Yohana 11 - Osotua Ng'ejuk

¹ Netii oltung'ani obo lomoi oji Lasaros le Betania, tʼengang' e Maria o ne Marta, enganashe enye.

² Nera Maria ena naela Olaitoriani tʼeilata narropil nejut nkejek enyena too lpapit lenyena; nemoi olalashe lenye Lasaros.

³ Akae, neirriwaa nganashera olkilikwai enetii ninye nejo: Laitoriani, ng'orai, emoi olinyor.

⁴ Ore pening' Yesus ena, nejo: Mera ena moiyan nʼenkea, kake nʼenkitook Engai, peitaai Oinoti lʼEngai kitok te ninye.

⁵ Etonyorra Yesus Marta o enganashe enye o Lasaros.

⁶ Akae, ore peidipa atoning'o, ajo emoi, nebik te ine wueji netii ngolong'i are.

⁷ Nejoki tekurum laiteng'enuok lenyena: Mainyaaki aapuo Yudaya!

⁸ Nejoki laiteng'enuok lenyena ninye: Laiteng'enani, king'orutua Yudayoi, pikinang' too soito, nintoki alo ina alo?

⁹ Nealu Yesus: Me saan tomon o are eata endama? Teni elimana oltung'ani dama, nemeikobi, tiaraki nadolita enkilang'et ele maa;

¹⁰ Kake teni elimana oltung'ani tʼenkiarie, neikobi, amu metii enkilang'et atua ninye.

¹¹ Etejo kuna, ore tekurum nejoki ninje: Eirure oljore lang' Lasaros; kake aibung' engoitoi, palainyeye ninye.

¹² Akae, nejoki laiteng'enuok lenyena ninye: Laitoriani, teni eirure, nelaishiu.

¹³ Kake eimaka Yesus mbaak enkea enye, nejo ninje, aajo eimaka mbaak enkirragata oo njok.

¹⁴ Akae, nejoki Yesus ninje te ine abaraki: Etua Lasaros,

¹⁵ kake ang'ida tʼolbae linyi, tiaraki neitu atii ina alo, pitumutumu aairuko. Kake maapeti enetii ninye!

¹⁶ Akae nejoki Tomas, oji Olmaoi, kulekai aiteng'enuok: Maapeti si yook, pikie te nebo o ninye.

¹⁷ Akae, ore pelotu Yesus, neinepu ninye eidipa atobiko ngolong'i ong'wan tiatua enkurare.

¹⁸ Netaaniki Betania Yerusalem anaa stadia tomon o imiet.

¹⁹ Neetuo ilkumok too Yudayoi enetii Marta o Maria, peiye eilejilej ninje tʼolbae lʼolalashe lenye.

²⁰ Akae, ore pening' Marta, ajo elotu Yesus, nelanang'are ninye; neton Maria tiatua aji.

²¹ Akae, nejoki Marta Yesus: Laitoriani, ten emutu itii ene, anaata eitu ee olalashe lai!

²² Kake ayolo baiki taata, ajo pookin niomonu Engai, nikinjo Engai.

²³ Nejoki Yesus ninye: Elapiu olalashe lino.

²⁴ Nejoki Marta ninye: Ayolo, ajo elapiu tʼenkitopiunoto engolong' enkiting'oto.

²⁵ Nejoki Yesus ninye: Ara nanu empiunoto o empuan; olaairuk nanu, nelaishiu, baiki teni ee;

²⁶ naa pookin loishiu naairuk nanu, nemee tukul nkatan pookin. Iruk ena?

²⁷ Nejoki ninye: Ee, Laitoriani, airuko nanu, ajo ira iye Kristos, Oinoti lʼEngai, oewuo atua olmaa.

²⁸ Ore peidip atejo kuna, nelo neipot Maria, enganashe enye, tʼemikio nejo: Etabaua Olaitoriani, kimpot.

²⁹ Ore pening' ninye ena, nedumunye asioki alo enetii ninye;

³⁰ amu epon eitu ebau Yesus engang', kake epon etii ene wueji netutumore Marta ninye.

³¹ Akae, ore pedol kulo Yudayoi, lootii e nebo o ninye atua aji eilejilejita ninye, Maria, aajo etudumunye asioki nepuku, nesuj ninje ninye ejo, aajo eloito ninye enkurare, peiye eishir te ina alo.

