Salamo 3 - Baiboly Katolika

SALAMO 3 Antso vao maraina ataon’ny olo-marina enjehina

¹ Tononkiran’i Davida; fony izy nandositra teo anatrehan’i Absalôma zanany .

² Ry Iaveh ô, akory izato hamaroan’ny fahavaloko! Endrey ity habetsahan’ireo mitsangan-kamely ahy!

³ Maro ny milaza ny amiko manao hoe: «Tsy misy famonjena ho azy intsony eo amin’Andriamanitra!» - Selà

⁴ Kanefa, ry Iaveh, Ianao no ampingako; Ianao no voninahitro sy manandratra ny lohako.

⁵ Miantso an’i Iaveh amin’ny feoko aho, dia mamaly ahy any an-tendrombohiny masina Izy. - Selà

⁶ Nandry aho dia natory; nifoha indray aho, fa i Iaveh no tohako.

⁷ Tsy matahotra aho, eo anoloan’ny vahoaka tsy tambo isaina, izay mivangongo manodidina ahy hatraiza hatraiza.

⁸ Mitsangàna, ry Iaveh ô! Vonjeo aho, ry Andriamanitro! Fa Ianao no mamely ny takolaky ny fahavaloko rehetra; Ianao no manorotoro ny nifin’ny ratsy fanahy.

⁹ An’i Iaveh ny famonjena! Ho amin’ny vahoakanao anie ny fanambinanao! - Selà