Yohana 7 - Osotua Ng'ejuk

¹ Ore tekurum oo kuna nelimana Yesus te Galilaya; amu eitu eyeu nelimana te Yudaya, tiaraki naing'oru Yudayoi ninye, pear metua.

² Netaanu ngolong'i kituak oo Yudayoi, ngolong'i oo ltomboitie loo lkujit.

³ Nejoki lalashera ninye: Tung'ai ene, pilo Yudaya, peiye etum aatadol baiki laiteng'enuok linono nkyasin inono nintobir;

⁴ amu metii oloitobir entoki tiatua emikio neyeu nelioi tʼewuas. Teni intobir kuna, ntadua kion olmaa.

⁵ Amu eitu eiruk baiki lalashera lenyena ninye.

⁶ Akae, nejoki Yesus ninje: Epon eitu ebau enkata ai, kake eidipakine oshi enkata inyi.

⁷ Meidim olmaa atemena ndai, kake aamen nanu, tiaraki naijakenoki ninye, ajo era torrok nkyasin enyena.

⁸ Elepa ndai aapuo kuna olong'i kituak; epon mailep nanu alo kuna olong'i kituak, tiaraki epon eitu ebaia enkata ai.

⁹ Ore peidip atiaki ninje kuna, nebik te Galilaya,

¹⁰ Ore peidip lalashera lenyena aailepa aapuo ngolong'i kituak, neilep alo si ninye, me tʼewuas, kake tʼemikio.

¹¹ Akae, neing'oru Yudayoi ninye too ngolong'i kituak nejo: Kaji etii ele?

¹² Netii enking'unyung'uny kitok tʼolbae lenye atua siamin. Nejo ilkulekai: Era ninye supat; nejo ilkulekai: Me, amu eitamanimanaa esiamu.

¹³ Kake eitu eimaki oltung'ani o obo mbaak enyena tʼewuas tʼolbae lʼeuriata oo Yudayoi.

¹⁴ Ore tʼempolos oo ngolong'i kituak neilep Yesus alo engaji sinyati neiteng'enisho.

¹⁵ Akae, neiputukuny Yudayoi nejo: Kaji etayolounye ele sirat neitu eiteng'enuo ninye?

¹⁶ Akae, nealiki Yesus ninje nejo: Mera enkiteng'enare ai enai, kake nʼolaairriua.

¹⁷ Teni eyeu neitobir oltung'ani eyeunoto enye, neyolou mbaak enkiteng'enare, ten ake eing'ua Engai arashu ten ake alimu nanu te kion.

¹⁸ Ololimu te kion, neing'oru enkitook enye openy; oloing'oru enkitook oloirriua ninye, nesipa ele nemetii entorroni atua ninye.

¹⁹ Me Mose loishoo ndai nkitanapat? Nemetii o obo tiatua ndai loitobir nkitanapat. Ainyo piking'oruru aar matua?

²⁰ Nealu esiamu: Iata olmeneng'ani. Ang'ai liking'oru aar tua?

²¹ Nealu Yesus nejoki ninje: Aitobira enkyas nabo nimputukunyunyu pookin.

²² Onaa eishoo ndai Mose emurata, me tiaraki naing'ua Mose, kake loopapa; nimuratata ndai oltung'ani baiki tʼengolong' naeng'ieng'areki.

²³ Ore pemurati oltung'ani tʼengolong' naeng'ieng'areki, pemeari nkitanapat e Mose — ainyo pikigorokiki, tiaraki naitaa bioto oltungani olulung'a tʼengolong' naeng'ieng'areki?

²⁴ Emingwenaki too ngonyek, kake engwenakiti enkigwena supat.

²⁵ Akae, nejo ematua oo le Yerusalem: Me ele eing'oru ninje, pear metua?

²⁶ Naa eng'orai, eirorita ninye tʼewuas, nemeliki ninje ninye toki. Akae, ketayoloutuo ilkituak lang' tʼesipata, aajo era ele Kristos?

