Yohana 16 - Osotua Ng'ejuk

¹ Atiaka ndai kuna, pimirikaka.

² Nepuo aaitai ninje ndai tʼenkisot; kake ebau enkata, pejo oltung'ani pookin oar ndai entuata, ajo eisyayaki Engai.

³ Nepuo aaitobir ninje kuna, tiaraki nemeyolo Papa lai arashu nanu.

⁴ Kake atiaka ndai kuna, peiye, teni elotu enkata, pidamumu, aajo atiaka ndai kuna; eitu aliki ndai kuna neba tʼenkiterata, amu atii e nebo o ndai.

⁵ Kake alo taata enetii olaairriua nanu, nemetii o obo too ndai laaikilikwan: Kaji ilo?

⁶ Kake tiaraki natiaka ndai kuna, neigany enkilishoto iltauja linyi.

⁷ Kake aliki ndai esipata: Eaku too ndai, teni alo nanu. Amu teni malo, nemelotu olailejilejani enitiiti ndai; kake teni alo nanu, nalairriwaki ninye ndai.

⁸ Ore pelotu ninye, neitayolo ninye olmaa mbaak enkitarruoto o nʼesupato o nʼenkigwena:

⁹ Mbaak enkitarruoto, tiaraki nemaairuk nanu;

¹⁰ mbaak esupato, tiaraki nalo enetii Papa nimikintokiki aadol nanu;

¹¹ mbaak enkigwena, tiaraki naigwenakini olkitok lʼele maa.

¹² Epon aata nkumok naliki ndai, kake mindimidimi aatayolo taata.

¹³ Kake teni elotu ninye, Olmumua lʼesipata, nerik ninye ndai atua esipata pookin; amu melalimu ninye te kion, kake pookin naning' ninye, nelalimu ninye, neinosaki ndai mbaak naapuonu.

¹⁴ Aalaitaa ninye kitok, amu elang'amu naara nkun ainei, neinosaki ndai.

¹⁵ Ore pookin naata Papa, nera nkun ainei. Onaa atejo: Elang'amu naara nkun ainei, neinosaki ninye ndai.

¹⁶ Eng'or peno, nimikintokiki aadol nanu; neitoki ang'or peno, nikidolidolo nanu, amu alo enetii Papa.

¹⁷ Akae, nejokino ematua oo laiteng'enuok lenyena: Kainyo ena naliki ninye yook: Eng'or peno, nimikintokiki aadol nanu; neitoki ang'or peno, nikidolidolo nanu? o: Alo enetii Papa?

¹⁸ Akae, nejo ninje: Kainyo ena najo ninye: peno? Mikiyolo enajoito.

¹⁹ Neyolou, ajo etayeutuo ninje neikilikwan ninye, nejoki ninje: Inkilikwanaroro ndai ena tʼempolos inyi, tiaraki natejo: Eng'or peno, nimikintokiki aadol nanu; neitoki ang'or peno, nikidolidolo nanu.

²⁰ Japa, japa, aliki ndai: Ipuopuo aaishir ndai nioshiosho enkiliyo, nelang'ida olmaa; nepuoi aailishie ndai, kake elo aala enkilishoto inyi aaku eng'ida.

²¹ Teni eisho eng'oroyoni, neata enkilishoto, amu etabaua enkata enye; ore peidip atoiu enkerai, nemeitoki adamu osina tʼolbae lʼeng'ida, tiaraki natoikioki oltung'ani atua olmaa.

²² Akae, iatata ndai taata osina; kake aitoki aladol ndai, nepuo aang'ida ltauja linyi, nemetii o obo looru ndai eng'ida.

²³ Ore te ina olong' nimikipuopuo naikilikwan toki. Japa, japa, aliki ndai: Ore eniomonunu Papa lʼengarna ai, nelaisho ninye ndai.

²⁴ Eitu iomonunu metabaiki taata toki lʼengarna ai. Entoomonutu, nipuopuo aang'amu, pebaia eng'ida inyi.

²⁵ Atiaka ndai kuna too loyoteni; ebau enkata namaitoki airorie ndai too loyoteni, kake alainosaki ndai mbaak e Papa abaraki.

²⁶ Nipuopuo aaomonisho te ina olong' lʼengarna ai; majoki nanu ndai, ajo alasai nanu Papa tʼolbae linyi;

²⁷ amu enyor ndai Papa openy, tiaraki nikitonyorra nanu nirukuruku, aajo aewuo nanu aing'ua Engai.

²⁸ Atupukuo nanu te Papa nalotu atua olmaa; naitoki aing'ua olmaa nalo enetii Papa.

²⁹ Nejo laiteng'enuok lenyena: Ng'orai, irorita taata tʼembarakinoto nimiro oloyote o obo.

³⁰ Kiyolo taata, aajo iyolo pookin nemeaku te iye, pikinkilikwan oltung'ani; onaa kiruk, aajo iewuo ing'ua Engai.

³¹ Nealiki Yesus ninje: Irukuruku taata?

³² Eng'orai, ebau enkata, neidipa atabau, pipuopuo aaisardakakino, oltung'ani pookin ewueji enye, niking'uang'ua nanu openy; kake matii openy ake, amu etii Papa e nebo o nanu.

³³ Atiaka ndai kuna, pitumutumu aata eseriani te nanu. Iatata osina tiatua olmaa; kake entagoluoto, atigilua nanu olmaa.