Salamo 126 - Baiboly Katolika

SALAMO 126 (Volgata 125) Hira rehefa mody

¹ Fihirana fiakarana Fony i Iaveh nampody ny voababon’i Siôna, dia toa nofy izany ho antsika.

² Tamin’izany ny vavantsika nanao hobin-kafaliana, ny lelantsika nanao hira firavoravoana. Fahizay izao no ambentinteny amin’ny firenena: «Nanao zava-dehibe ho azy ireo i Iaveh.»

³ Eny, nanao zava-dehibe ho antsika tokoa i Iaveh; ka revon-kafaliana isika.

⁴ Iaveh ô, avereno ny anay voababo, toy ny ampandehananao ny ranon-driaka ao amin’ny Negeba.

⁵ Izay mamafy amin-dranomaso, hijinja amin-kafaliana.

⁶ Mandeha izy, mandeha amim-pitomaniana, mitondra sy mamafy ny voa famafiny. Hiverina kosa izy manao hobin-kafaliana, mitondra ny amboara avy amin’ny fijinjàny.