Yohana 21 - Osotua Ng'ejuk

¹ Neitoki aitadol Yesus tekurum oo kuna kion laiteng'enuok tʼengalo olbalbal le Tiberias nelioi nji:

² Netii e nebo Simon Petros o Tomas, oipoti Olmaoi, o Natanael le Kana e Galilaya o nkera e Sebedayos o kulekai aare tiatua laiteng'enuok lenyena.

³ Nejoki Simon Petros ninje: Alarresh singir. Nejoki ninje ninye: Kipuo si yook te nebo o iye. Nepuku ninje neilepaki engalawa, neitu eibung' ninje te ina kiarie o toki.

⁴ Ore pekenyu, neitashe Yesus tʼembata olbalbal, kake eitu eyolou laiteng'enuok, aajo era Yesus.

⁵ Akae, nejoki Yesus ninje: Nakera, miatata eninyanya? Nealiki ninje: Me.

⁶ Nejoki si ninye ninje: Entanang'akiti erreshet ematua e tatene engalawa, nipuopuo aatum. Akae, nenang'aki, neitu eidim aateyetu ninje tʼolbae lʼenkumoi oo singir.

⁷ Akae nejoki ele aiteng'enuoni lotonyorra Yesus Petros: Era Olaitoriani! Akae, ore pening' Simon Petros, ajo era Olaitoriani, neenikino olkila, amu meishopo, nenang'akino atua olbalbal.

⁸ Kake eetuo kulekai aiteng'enuok tʼengalawa, amu melakwaniki enetoiyo, kake anaa entemet oo ngaik iip are, neyetu erreshet oo singir.

⁹ Akae, ore peipung'oki enetoiyo, nedol enkiturrurroto oo nkuk naaiwuwu, netii shumata enye singir oopejo o olmkate.

¹⁰ Nejoki Yesus ninje: Eautu ematua oo singir limbung'a taata!

¹¹ Neilep Simon Petros neyetu erreshet enetoiyo, ebore singir kituak iip o onom o okuni; ore etii ilkumok looba nji, neitu epolosa erreshet.

¹² Nejoki Yesus ninje: Ewotu, entadaata! Metii o obo tiatua laiteng'enuok oitewuo aikilikwana ninye:Ira iye ng'ai? Amu etayoloito, aajo era Olaitoriani.

¹³ Nelotu Yesus neibung' olmkate neisho ninje, neijia baiki singir.

¹⁴ Era ena en e uni, etalie Yesus too laiteng'enuok lenyena, eidipa atopiu aing'ua lootuata.

¹⁵ Akae, ore peidip endaata, nejoki Yesus Simon Petros: Simon le Yona, ke kinyor nanu nilang' kulo? Nejoki ninye: Ee, Laitoriani, iyolo, ajo aanyor iye. Nejoki ninye: Rrita mbalelon ainei!

¹⁶ Neitoki ajoki ninye en e are: Simon le Yona, ke kinyor nanu? Nejoki ninye: Ee, Laitoriani, iyolo, ajo aanyor iye. Nejoki ninye: Rrita ntare ainei!

¹⁷ Nejoki ninye en e uni: Simon le Yona, ke kinyor nanu? Neilish Petros, tiaraki natiaka ninye en e uni: Ke kinyor nanu? Nejoki ninye: Laitoriani, iyolo iye pookin niyolo, ajo aanyor iye. Nejoki Yesus ninye: Rrita ntare ainei!

¹⁸ Japa, japa, aaliki iye: Ore epon ira oti, nien kion nilimaniki eniyeu. Kake teni ilaaku moruo, nintorioo ngaik inono, nikilaen olekai nikilarik enimiyeu nilo.

¹⁹ Etejo ena, peitayolo ninye, ke ti aa kea elaitaa Engai kitok. Ore peidip atejo ena, nejoki ninye: Tusujaki!

²⁰ Neibelekenya Petros nedol olaiteng'enuoni onyor Yesus osujita, ninye loirrugokine olgoo lenye tʼendaata nejo: Laitoriani, kang'ai ele likintarasaa?

²¹ Akae, ore pedol Petros ele, nejoki Yesus: Laitoriani, o ele naa?

²² Nejoki Yesus ninye: Teni ayeu nebik ninye metabana nalotu — kainyo iataiye? Tusujaki iye nanu!

²³ Akae, nepuku ele rorei tiatua lalashera, ajo melae ele aiteng'enuoni. Kake eitu ejoki Yesus ninye: Melae ninye! kake: Teni ayeu nebik ninye metabana nalotu — kainyo iataiye?

²⁴ Era ele olaiteng'enuoni oijakenoki kuna nesir kuna, nikiyolo, aajo esipa enjakenishu enye.

²⁵ Etii baiki nkulie kumok naaitobira Yesus: ten emutu esiri ninje nabo nabo, ajo nanu, anaata meishaa enkop nkitabuni naapuoi aasir.