Salamo 130 - Baiboly Katolika

SALAMO 130 (Volgata 129) Vavaka ao anatin’ny fahoriana

¹ Fihirana fiakarana. Ato ambody hantsana aho no miantso anao, ry Iaveh, Tompo ô, henoy ny feoko;

² aoka ny sofinao anie hihaino ny feon’ny fivavahako.

³ Raha mitana ny fahatsiarovana ny heloka Ianao, ry Iaveh, iza no haharitra, Tompo ô?

⁴ Fa ao aminao ny famelan-keloka, mba hanajan’ny olona Anao.

⁵ Manantena an’i Iaveh aho, manantena ny fanahiko, ary miandry ny teniny aho.

⁶ Maniry ny Tompo ny fanahiko, mihoatra noho ny anirian’ny mpiambina ny fipoahan’ny andro.

⁷ Apetraho amin’i Iaveh ny fitokianao, ry Israely, fa ao amin’i Iaveh no misy ny famindram-po; ao aminy no misy fanafahana mihoa-pampana.

⁸ Izy no hanavotra an’i Israely amin’ny helony rehetra.