Yuda 1 - Osotua Ng'ejuk

¹ Yudas, osinga le Yesus Kristos, olalashe le Yakobos: too lelo ooipotoki, loonyorri tiatua Engai Papa lang', nerripi tiatua Yesus Kristos.

² Njeponari enkordunoto o eseriani o enyorrata too ndai.

³ Lanyor lainei, ore pashilaa naleng' asiraki ndai tʼolbae lʼenkitopuata ang' niking'ar, nemeata kata namadiding' ndai, peiye iaparere aamitu enkirukoto, naishooki nabo kata sinyat.

⁴ Amu etii kulekai tung'anak ooetuo aaisudunye, naa ninje ootisirieki neba opa ena kigwena, ajo era ninje lemeure Engai, neibelekeny eng'adunoto Engai eas entorroni, nemiki Engai, Olkitok obo, o Olaitoriani lang' Yesus Kristos.

⁵ Kake ayeu naitadamu ndai, oo ten aa iyololo mbaak pookin, ajo ore ena kata nabo eitopua Olaitoriani olorere aitungʼua olosho le Misri, near enkata e are kulo leitu eiruk.

⁶ Eibooko ninye baiki ilmalaikan leitu ebik tiatua enkitoria enye openy, kake lootung'aitie entonata enye, enkigwena engolong' kitok, peen ninje too ienat oo nkatan pookin tiabori enaimin.

⁷ Neijia si Sodom o Gomora o ngang'itie naataanikino, naataasa mbaak torrok oo nkiri nesuj engai kiring'o, eitaaki ninje enkiteng'enet, petum enkisiloto enkima oo nkatan pookin.

⁸ Neijia etiu si kulo aidetidetak oopik eng'iring'o ntibil, neany enkitoria, nemor looata enkitook.

⁹ Kake ore Mikael, ele malaika kitok, peishangarra o satan neirorie tʼolbae lʼosesen le Mose, nemeiteu atudung'o enkigwena emoroto shumata enye, kake etejo: Njoo kilaaki Olaitoriani!

¹⁰ Kake ore lelo oomor pookin nemeyolo; ore enayolou ninje tʼempukunoto enye anaa ng'wesi nemeata eng'eno, te ina erruoio.

¹¹ Kake aiya ninje, amu esujita ninje engoitoi e Kain, nebatatakino enkitapong'oroto e Bileam tʼolbae lʼendupoto, neimin tʼenkiposhiposharoto e Kora.

¹² Naa ninje ooata empiani too ndaikin enyorrata inyi, neinosisho meureisho, neitoti aten, netiu ninje anaa ng'atambo nemeata engare naanap ilkutat, nera iljanito oorony lukuny lemeata ilmomo, ootuata kat are, nedotuni too ntonat,

¹³ naa ninje anaa lopir pushunot lʼenaiposha ooiponyu enkurruna enye oopeny, lakir oopuaiya, ooitaanyaki erokan enaimin oo nkatan pookin.

¹⁴ Kake eibonishe si too lootiu nji Henok, ole opishana neba Adam, nejo: Ng'orai, elotu Olaitoriani te nebo o iip tomon kumok oo sinyat lenyena,

¹⁵ peigwenaki pookin neitalak lemeure Engai pookin tʼolbae loo nkitobirat pookin orregie lenye torrono naaitarruoitie o tʼolbae loo mbaak naagol pookin naaimakitia laitarruok torrok ninye.

¹⁶ Naa kulo ninje ooing'unyung'uny neishir oshi ake, nelimana too lng'warraitin lenye, neiro nkutukie enye mbaak sapuki olwuasa, nenyorraki aten too ltung'anak tʼolbae lʼendupoto ele maa.

¹⁷ Kake ore ndai, lanyor lainei, entadamutu kulo rorei ootang'asa aalimu lairriwak lʼOlaitoriani lang' Yesus Kristos,

¹⁸ enetiakitia ndai, aajo tʼenkata enkiting'oto epuo aatii lamorok oolimana too lng'warraitin lʼorregie lenye torrono.

¹⁹ Naa kulo ooau rishat nesuj mbaak osesen, nemeata nʼolmumua.

²⁰ Kake ore ndai, lanyor lainei, enteshetakinoto enkirukoto inyi sinyati naleng' tiatua Olmumua Sinyati, nisaishosho,

²¹ nirripirripi aten tiatua enyorrata Engai, nianyunyu enkordunoto Olaitoriani lang' Yesus Kristos narik atua empuan nemeiting'.

²² O kulekai looing'arrirro, eng'urrie, o kulekai, entopua iwuapupu ninje tiatua enkima, ning'urrierrie kulekai tʼeuriata; nimbaii si olkila otipikaki oloirerio lʼenkiringʼo.

²⁴ Ore ninye naidim atorripo ndai, miatata entibili, neitasheye ndai tʼengomom enkitook enye, miatata eleyata, tʼeng'ida kitok,

²⁵ naa ninye Engai nabo, Olaitopuani lang' te Yesus Kristos, Olaitoriani lang': njeishori ninye enkitook o emagilanishu o engolon o enkidimata taata oo metabaiki nkatan pookin. Amen.