Yohana 12 - Osotua Ng'ejuk

¹ Akae, ore eng'or ngolong'i ile, epon eitu ebau pasaka, nelotu Yesus Betania, enetii Lasaros loitopiwuo Yesus too lootuata.

² Akae, neitobiraki ninje ninye endaata te ina alo, neisyaisho Marta; nera Lasaros obo too kulo loototonitio tʼendaata te nebo o ninye.

³ Akae, neibung' Maria entulet eilata narropil nara sidai naleng' negol enkinyang'a, neelie Yesus nkejek nejut nkejek enyena too lpapit lenyena: neigany engaji erropili eilata.

⁴ Nejo Yudas Iskariotes, obo too laiteng'enuok lenyena, loyeu neitarasaa ninye:

⁵ Ainyo peitu emiri ena ilata too denaria iip uni, peishori laisinak?

⁶ Etejo ena, me tiaraki naing'urrie ninye laisinak, kake tiaraki nara olapurroni naa ninye olaibung'ani lʼenjumet oo ngoshola, nenap natanang'akaki atua.

⁷ Akae, nejo Yesus: Entapal ninye, amu etaa ena, peaku nʼengolong' enukare ai;

⁸ amu iatata laisinak oshi tiatua ndai, kake mikiatata nanu oshi.

⁹ Akae, neyolou esiamu kitok too Yudayoi, aajo etii ina alo, nepuonu me tʼolbae le Yesus ake, kake peiye edol Lasaros loitopiwuo ninye tiatua lootuata.

¹⁰ Neigwena laidasak kituak, peiye ear baiki Lasaros metua,

¹¹ amu eshomo tʼolbae lenye ilkumok tiatua Yudayoi neiruk Yesus.

¹² Eewuo tʼengai olong' esiamu kitok ngolong'i kituak; ore pening' ninje, aajo elotu Yesus Yerusalem,

¹³ neibung' ilng'osil loo ltuka neipung' aapuo aanang'are ninye nedar: Hosiana! Njeitadarari ololotu tʼengarna Olaitoriani o olkarsis le Israel!

¹⁴ Ore petum Yesus enkurrarru, neilepaki ninye, anaa petisiraki:

¹⁵ Miureisho, nairo Sion, ng'orai, elotu olkarsis lino, eton te shumata enkurrarru osikiria.

¹⁶ Neitu eyolou laiteng'enuok lenyena tʼenkata elukunya kuna, kake ore eitaaki Yesus kitok, nedamu ninje te ina kata, aajo kuna etisirakaki ninye naa kuna eitobirakitia ninje ninye.

¹⁷ Akae, neijakenu esiamu natii e nebo o ninye te ina kata naipoto Lasaros tʼenkurare neitopiu ninye too lootuata.

¹⁸ Onaa etutumore esiamu ninye, amu etoning'o, aajo eitobira ninye ele ponoto.

¹⁹ Akae, nejokino Ilfarisayoi: Idolitata, aajo mindimumu toki; eng'orai, esuj olmaa pookin ninye.

²⁰ Netii Ilgrikini looje too kulo looileputua, pepuo aasaisho too ngolong'i kituak;

²¹ akae, nepuonu kulo enetii Filipos le Betsaida e Galilaya, nesai nejo: Laitoriani, kiyeu nikidol Yesus.

²² Nelotu Filipos nejoki Andreas, nepuonu Andreas o Filipos nejoki Yesus.

²³ Nealiki Yesus ninje nejo: Etabaua enkata, peitaai Enkerai oltung'ani kitok.

²⁴ Japa, japa, aliki ndai: Teni medoiki embeu engano atua enkop nee, nebik ninye openy ake; kake teni ee, neiu ilmomo kumok.

²⁵ Olonyor empuan enye, neiminye ninye; naa oloiba empuan tiatua ele maa, nelarripoki ninye atua empuan nemeiting'.

