Nomery 2 - Baiboly Katolika

Filaharan’ny foko

¹ Ary niteny tamin’i Môizy i Iaveh nanao hoe:

² «Ny zanak’i Israely dia samy hitoby eo akaikin’ny fanevany, sy ho eo am-pototry ny sainan’ny fokom-pianakaviany avy. Manandrify sy manodidina ny trano lay fihaonana no hitobian’izy ireo.»

³ Ny fanevan’ny tobin’i Jodà no hiorin-dasy eo anoloany eo amin’ny lafiny atsinanana mbamin’ny antokony avy. Ny filohan’ny taranak’i Jodà dia i Nahasôna zanak’i Aminadaba,

⁴ ary 74.600 ny antoko-miaramilany araka ny lehilahy voaisa.

⁵ Ny fokon’i Isakara no hitoby eo anilany. Ny filohan’ny taranak’i Isakara dia i Natanaely zanak’i Soara,

⁶ ary 54.400 ny antoko-miaramilany, araka ny lehilahy voaisa.

⁷ Manaraka izany dia ny fokon’i Zabolôna. Ny filohan’ny taranak’i Zabolôna dia i Eliaba zanak’i Helona,

⁸ ary 57.400 ny antoko-miaramilany araka ny lehilahy voaisa.

⁹ Araka ny lehilahy voaisa dia 186.400 no totalin’ny eo amin’ny tobin’i Jodà, araka ny antokony avy. Ireo no ho lohalalana rehefa hiainga.

¹⁰ Ny fanevan’ny tobin-dRobena no ho eo amin’ny lafiny atsimo mbamin’ny antokony avy. Ny filohan’ny tarana-dRobena dia i Elizora zanak’i Sedeora.

¹¹ Ary 46.500 ny antoko-miaramilany, araka ny lehilahy voaisa.

¹² Ny fokon’i Simeôna no hitoby eo anilany. Ny filohan’ny taranak’i Simeôna, dia i Salamiela zanak’i Sorisadaia;

¹³ ary 59.300 ny antoko-miaramilany, araka ny lehilahy voaisa.

¹⁴ Manaraka izany dia ny fokon’i Gada. Ny filohan’ny taranak’i Gada dia i Eliazafa zanak’i Doela,

¹⁵ ary 45.650 ny antoko-miaramilany, araka ny lehilahy voaisa.

¹⁶ Ka dia 151.450 no totalin’ny eo amin’ny tobin-dRobena, araka ny lehilahy voaisa manaraka ny antokony avy. Ireo no ho laharana faharoa eny an-dalana.

¹⁷ Izay vao handroso ny trano lay fihaonana, ny antokon’ny Levita eo afovoan’ny toby rehetra. Ary araka ny filaharany eo an-dasy ihany no ho fandehany eny an-dalana koa, samy eo an-daharany manaraka ny fanevany avy.

¹⁸ Ny fanevan’i Efraima no ho eo andrefana, mbamin’ny antokony. Ny filohan’ny taranak’i Efraima, dia Elisamà zanak’i Amioda:

¹⁹ ary 40.500 ny antoko-miaramilany, araka ny lehilahy voaisa.

²⁰ Ny fokon’i Manase no hitoby eo anilany. Ny filohan’ny taranak’i Manase dia i Gamaliela zanak’i Fadasora,

²¹ ary 32.200 ny antoko-miaramilany, araka ny lehilahy voaisa.

²² Manaraka izany, dia ny fokon’i Benjamina. Ny filohan’ny taranak’i Benjamina dia i Abidàna zanak’i Jedeôna,

²³ ary 35.400 ny antoko-miaramilany, araka ny lehilahy voaisa.

²⁴ Ka dia 18.100 no totalin’ny eo amin’ny tobin’i Efraima, araka ny lehilahy voaisa, manaraka ny antokony avy. Ireo no laharana fahatelo eny an-dalana.

²⁵ Ny fanevan’ny tobin’i Dana no ho eo avaratra, mbamin’ny antokony. Ny filohan’ny taranak’i Dana dia i Ahiesera zanak’i Amisadaìa;

²⁶ ary 62.700 ny antoko-miaramilany, araka ny lehilahy voaisa.

²⁷ Ny fokon’i Asera no hitoby eo anilany. Ny filohan’ny taranak’i Asera dia i Fegiela zanak’i Okrana,

²⁸ ary 41.500 ny antoko-miaramilany, araka ny lehilahy voaisa.

²⁹ Manaraka izany dia ny fokon’i Neftalì. Ny filohan’ny taranak’i Neftalì dia i Ahira zanak’i Enàna,

³⁰ ary 53.400 ny antoko-miaramilany, araka ny lehilahy voaisa.

³¹ Ka dia 157.600 no totalin’ny eo amin’ny tobin’i Dana, araka ny lehilahy voaisa. Ireo kosa no ho vodilalana manaraka ny fanevany avy.

³² Ireo no isan’ny zanak’i Israely voasoratra tamin’ny fanisana azy, araka ny fokom-pianakaviany avy. 603.550 no totalin’ny lehilahy voaisa, voatokotoko isan-tobiny araka ny antoko-miaramilany avy.

³³ Tsy anisan’ny voaisa niaraka tamin’ny zanak’i Israely ny Levita, araka ny nandidian’i Iaveh an’i Môizy.

³⁴ Notanterahin’ny zanak’i Israely avokoa izay rehetra nandidian’i Iaveh an’i Môizy. Toy izany no nitobiany samy araka ny fanevany avy. Toy izany no nilaharany teo am-pandehanana araka ny fianakaviany avy sy ny tokom-pianakaviany avy.