³² Akae, ore pebaia Maria ene wueji netii Yesus nedol ninye, nebatatakino nkejek enyena nejoki ninye: Laitoriani, ten emutu itii iye ene, anaata eitu ee olalashe lai.

³³ Akae, ore pedol Yesus ninye eishirita o Yudayoi looiturrurrokinote ninye eishirita, negoro ninye naleng' tʼolmumua neitang'aing'ai kion,

³⁴ nejo: Kaji itipika ninye? Nejoki si ninje: Laitoriani, wou, ng'orai!

³⁵ Neishir Yesus ilkiyo.

³⁶ Akae, nejo Yudayoi: Eng'orai, eneikuna teni enyor ninye.

³⁷ Nejo ematua enye: Eitu eidim ele lotabolo ngonyek olmodooni atomitiki ele, pemee?

³⁸ Akae, neitoki Yesus agoro te kion nebaia enkurare. Nera engapunet netipikaki osoit shumata enye.

³⁹ Nejo Yesus: Entudumutu osoit! Nejoki Marta, enganashe olotua, ninye: Laitoriani, eng'u taata, amu engolong' e ong'wan etii.

⁴⁰ Nejoki Yesus ninye: Eitu aajoki iye, ajo teni ilairuk, niladol enkitook Engai?

⁴¹ Akae, nedumu ninje osoit. Neapaki Yesus ngonyek shumata nejo: Papa, aaliki iye ashe, tiaraki nikitoning'o.

⁴² Nayolo nanu, ajo kining' oshi; kake atejo tʼolbae lʼesiamu namanita, peiye eiruk, aajo iye likirriua.

⁴³ Ore peidip atejo kuna, nedar tʼoltoilo kitok: Lasaros, tupuku boo!

⁴⁴ Nepuku olotua eena nkejek o ngaik too rasheta enukare, neirina engomom enye tʼerashet. Nejoki Yesus ninje: Entalaku ninye, enjoo ninye elo.

⁴⁵ Akae, neiruk ninye ilkumok too Yudayoi looetuo enetii Maria nedol enaitobira ninye.

⁴⁶ Nepuo ematua enye enetii Ilfarisayoi neliki ninje enaitobira Yesus.

⁴⁷ Akae, neiturrur laidasak kituak o Ilfarisayoi enkigwena nejo: Kaji kinko? Amu eitobir ele tung'ani ilponot kumok.

⁴⁸ Teni kipal ninye nji, nepuo aairuk pookin ninye, nepuo aapuonu Romayoi neoru yook olosho o olorere.

⁴⁹ Nejoki Kayafas, obo lenye lora olaidasani kitok te ilo ari, ninje: Miyololo ndai toki;

⁵⁰ nimimbirribirrirri, aajo enaikash too yook, teni elae oltung'ani obo tʼolbae lʼolorere, pemeimin olorere olulung'a.

⁵¹ Eitu elimu ninye ena te kion, kake tiaraki nara olaidasani kitok te ilo ari, neitayolou, ajo elae Yesus tʼolbae lʼolorere,

⁵² neme tʼolbae lʼolorere ake, kake peiturrur si nkera Engai naaisardaka, peaku nabo.

⁵³ Akae, ore eiter te ina olong', neigwena, petum aataar metua.

⁵⁴ Akae, neitu eitoki aibalunye Yesus kion tiatua Yudayoi, kake eshomo ewueji netaaniki ang'ata metabaiki engang' naji Efrem, neton te ina alo te nebo o laiteng'enuok lenyena.

⁵⁵ Netaanu pasaka oo Yudayoi neilep aapuo ilkumok Yerusalem, eing'ua olosho, epon eitu eaku pasaka, peiye eisuj aten.

⁵⁶ Akae, neing'oru ninje Yesus nejokino eitashe tʼengaji sinyati: Ijojo aa ndai, melotu ninye tukul ngolong'i kituak?

⁵⁷ Neishooitie laidasak kituak o Ilfarisayoi nkitanapat, ajo teni eyolou oltung'ani enetii ninye, njelotu alimu, petum aaibung'a ninye.