takolakao, alokalofan’ny voalinao.

⁴ Tahaka ny tilikambon’i Davida ny vozonao, izay nataony trano fitahirizam-piadiana, ka ihantonan’ampinga arivo, dia ny ampingan’ny mahery rehetra.

⁵ Tahaka ny zanaky ny gazela ny nononao roa, tahaka ny kambana roa zanaky ny gazela iray, izay mihinana eny amin’ny lisy.

⁶ Alohan’ny hangatsiatsiahan’ny andro, sy hahalasanan’ny aloka dia ho eny an-tendrombohitry ny mira aho, sy ho eny amin’ny havoan’ny emboka.

⁷ Fa tsara tarehy indrindra ianao, ry malalako, sady tsy misy panda aminao!

⁸ Avia, hiaraka amiko, avy any Libàna, ry fofom-badiko, avia hiaraka amiko, avy any Libàna! Topazo maso avy eny an-tampon’i Amàna, avy eny an-tampon’i Sanira sy i Hermôna, avy any amin’ny lavaky ny liona, sy ny tendrombohitry ny leoparda.

⁹ Efa lasanao ny foko, ry havako, ry fofom-badiko, efa lasanao ny foko tamin’ny masonao indray mijery monja, tamin’ny singam-boahangy eo amin’ny fehivozonao!

¹⁰ Endrey izany hamamin’ny fitiavanao, ry havako voafofo, endrey izany hatsaran’ny fitiavanao mihoatra noho ny divay; ary mihoatra noho ny zava-manitra rehetra, ny fofon’ny hanitrao!

¹¹ Mitete tantely ny molotrao, ry voafofo; ny tantely sy ny ronono dia ao ambany lelanao, ary sahala amin’ny fofon’i Libàna, ny fofon’ny fitafianao.

¹² Ny anabaviko voafofo dia tanimboly voahidy, loharano voahidy, fantsakana voaisy tombokase.

¹³ Ny tsirinao dia alan’ampongabendanitra, misy sipresy sy narda,

¹⁴ narda sy safrana, kanela sy sinamôma, mbamin’ny hazo rehetra misy emboka, mira sy aloesy, mbamin’ny hazo rehetra mahavokatra diloilo manitra tsara indrindra.

¹⁵ Loharanon’ny zaridaina, fantsakan-drano velona, sakeli-drano mandeha avy any Libàna.

Ampakarina

¹⁶ Mifohaza, ry rivotra avy any avaratra, avia ry rivotra avy any atsimo! Mitsofa eo an-tanimboliko, hitetevan’ny hazo mahavokatra dity manitra. Aoka hiditra ao an-tanimboliny ny malalako, ka hihinana amin’ireo voankazony tsara tarehy!