Yohana 2 - Osotua Ng'ejuk

¹ Ore tʼengolong' e uni neaku enkiama te Kana e Galilaya; netii ina alo ng'otonye e Yesus.

² Eipotoki baiki Yesus o laiteng'enuok lenyena tʼenkiama.

³ Ore peishunye olmarua, nejoki ng'otonye e Yesus ninye: Meata ninje olmarua.

⁴ Nejoki Yesus ninye: Nang'oroyoni, kainyo aataiye iye? Eton eitu enyiku enkata ai.

⁵ Nejoki ng'otonye enye laisyayak: Ore enaliki ninye ndai — entobira.

⁶ Netii ine motiok ile engare tʼorregie lʼenkisujare oo Yudayoi, nejing' nabo ntemeta are arashu uni.

⁷ Nejoki Yesus ninje: Enganya motiok engare! Neigany metabaiki mbiron.

⁸ Nejoki ninye ninje: Entooku taata, eakiti olkitok lʼenaraa! Neaki.

⁹ Ore peinyorrinyor olkitok lʼenaraa engare nataa olmarua, eitu eyolo eneing'ua, kake etayolo lelo aisyayak enetookunye engare, neipot olkitok lʼenaraa osanja

¹⁰ nejoki ninye: Eishoru oltung'ani pookin tʼenkata elukunya olmarua sidai, ore peidip aatemerata, neishoru olobebek, kake imboo iye olmarua sidai metabaiki taata.

¹¹ Era ninye olponoto lʼelukunya oitobira Yesus te Kana e Galilaya neitalioio enkitook enye; neiruk laiteng'enuok lenyena ninye.

¹² Ore tekurum e ina nedoiyo Kapernaum, ninye o ng'otonye enye o lalashera lenyena o laiteng'enuok lenyena, netoni te ina alo ngolong'i neme kumok.

¹³ Netaanu pasaka oo Yudayoi neilep Yesus alo Yerusalem,

¹⁴ neinepu tʼengaji sinyati etoni lamirak loo lmong'i o loo nkerra o loo lmaita o lagilak loo ngoshola,

¹⁵ neitobir enkeene too nkopit nemir pookin tiatua engaji sinyati, nkerra o ilmong'i, neibukoo mpesai oo lagilak loo ngoshola, neibelekeny ilkitareta,

¹⁶ nejoki kulo oomirita ilmaita: Entautu kuna te ina alo, emintaa engaji e Papa lai engaji enkinyang'a!

¹⁷ Nedamu laiteng'enuok lenyena, aajo etisiraki: Aainosa engilata e tau engaji ino.

¹⁸ Akae, nealu Yudayoi: Kalo ponoto intadol yook, tiaraki nintobir kuna?

¹⁹ Nealu Yesus nejoki ninje: Entigil ena aji sinyati, naitasheye ninye too ngolong'i uni.

²⁰ Akae, nejo Yudayoi: Eteshetaki ena aji too larin artam o ile, nintasheye iye ninye too ngolong'i uni?

²¹ Kake etejo ninye mbaak engaji sinyati osesen lenye.

²² Akae, ore peidip atopiu tiatua lootuata, nedamu laiteng'enuok lenyena, aajo etolimuo ena, neiruk esirata o rorei ootejo Yesus.

²³ Ore etii Yerusalem te pasaka, too ngolong'i kituak, neiruk ilkumok engarna enye edol ilponot lenyena ooitobira.

²⁴ Kake eitu eiruk Yesus ninje, tiaraki natayolouo pookin,

²⁵ neitu eyeunoi te ninye, peijakenu o obo embae oltung'ani; amu etayolouo ninye openy enatii atua oltung'ani.