²⁷ Kake kiyolo yook ele eneing'ua; teni elotu Kristos, metii oloyolo eneing'ua.

²⁸ Akae, nedar Yesus tʼengaji sinyati, eiteng'enisho nejo: Ee, kiyololo ndai nanu niyololo enaing'ua, neitu alotu te kion, kake olosipa ele laairriua nanu, limiyololo ndai;

²⁹ kake ayolo nanu ninye, amu aing'ua nanu ninye, naa ele laairriua.

³⁰ Akae, neing'oru ninje, peibung' ninye, kake eitu eaki oltung'ani o obo ninye engaina, amu epon eitu ebau enkata enye.

³¹ Neiruk ilkumok tiatua esiamu ninye nejo: Teni elotu Kristos, keitobir ninye ilponot kumok oolang' kulo ooitobir ele?

³² Etoning'o Ilfarisayoi esiamu eing'oming'om kuna baak enyena, neirriwaa laidasak kituak o Ilfarisayoi laisyayak, peibung' ninye.

³³ Akae, nejo Yesus: Epon atii enkiti kata e nebo o ndai, nalo tekurum enetii olaairriua.

³⁴ Kipuopuo aaing'oru, nimikitumutumu; ore enatii nanu, nimindimidimi aaetu ndai.

³⁵ Akae, nejokino Yudayoi tiatua aten: Keibung' ele engoitoi alo aji, ajo mikintoki aatum ninye? kelo atua enkisardakata oo Lgrikini, pelaiteng'en Ilgrikini?

³⁶ Kalo rorei ele lotejo ninye: Kipuopuo aaing'oru, nimikitumutumu, o enatii nanu, nimindimidimi aaetu ndai?

³⁷ Ore tʼengolong' kitok enkiting'oto oo ngolong'i kituak neitashe Yesus nedar nejo: Oloata enkure njelotu enatii nanu, peok.

³⁸ Olaairuk nanu anaa pejo esirata, neiponyunye tʼosesen lenye moipoi engare naishiu.

³⁹ Eimaka ena aa mbaak Olmumua lopuo aang'amu looiruk ninve; amu epon metii Olmumua Sinyati, tiaraki nepon eitu eitaai Yesus kitok.

⁴⁰ Akae, ore pening' iltung'anak tiatua esiamu kulo rorei, nejo: Esipa, era ele olayolounoni.

⁴¹ Nejo ilkulekai: Ele lora Kristos; nejo ilkulekai: Kelotu naa Kristos eing'ua Galilaya?

⁴² Mejo esirata, ajo elotu Kristos tiatua eishoi e David eing'ua Betlehem, engang' natobikie David?

⁴³ Akae, nejing' atua olorere erishata tʼolbae lenye.

⁴⁴ Etayeutuo kulekai too ninje neibung' ninye; kake metii oltung'ani oaka ninye ngaik.

⁴⁵ Akae, nepuonu laisyayak enetii laidasak kituak o Ilfarisayoi, nejoki lelo ninje: Ainyo peitu irikuku ninye?

⁴⁶ Nealu laisyayak: Eitu aikata eiro oltung'ani o obo neijia anaa peiro ele tung'ani.

⁴⁷ Akae, nealiki Ilfarisayoi ninje: Keitamanimanaiyoki si ndai?

⁴⁸ Kang'ai tiatua ilkituak arashu tiatua Ilfarisayoi loiruk ninye?

⁴⁹ Kake el orere ake lemeyolo nkitanapat, njedeki ninje.

⁵⁰ Nejoki Nikodemos loewuo kiarie enetii ninye nera obo lenye ninje:

⁵¹ Keigwenaki nkitanapat ang' oltung'ani, epon eitu eng'asi aainining' ninye peyolouni enaitobira?

⁵² Nealu nejoki ninje ninye: Ing'ua si iye Galilaya? Tisipu, ng'orai, ajo mepuku olayolounoni aing'ua Galilaya.

⁵³ Neibung' oltung'ani pookin engoitoi nelo engaji enye.