Ohabolana 11 - Baiboly Katolika

Ny mahitsy fo sy ny ratsy fo

¹ Ny mizàna mandainga, dia ankahalain’i Iaveh, fa ny lanja marina no ankasitrahiny.

² Raha tonga ny fiavonavonana, ho tonga koa ny fahafaham-baraka; fa ny fahendrena kosa miaraka amin’ny manetry tena.

³ Ny fahatsoran’ny olo-mahitsy fo mitari-dalana azy, fa ny fiolikoliky ny mpamadika kosa, mandringana azy.

⁴ Ny harena tsy mahasoa amin’ny andron’ny fahatezerana; fa ny fahamarinana no manafaka amin’ny fahafatesana.

⁵ Ny fahamarinan’ny marina, manitsy ny lalany, fa ny ratsy fanahy kosa lavo noho ny faharatsiany.

⁶ Ny fahamarinan’ny olo-mahitsy fo mamonjy azy; fa ny olona mpivadika kosa, voafandriky ny haratsiany.

⁷ Rehefa maty ny ratsy, foana ny fanantenany; ary levona ny fanantenan’ny mpanao ratsy.

⁸ Ny marina vonjena ho afa-pahoriana; fa ny ratsy fanahy no hilatsaka hisolo azy ao.

⁹ Ny tsy mivavaka manomana ny fandringanana ny namany, amin’ny vavany; fa ny marina dia hovonjena amin’ny fahaizana.

¹⁰ Mifaly ny tanàna, raha sambatra ny marina; mihoby hafaliana ny olona, raha ringana ny ratsy fanahy.

¹¹ Ny tso-dranon’ny olo-mahitsy fo no androsoan’ny tanàna, fa ny vavan’ny ratsy fanahy mandrava aza.

¹² Tsy ampy saina izay manamavo ny namany, fa ny manan-tsaina mangina.

¹³ Ny mpifosa manambara ny zavatra afenina; fa ny olona mahatoky kosa, mitana izany tsy hiseho.

¹⁴ Rava ny vahoaka tsy misy mpitondra; fa ny hamaroan’ny mpanolo-tsaina foto-pamonjena.

¹⁵ Izay miantoka olon-tsy fantany, ho tratry ny nenina; fa izay malain-kiantoka, dia handry feizay.

¹⁶ Ny vehivavy mahafinaritra, mahazo voninahitra; ny lehilahy mahery fo, mahazo harena.

¹⁷ Ny olona antra namana, manao soa amin’ny fanahiny; fa ny olona loza be, mampahory ny nofony.

¹⁸ Ny ratsy fanahy manao lahasa manodòka, fa izay mamafy fahamarinana kosa dia efa azo antoka ny valiny.

¹⁹ Ny fahamarinana mahatonga amin’ny fiainana; fa izay manenjika ny haratsiana iharam-pahafatesana.

²⁰ Halan’i Iaveh ny olona ratsy fo, fa izay tsy manan-tsiny amin’ny lalany dia ankasitrahiny.

²¹ Eny tokoa tsy ho afa-tsazy ny ratsy fanahy, ary ny taranaky ny marina ho voavonjy.

²² Toy ny kavim-bolamena eo amin’ny oron-kisoa, ny vehivavy tsara tarehy tsy ampy saina.

²³ Ny soa ihany no hany irin’ny marina; fa ny hotezerana kosa no andrasan’ny ratsy fanahy.

²⁴ ity mahafoy an-kazavam-po moa, mitombo harena; fa itsy fatra-pitsitsy, vao mainka mahantra.

²⁵ Ny fanahy manao soa, hohatavezina; ary izay manondraka dia hotondrahana koa.

²⁶ Izay tsy mamoaka ny variny ozonin’ny vahoaka, fa ny lohan’izay mivarotra azy no idinan’ny tso-drano.

²⁷ Izay mikatsaka ny tsara mahazo fanambinana, fa izay mitaky ny ratsy, ho tratry ny ratsy.

²⁸ Ho lavo izay mitoky amin’ny harena, fa hitsimoka toy ny ravina kosa ny marina.

²⁹ Izay manakorontana ny tranony, handova rivotra, ary izay adala, ho tonga mpanompon’ny olon-kendry.

³⁰ Hazon’aina no vokatry ny marina; ary hendry izay mahazo ny fanahin’olona.

³¹ Raha ny marina aza, valiana sazy atỳ an-tany; mainka ny ratsy fanahy sy ny mpanota.