²⁶ Teni eyeu naaisyayaki oltung'ani, njaasuj ninye nanu; ore enatii nanu, elatii ina alo baiki olaisyayani lai; olaaisyayaki nanu, neitaa Papa ninye kitok.

²⁷ Etung'uyane taata Olmumua lai. Naa kainyo ajo? Papa, ntopuaki te ina kata! Kake aewuo te ina atua ena kata.

²⁸ Papa, ntaa engarna ino kitok! Akae, nelotu oltoilo oing'ua shumata: Aidipa aitaa kitok naitoki alaitaa kitok.

²⁹ Akae, nejo esiamu naitashe te ine nening' kuna: Etaa enkikurrukurroto. Nejo ilkulekai: Olmalaika oirorie ninye.

³⁰ Nealu Yesus nejo: Me tʼolbae lai etaa ele toilo, kake tʼolbae linyi.

³¹ Etii taata enkigwena ele maa; eiturrakini taata olkitok lʼele maa boo.

³² Ore nanu, teni aapuni tʼena kop, nalayetu pookin enatii nanu.

³³ Kake etejo kuna, peitayolo ke ti aa kea elae.

³⁴ Akae, nealiki ninye esiamu: Kitoning'o yook tiatua nkitanapat, aajo ebik Kristos nkatan pookin; naa kaji inko teni ijo iye: Meata kata nemeapuni Enkerai oltung'ani? Kang'ai ina kerai oltung'ani?

³⁵ Nejoki Yesus ninje: Epon etii enkata kinyi enkilang'et empolos inyi. Entilimanata tʼena kata niatata enkilang'et, pemelus ndai enaimin. Ololimana tiatua enaimin, nemeyolo enelo.

³⁶ Ore tʼena kata niatata enkilang'et, eruko enkilang'et, pitumutumu aataa nkera enkilang'et.

³⁷ Etolimuo Yesus kuna nelo neisudori too ninje. Ore peidipa aitobira kulo ponot kumok nji tʼengomom enye, neitu eiruk ninje ninye,

³⁸ pebaia ororei lʼolayolouni Yesaya otejo: Kang'ai oiruk enkinosunoto ang'; Neitalioio engaina Olaitoriani te ng'ai?

³⁹ Onaa eitu eidim ninje aairuko, amu einyaaka ajo Yesaya:

⁴⁰ Eitaa ninye modook ngonyek enye neigen iltauja lenye, pemedolisho too ngonyek nemeyolou too ltauja neibelekenya, paishiunye ninje.

⁴¹ Etejo kuna Yesaya, tiaraki natadua enkitook enye nelimu mbaak enyena.

⁴² Neijia eiruko baiki ilkumok too lkituak ninye: kake eitu eibalu ninje tʼolbae loo Lfarisayoi, pemeitaini ninje tʼenkisot;

⁴³ amu etonyorra ninje enkitook oo ltung'anak nelang' enkitook Engai.

⁴⁴ Nedar Yesus nejo: Olaairuk nanu, maairuk nanu, kake eiruk olaairriua nanu;

⁴⁵ olaaing'oraa nanu, neing'oraa olaairriua nanu.

⁴⁶ Aewuo nanu, enkilang'et, atua olmaa, peiye mebik pookin laairuk nanu tiatua enaimin.

⁴⁷ Oloning' rorei lainei nemeibung' ninje, maigwenaki nanu ninye; amu eitu alotu nanu, paigwenaki olmaa, kake paitopok olmaa.

⁴⁸ Olaaiturraa nanu nemeng'amu rorei lainei, neata oloigwenaki ninye; neigwenaki ele rorei latolimuo nanu ninye tʼengolong' enkiting'oto.

⁴⁹ Amu eitu alimu nanu te kion, kake Papa laairriua nanu, ninye laaishoo enkitanapata enairorie o enalimunye.

⁵⁰ Nayolo, ajo era enkitanapata enye empuan nemeiting'; akae, enalimu nanu, nalimu neijia anaa paatiaka Papa.