Lioka 9 - Baiboly Katolika

Ny nanirahana ny 12 lahy

¹ Ary namory ny Apôstôly roa ambin’ny folo lahy i Jesoa ka nanome azy hery sy fahefana handroaka ny demony rehetra sy hanasitrana ny aretina.

² Ary naniraka azy hitory ny Fanjakan’Andriamanitra sy hanasitrana ny marary.

³ Dia hoy Izy taminy: «Aza mitondra na inona na inona any amin’izay halehanareo any, na tehina, na kitapo, na mofo, na vola, ary aza mitondra akanjo roa.

⁴ Ary na aiza na aiza trano hidiranareo, dia itoero mandra-pialanareo amin’izany tanàna izany.

⁵ Ary raha misy mandà tsy handray anareo, dia mialà amin’izany tanàna izany, ka na ny vovoka amin’ny tongotrareo aza dia ahintsano mba ho fiampangana azy ireo.»

⁶ Dia nandeha nitety vohitra ny mpianatra, ka nitory ny Evanjely sy nanasitrana hatraiza hatraiza.

I Herôda sy i Jesoa

⁷ Ary i Herôda tetrarka nandre izay rehetra nataon’i Jesoa ka tsy hitany be ihany izay hevitra,

⁸ fa ny sasany nanao hoe: «I Joany no nitsangan-ko velona avy any amin’ny maty,» ny sasany nilaza hoe: «I Elia no niseho,» ary ny sasany nanao hoe: «Ny anankiray tamin’ny mpaminany taloha no efa nitsangan-ko velona.»

⁹ Dia hoy kosa i Herôda: «Raha ny amin’i Joany, dia efa nasaiko notapahin-doha izy, ka iza indray àry izao olona reko manao zava-dehibe izao?» Dia naniry hahita Azy izy.

Ny niverenan’ny Apôstôly sy ny nampitomboana ny mofo

¹⁰ Ary rehefa niverina ny Apôstôly ka nilaza tamin’i Jesoa ny nataony rehetra, dia nentiny hitokana tany amin’ny tany mangingina akaikin’i Betsaida izy ireo.

¹¹ Nony nahare izany ny vahoaka dia nanaraka Azy. Noraisin’i Jesoa tsara izy ireo, notorotoroany ny amin’ny fanjakan’Andriamanitra, sady nositraniny ny marary.

¹² Efa ho hariva ny andro ka nanatona ny roa ambin’ny folo lahy nanao taminy hoe: «Ravao ny vahoaka handeha hitady fandriana sy hanina any amin’ny vohitra sy ny saha manodidina, fa atỳ an’efitra isika izao.»

¹³ Fa hoy Izy taminy: «Omeonareo hanina izy.» Dia namaly ireo nanao hoe: «Tsy manana afa-tsy mofo dimy sy hazandrano roa izahay, raha tsy hoe handeha hividy angaha izahay mba hisy hohanin’ireo vahoaka be ireo.»

¹⁴ Fa tokony ho dimy arivo lahy izy ireo. Dia hoy Izy tamin’ny mpianany: «Asaovy mipetraka mitsitokotoko dimampolo avy ny olona.»

¹⁵ Dia nataony izany, ka nasainy nipetraka daholo izy ireo.

¹⁶ Tamin’izay noraisin’i Jesoa ny mofo dimy sy ny hazandrano roa, dia niandrandra ny lanitra Izy ka nitso-drano azy, ary novakiny sy nozarainy tamin’ny mpianany, mba harosony eny anoloan’ny vahoaka.

¹⁷ Dia nihinana izy rehetra ka voky; ary nentina ny sombintsombiny sisa tsy lany ka nahafeno sobika roa ambin’ny folo.

Fiekem-pinoana nataon’i Piera

¹⁸ Indray andro, raha nivavaka tany amin’ny toerana mangingina Izy ka teo aminy koa ny mpianany, dia nanontany azy ireo Izy nanao hoe: «Ataon’ny vahoaka ho iza moa Aho?»

¹⁹ Ary namaly ireo ka nanao hoe: «Ny sasany manao hoe i Joany Batista, ny sasany milaza hoe i Elia, ary ny sasany manao hoe: ny anankiray amin’ny mpaminany taloha no nitsangana avy any amin’ny maty.»

²⁰ «Fa ianareo kosa, hoy Izy, mba manao Ahy ho iza?» Dia namaly i Piera ka nanao hoe: «I Kristin’Andriamanitra.»

