Salamo 85 - Baiboly Katolika

SALAMO 85 (Volgata 84) Vavaka fangatahana fandriam-pahalemana

¹ Ho an’ny mpampianatra hira. Salamon’ny zanak’i Kôre .

² Ry Iaveh ô, efa nanambina ny taninao Ianao, nampody ireo voababo teo amin’i Jakôba;

³ namela ny heloky ny vahoakanao, nanarona ny fahotany rehetra; - Selà

⁴ najanonao ny hatezeranao rehetra, nalanao ny hatezeranao mirehitra.

⁵ Ampodio indray amin’ny toetranay taloha izahay, ry Andriamanitry ny famonjena anay ô; atsaharo ny hatezeranao aminay.

⁶ Dia ho tezitra mandrakizay aminay va Ianao? dia hampaharetinao mandrakizay va ny haviniranao?

⁷ Tsy hovelominao indray va izahay, mba hifalian’ny vahoakanao aminao?

⁸ Ry Iaveh, asehoy anay ny hatsaram-ponao, ary omeo anay ny famonjenao.

⁹ Te hihaino izay holazain’i Iaveh Andriamanitra aho, - fa manana teny fiadanana ho an’ny vahoakany sy ny mpino Azy Izy, raha tahiny tsy miverina amin’ny fahadalany indray izy ireo. -

¹⁰ Eny, akaiky an’izay matahotra Azy ny famonjeny, ary hitoetra amin’ny tanintsika indray ny voninahitra.

¹¹ Efa hihaona ny hatsaram-po sy ny fahamarinana, hifandray tanana ny rariny sy ny fihavanana.

¹² Hitsimoka amin’ny tany, ny fahamarinana, ary hitsinjo ny rariny any ambonin’ny lanitra.

¹³ Tenan’i Iaveh no hanome ny soa rehetra ka hahavokatra ny vokany ny tanintsika.

¹⁴ Handeha eo alohany ny rariny, sy hanoritra lalana hodiaviny.