Tôbita 9 - Baiboly Katolika Baiboly Katolika
Tôbita 9

¹ Ary tamin’izay dia nantsoin’i Tobia ho any aminy ity Anjely nataony ho olombelona ihany, ka hoy izy taminy: «Ry Azariasa rahalahiko, masìna ianao, henoy kely ny teniko;

² na dia hanolo-tena ho andevonao aza aho, mbola tsy ho ampy fankasitrahana ny fikarakarana rehetra nataonao.

³ Kanefa ity mbola misy zavatra anankiray angatahiko aminao koa: Makà biby mpitondra entana sy mpanompo koa, ka mandehana mankany amin’i Gabelosa, any Ragesa, tanànan’i Meda; avereno aminy ity sorany ity, dia raiso ny vola any aminy, ary angataho izy ho atỳ amin’ny fampakaram-badiko.

⁴ Satria ny tenanao mahalala fa isain’i dada ny andro, ka na tratra aoriana indray andro monja aza aho, dia vonton’alahelo ny fony.

⁵ Hitanao ihany koa anefa, ilay nataon-dRagoela niangavy mafy tamiko hijanona eto, ka tsy mahay mandà ny fiangaviany aho.»

⁶ Dia naka efa-dahy tamin’ny mpanompon-dRagoela i Rafaely, sy rameva roa, ka nankany Ragesa, tanànan’ny Meda. Nony nahita an’i Gabelosa izy, naveriny taminy ny taratasiny dia noraisiny avokoa ny vola;

⁷ ary nony efa notantarainy taminy avokoa ny zavatra rehetra tonga tamin’i Tobia, zanak’i Tobia, dia nitondra azy izy hiaraka aminy ho any amin’ny fampakaram-bady.

⁸ Nony niditra tao an-tranon-dRagoela i Gabelosa, indro eo am-pihinanana i Tobia, ka nitsangana niaraka tamin’izay izy, dia nifanoroka teo izy ireo, ary nitomany i Gabelosa vao nisaotra an’Andriamanitra nanao hoe:

⁹ «Hotahin’ny Andriamanitr’i Israely anie ianao, fa zanak’olona tsara fanahy loatra, marina sy matahotra an’Andriamanitra ary manao fiantrana betsaka.

¹⁰ Hitsororoka ho amin’ivadinao sy ireo ray aman-dreninao koa anie ny fitahiana.

¹¹ Ho hitanao anie ny zanakareo, sy ny zanaky ny zanakareo, hatramin’ny taranaka fahatelo sy fahefatra. Ary ny taranakareo anie hotahin’ny Andriamanitr’i Israely izay manjaka amin’ny taona mandrakizay.»

¹² Niara-namaly hoe: «Amen», izay rehetra teo, vao nipetraka hihinana, ary tamim-pahatahorana an’Andriamanitra no nanaovany ny fanasan’ny fampakaram-bady.