Voalohany nanambaràn’i Jesoa ny hijaliany

²¹ Nefa norarany mafy izy ireo mba tsy hilazalaza izany amin’olona,

²² sady nampiany hoe: «Tsy maintsy hijaly mafy ny Zanak’olona, ka harian’ny loholona sy ny lehiben’ny mpisorona mbamin’ny mpanora-dalàna ary hovonoiny; fa hitsangan-ko velona avy any amin’ny maty amin’ny andro fahatelo.»

Ny tsy maintsy atao hanarahana an’i Jesoa

²³ Ary hoy koa Izy tamin’ny olona rehetra: «Raha misy te hanaraka Ahy, aoka izy handà ny tenany sy hitondra ny Hazofijaliany isan’andro ka hanaraka Ahy.

²⁴ Izay te hamonjy ny ainy dia hahavery azy, fa izay hahafoy ny ainy noho ny amiko no hahavonjy azy.

²⁵ Ary inona no soa azon’ny olona raha mahazo izao tontolo izao aza izy, nefa very ny tenany ka voaheloka izy?

²⁶ Fa izay menatra Ahy sy ny teniko, ho menatra azy koa ny Zanak’olona raha avy amin’ny voninahiny sy ny an’ny Rainy, ary ny an’ny Anjely masina.»

Efa ho avy ny Fanjakan’Andriamanitra

²⁷ «Izaho milaza marina aminareo fa ny sasany amin’izay eto dia tsy hanandrana ny fahafatesana, raha tsy efa mahita ny fanjakan’Andriamanitra.»

I Jesoa niova tarehy

²⁸ Rehefa tokony ho havaloana taorian’ny nilazany an’izany, dia nitondra an’i Piera sy i Jakôba ary i Joany Izy ka niakatra tany an-tendrombohitra mba hivavaka.

²⁹ Raha mbola nivavaka Izy, dia niova toetra ny Tarehiny sady tonga fotsy manjopiaka ny fitafiany.

³⁰ Ary indro nisy roa lahy niresaka taminy, dia i Môizy sy i Elia,

³¹ izay niseho tamim-boninahitra sy nilaza ny hahalasanany izay tsy maintsy ho tanteraka any Jerosalema.

³² Navesatry ny tory ny mason’i Piera sy ny namany, nefa nahari-tory ihany izy, dia nahita ny voninahitr’i Jesoa mbamin’izy roalahy teo aminy.

³³ Ary tamin’izy roa lahy nihataka, dia hoy i Piera tamin’i Jesoa: «Ry Mpampianatra ô, mahafinaritra ny mitoetra atỳ, ka andeha hanangana lay telo eto, ny iray ho Anao, ny iray ho an’i Môizy, ary ny iray ho an’i Elia»; tsy fantany anefa izay nolazainy.

³⁴ Raha mbola niteny izany izy, dia nisy rahona nanarona azy ireo, ka natahotra izy telolahy tamin’ny nidirany tao anatin’ny rahona.

³⁵ Ary nisy feo avy tao amin’ny rahona nanao hoe: «Ity no Zanako malalako, henoy Izy.»

³⁶ Ilay niteny iny ny feo, dia i Jesoa irery ihany no hita. Ary nangina ireo mpianany ka tsy nilazalaza na tamin’iza na tamin’iza, tamin’izany andro izany, izay zavatra hitany teo.

Ilay voan’ny androbe azon’ny demony

³⁷ Nony ampitso, raha nidina avy tany an-tendrombohitra izy ireo, dia notsenain’ny vahoaka be i Jesoa.

³⁸ Dia nisy lehilahy anankiray tao amin’ny vahoaka niantso hoe: «Ry Mpampianatra ô, mihanta aminao aho, mba iantrao lahy ny zanako, dia ny zanako lahy tokana,

³⁹ fa azon’ny fanahy ratsy izy, ka vantany vao tongany dia midradradradra sady akapokapony mafy dia mafy ataony mandoa vory, ary tsy avelany raha tsy efa torovana erỳ.

⁴⁰ Nangataka tamin’ny mpianatrao aho mba handroaka azy, fa tsy nahafaka izy ireo.»

⁴¹ Ary namaly i Jesoa ka nanao hoe: «Ry taranaka tsy mino sady ratsy fanahy, mandra-pahoviana no hitoerako aminareo sy handeferako aminareo? Ento atỳ ny zanakao.»

