Ohabolana 25 - Baiboly Katolika

5. AMBOARAN’OHABOLAN’I SALÔMÔNA, HAFA Lanjalanjao ny teny sy ny atao

¹ Izao koa no ohabolan’i Salômôna, nangonin’ny olon’i Ezekiasa, mpanjakan’i Jodà.

² Voninahitr’Andriamanitra ny manafin-javatra, fa voninahitry ny mpanjaka kosa ny mandini-javatra.

³ Ny lanitra amin’ny haavony, ny tany amin’ny halaliny, ary ny fon’ny mpanjaka, samy zavatra tsy azo takarina.

⁴ Esory ny taim-bolafotsy, dia hisy hanaovana fanaka hataon’ny mpanao anidina.

⁵ Esory ny ratsy fanahy eo anoloan’ny mpanjaka. dia hiorina mafy ny seza fiandrianany amin’ny fahamarinana.

⁶ Aza manao endrika miavonavona eo anatrehan’ny mpanjaka, ary aza mipetraka eo amin’ny fitoeran’ny lehibe;

⁷ Fa aleo ny olona no hilaza aminao hoe: Miakara atỳ; toy izay ianao no haetry eo imason’ny andriana, izay efa hitanao maso.

⁸ Aza dia faingam-panohitra foana, fandrao tsy mahita izay hatao ianao amin’ny farany.

⁹ Raha naniratsira anao ny namanao, dia tohano ny adinao amin’ny namanao,

¹⁰ fa aza manambara ny zavatra miafin’ny olon-kafa, fandrao mahasafo-kenatra anao, izay mandre izany, ka tsy ho afaka aminao ny fahafaham-baraka.

¹¹ Toy ny paoma volamena eo amin’ny ravaka voasikotra amin’ny volafotsy, ny teny atao amin’ny antony.

¹² Toy ny kavim-bolamena amam-piravaka volamena tsara, ny olon-kendry mananatra olona manan-tsofina mihaino tsara.

¹³ Toy ny fangatsiatsiakan’ny oram-panala amin’ny taom-pijinjana, ny iraka mahatoky amin’izay naniraka azy: mamelombelona ny fanahin’ny tompony izy.

¹⁴ Fa toy ny rahona aman-drivotra tsy misy orana kosa, ny olona mirehaka amin’ny fanatitra hosoka.

¹⁵ Ny fahari-po mety hampiekena ny mpitsara; ary ny vava malefaka, mahafolaka ny taolana.

¹⁶ Raha tojo tantely ianao, ny sahaza anao ihany hanina, fandrao voky azy ianao, ka handoa azy indray.

¹⁷ Aza mateti-piavy ao an-tranon’ny namanao, fandrao tofoka anao izy, ka hankahala anao.

¹⁸ Kanonta aman-tsabatra ary zana-tsipìka maranitra; toy izany ny olona mitsangan-kiampanga tsy marina ny namany.

¹⁹ Nify tapatapaka sy tongotra mibolisatra, dia toy izany no fitokiana ny mpamadika, amin’ny andron’ny fahoriana.

²⁰ Toy ny miala lamba amin’ny andro mangatsiaka, na manisy vinaingitra amin’ny sirahazo, ny manao kalokalo amin’ny malahelo am-po.

²¹ Raha noana ny fahavalonao, omeo mofo hohaniny, raha mangetaheta izy, omeo rano hosotroiny;

²² fa amin’izany ianao hanangona vainafo ho eo an-dohany; ary i Iaveh hamaly soa anao.

²³ Ny rivotra avy avaratra miteraka orana; ny lela mpifosa kosa, mampahasosotra endrika.

²⁴ Aleo mitoetra eny an-joron-tafon-trano, toy izay miara-mipetraka amin’ny vehivavy tia ady.

²⁵ Rano mangatsiaka ho an’ny olona mangetaheta, toy izany ny filazan-java-tsoa, avy any an-tany lavitra.

²⁶ Fantsakana voatsikebona, loharano voaloto, toy izany ny marina mangozohozo eo anoloan’ny ratsy fanahy.

²⁷ Tsy mety ny mihinan-tantely betsaka, toy izany koa ny mitady hahatakatra ny fiambonian’Andriamanitra, fa ho resin’ny voninahiny.

²⁸ Tanàna efa afaka ny fahavalo ka tsy misy manda, toy izany ny olona tsy mahay mifehy tena.