Salamo 5 - Baiboly Katolika

SALAMO 5 Vavaka maraina

¹ Ho an’ny mpampianatra hira. Amin’ny sodina. Salamon’i Davida .

² Mampandria ny sofinao amin’ny teniko, ry Iaveh, henoy ny sentosentoko.

³ Atreho ny fitarainako, ry Mpanjakako sy Andriamanitro, fa Ianao no andefasako ny fivavahako.

⁴ Iaveh ô! vao maraina dia mandre ny feoko Ianao; vao maraina dia atolotro Anao ny faniriako ka miandry aho.

⁵ Fa Ianao tsy mba Andriamanitra mankasitraka ny ratsy; ny mpanota tsy afaka hiara-kitoetra Aminao.

⁶ Ny adala tsy mety haharitra eo imasonao; ny mpanao ratsy hàlanao avokoa.

⁷ Ny mpiteny lainga aringanao; ny mpandatsa-dra ama-mpamitaka, halan’i Iaveh.

⁸ Ary ny amiko, noho ny famimdram-ponao lehibe, dia handeha ho ao an-tranonao aho; hiankohoka manatrika ny tempolinao masina amim-pahatahorana Anao aho.

⁹ Tompo ô, tariho amin’ny fahamarinanao aho, noho ireo fahavaloko, ataovy marina amin’ny diako ny lalanao.

¹⁰ Fa eo am-bavany, tsy mba misy fahatsorana; ny fony tsy misy afa-tsy faharatsiana; ny tendany, fasana misokatra; ataony malefadefaka ny lelany.

¹¹ Faizo izy, Andriamanitra ô! Aoka tsy hahavanona ny hevitra kasainy izy; noho ny helony tsy hita isa dia adabohy izy ireo, satria tafaodina aminao.

¹² Dia hifaly kosa izay rehetra miantehitra Aminao; hafaliana tsy mety tapaka ny azy; dia hiaro azy Ianao; hibitabitaka amin-kafaliana izay tia ny Anaranao.

¹³ Fa mitahy ny marina Ianao, ry Iaveh, Ataonao manodidina azy, toy ny ampinga, ny fankasitrahana.