⁴² Nony nanatona ilay zaza, dia nazeran’ny demony ka nakapony izaitsizy;

⁴³ fa norahonan’i Jesoa ny fanahy maloto, dia nositraniny ilay zazalahy ka nomeny an-drainy.

⁴⁴ Dia talanjona izy rehetra noho ny halehiben’Andriamanitra. Ilay mbola gaga tamin’izay rehetra nataon’i Jesoa iny izy rehetra, dia hoy Izy tamin’ny mpianany: «Alatsaho tsara ao amin’ny sofinareo izao rehetra izao, satria tsy maintsy atolotra ao am-pelatanan’ny olona ny Zanak’olona.»

Fanindroany nanambaràn’i Jesoa ny hijaliany

⁴⁵ Fa tsy azon’izy ireo izany teny izany, fa takona taminy ka tsy fantany, sady tsy sahy nanontany Azy ny amin’izany izy.

Iza no lehibe indrindra?

⁴⁶ Ary nisy hevitra tonga tao an-tsain’ireo, dia ny amin’izay lehibe aminy.

⁴⁷ Fantatr’i Jesoa ny hevitra tao am-pony, ka naka zaza kely anankiray Izy napetrany teo anilany,

⁴⁸ dia hoy Izy tamin’izy ireo: «Na iza na iza mandray itony zazakely itony amin’ny Anarako dia mandray Ahy, ary na zovy na zovy mandray Ahy dia mandray Ilay naniraka Ahy; fa izay kely indrindra eo aminareo rehetra dia izy no lehibe.»

Fampiasana ny Anaran’i Jesoa

⁴⁹ Dia niteny i Joany nanao hoe: «Ry Mpampianatra ô, nahita olona anankiray nandroaka demony tamin’ny Anaranao izahay, ka noraranay, satria tsy namantsìka izy»;

⁵⁰ fa hoy i Jesoa taminy: «Aza rarana, fa izay tsy manohitra anareo dia momba anareo.»

IV. NY NIAKARANA HO ANY JEROSALEMA Ratsy fandray, ilay vohitra tao Samaria

⁵¹ Ary nony efa antomotra ny andro tsy maintsy hanalana Azy, dia nanapa-kevitra hankany Jerosalema Izy,

⁵² ka nandefa iraka nialoha Azy. Dia nandeha ireo ka niditra tao amin’ny tanàna anankiray tany amin’ny Samaritanina, mba hanomana ny fandraisana Azy;

⁵³ fa tsy nisy nandray azy ny olona, satria olona hankany Jerosalema no fijeriny Azy.

⁵⁴ Nony nahita izany i Jakôba sy i Joany mpianany dia nanao hoe: «Tompoko, tianao va raha asainay ilatsahan’ny afo avy any an-danitra izy handevona azy?»

⁵⁵ Fa nitodika Izy ka nananatra azy mafy hoe: «Tsy fantatrareo mantsy izay tokony ho fanahinareo.

⁵⁶ Ny Zanak’olona anie tsy tonga hamery olona fa hamonjy azy.» Dia nankany amin’ny vohitra hafa izy ireo.

Ny takin’ny fiantsoana ho Apôstôly

⁵⁷ Raha mbola teny an-dalana izy ireo, dia nisy olona anankiray nilaza taminy hoe: «Hanaraka Anao aho, na aiza na aiza halehanao.»

⁵⁸ Fa hoy i Jesoa taminy: «Ny amboadia manan-davaka, ary ny voromanidina manana akany; fa ny Zanak’olona tsy mba manana izay hampandriany ny lohany.»

⁵⁹ Ary hoy Izy tamin’ny anankiray hafa: «Manaraha Ahy.» Dia izao no navalin’io: «Aoka aloha, Tompoko, handevina ny raiko aho.»

⁶⁰ Fa hoy i Jesoa taminy: «Avelao ny maty handevina ny maty ao aminy, fa ianao kosa mandehana mitory ny fanjakan’Andriamanitra.»

⁶¹ Dia nisy iray hafa koa nanao taminy hoe: «Hanaraka Anao aho, Tompoko, fa aoka aloha hanao veloma ny ao an-tranoko aho.»

⁶² Fa hoy i Jesoa taminy: «Rehefa mety ho mpitana angadin’omby miherika, dia tsy sahaza ny fanjakan’Andriamanitra.»