Salamo 145 - Baiboly Katolika

SALAMO 145 (Volgata 144) Fiderana an’i Iaveh Mpanjaka Alef

¹ Sitrako ny mankalaza Anao, ry Andriamanitro Mpanjaka ô, sy ny misaotra ny Anaranao mandrakizay doria.

Bet

² Sitrako ny misaotra Anao isan’andro, sy ny mankalaza ny Anaranao mandrakizay doria!

Gimel

³ Lehibe i Iaveh ka mendrika ny fiderana rehetra, ary tsy takatry ny saina ny fahalehibeazany!

Dalet

⁴ Ny taona rehetra samy hilaza amin’izay mandimby azy ny fiderana ny asanao; hitory ny fahagagana nataonao ny olona.

He

⁵ Hihira ny famirapiratan’ny fiandriananao be voninahitra aho, sy ny asanao mahagaga.

Vao

⁶ Horesahin’ny olona ny herinao mahatahotra; ary hotantaraiko ny fahalehibeazanao.

Jain

⁷ Hambaran’ny olona ny fahatsiarovana ny hatsaram-ponao lehibe indrindra, ary hankalazainy ny fahamarinanao.

Het

⁸ Mamindra fo sy miantra i Iaveh, ary mahari-po sy feno hatsaram-po.

Tet

⁹ Tsara fo amin’ny olona rehetra i Iaveh, ary mihatra amin’ny zava-boaariny rehetra ny famindram-pony.

Iôd

¹⁰ Midera Anao avokoa ny asanao rehetra, ry Iaveh, ary misaotra Anao ny mpino Anao.

Kaf

¹¹ Milaza ny voninahitry ny fanjakanao izy, ary mitory ny fahefanao;

Lamed

¹² mba hampahalalàny ny zanaky ny olona ny asany mahagaga, sy ny famirapiratry ny fanjakany be voninahitra.

Mem

¹³ Fanjakana mandrakizay ny fanjakanao, ary maharitra amin’ny taona rehetra ny fanapahanao.

Samek

¹⁴ Manohana an’izay rehetra lavo i Iaveh, ary mampitraka an’izay rehetra mitanondrika.

Ain

¹⁵ Mitodika miandry Anao ny mason’ny zavatra rehetra, ary omenao izay haniny amin’ny fotoany izy.

Fe

¹⁶ Sokafanao ny tananao, dia vokisanao soa avy aminao ny miaina rehetra.

Tsade

¹⁷ Marina amin’ny lalany rehetra i Iaveh, ary mamindra fo amin’ny asany rehetra.

Kôf

¹⁸ Eo akaikin’izay rehetra miantso Azy I Iaveh, dia izay rehetra miantso Azy amin’ny fony tokoa.

Resh

¹⁹ Manatanteraka ny fanirian’izay matahotra Azy Izy, mihaino ny fitarainany sy mamonjy azy.

Shin

²⁰ Miambina izay rehetra tia Azy i Iaveh, ary mandringana ny ratsy fanahy rehetra.

Tao

²¹ Aoka ny vavako hitory fiderana an’i Iaveh, ary ny nofo rehetra hisaotra ny Anarany masina mandrakizay doria!