Yohana 1 - Osotua Ng'ejuk

¹ Etii tʼenkiterata Ororei netii Ororei enetii Engai, nera Engai ele Rorei.

² Netii ninye ele tʼenkiterata enetii Engai.

³ Etaa pookin te ninye, neitu eaku oo nyoo, metii ninye.

⁴ Netii atua ninye empuan nera empuan enkilang'et oo ltung'anak.

⁵ Neilang'isho enkilang'et tiatua enaimin neitu eng'amu enaimin ninye.

⁶ Etii oltung'ani obo oirriwuaki tʼEngai, neji engarna enye Yohanes.

⁷ Eewuo ninye, peaku enjakenishu, peiye eijakenu mbaak e ina kilang'et, petum pookin aairuko te ninye.

⁸ Eitu era ilo enkilang'et, kake peijakenu mbaak enkilang'et.

⁹ Era ninye enkilang'et nasipa nailang'aki oltung'ani pookin, olotu atua ele maa.

¹⁰ Etii atua olmaa, etaa olmaa te ninye, neitu eyolou olmaa ninye.

¹¹ Eewuo ninye atua enenye, neitu eng'amu ilkulenyena ninye.

¹² Ore pookin lootang'amutua ninye, neisho ninje engolon, peaku nkera Engai, ninje looiruk engarna enye,

¹³ leitu eiuni too sargeta neme tʼeyeunoto enkiring'o neme tʼeyeunoto olee, kake tʼEngai.

¹⁴ Neaku Ororei enkiring'o nemanya atua yook, nikidol enkitook enye, enkitook anaa nʼOinoti obo oing'ua Menye, obore eng'adunoto o esipata.

¹⁵ Eijakenu Yohanes mbaak enyena nedar nejo: Era ninye olairorua: olotu tekurum ai, netii lukunya ai, amu etii, eitu atii nanu.

¹⁶ Niking'amu yook pookin tʼemborei enye, eng'adunoto o eng'adunoto.

¹⁷ Amu eishooki nkitanapat te Mose; etaa eng'adunoto o esipata te Yesus Kristos.

¹⁸ Neitu aikata edol oltung'ani o obo Engai; Oinoti obo otii engalo olgoo le Menye, ilo loinosua.

¹⁹ Nera ena enjakenishu e Yohanes, te ina kata nairriwaitie Yudayoi laidasak o ilevites enetii ninye eing'ua Yerusalem, peiye eikilikwan ninye: Ira iye ng'ai?

²⁰ Neibalu ninye neitu emiki, neibalu: Mara nanu Kristos.

²¹ Neikilikwan ninje ninye: Ira naa ng'ai? Ira Eliya? Nejo: Mara. Ira iye olayolounoni? Nealu: Me.

²² Akae, nejoki ninje: Ira naa ng'ai? pikinjo aleta kulo looirriutua yook. Ijo aa te kion?

²³ Nejo ninye: Ara nanu oltoilo lʼoloipotisho ti ang'ata: Entorioi engoitoi Olaitoriani! anaa petejo olayolounoni Yesaya.

²⁴ Era ninje looirriwaiyoki ematua oo Lfarisayoi.

²⁵ Neikilikwan ninje ninye nejoki: Ainyo naa pimbatisisho, teni mira iye Kristos arashu Eliya arashu olayolounoni?

²⁶ Nealiki Yohanes ninje nejo: Aibatis nanu tʼengare; neitashe tʼempolos inyi olimiyololo ndai,

²⁷ ore olotu tekurum ai netii lukunya ai, meaku te nanu, palak enkeene enamuke enye.

²⁸ Etaa ena te Betania, te lido kekun le Yordan, enetii Yohanes eibatisishe.

²⁹ Ore tʼengolong' e are nedol Yohanes Yesus elotu enetii, nejo: Ng'orai, embalelo Engai nanapita nkitarruot olmaa.

³⁰ Era ninye ele lairorua nanu: Elotu tekurum ai olee lotii lukunya ai, amu etii, eitu atii nanu.

³¹ Neitu ayolou si nanu ninye, kake peiye elioi te Israel, onaa aewuo nanu, paibatisisho tʼengare.

³² Neijakenu Yohanes nejo: Atadua Olmumua edou aing'ua shumata anaa olmaitai neton te shumata enye.

³³ Neitu ayolou si nanu ninye; kake olaairriwaiye, paibatis tʼengare, ninye laatiaka: Olidol edoiki Olmumua shumata enye nebik te shumata enye, ninye ele oibatis tʼOlmumua Sinyati

³⁴ Nadol si nanu naijakenu, ajo era ninye Oinoti lʼEngai.

³⁵ Neitoki aitashe tʼengolong' e are Yohanes o are too laiteng'enuok lenyena,

³⁶ nedol ninye Yesus elimana nejo: Ng'orai, embalelo Engai!

³⁷ Nening' kulo aiteng'enuok lenyena aare eirorita nesuj ninje Yesus.

³⁸ Neibelekenya Yesus nedol ninje esujita nejoki ninje: Kainyo ing'oruru? Nejoki si ninje: Rabi (ore enkitaalata enye: Olaiteng'enani), kaji ibikie?

³⁹ Nejoki ninye ninje: Ewotu, eng'orai! Nepuonu nedol enebikie, nebik te ina olong' o ninye. Nera enkata oo saan tomon.

⁴⁰ Nera obo too kulo aare lootoning'o te Yesus nesuj ninye Andreas, olalashe le Simon Petros.

⁴¹ Neinepu ninye tʼenkata elukunya olalashe lenye Simon nejoki ninye: Kinoto Mesias (eji enkitaalata enye: Kristos).

⁴² Nerikoki ninye enetii Yesus. Ore pedol Yesus ninye, nejo: Ira iye Simon, enkerai e Yona, kimpoti iye Kefas (eji enkitaalata enye: Osoit).

⁴³ Ore tʼengolong' e are neyeu Yesus nelo Galilaya neinepu Filipos nejoki ninye: Tusujaki!

⁴⁴ Nera Filipos ole Betsaida, lʼengang' e Andreas o Petros.

⁴⁵ Neinepu Filipos Natanael nejoki ninye: Kinoto ele lotisiraka Mose atua nkitanapat nesir baiki layolounok, Yesus, enkerat e Yosef, le Nasaret.

⁴⁶ Nejoki Natanael ninye: Keidim atupuku te Nasaret entoki sidai? Nejoki Filipos ninye: Wou, ng'orai!

⁴⁷ Nedol Yesus Natanael eyaaya ninye nejo tʼolbae lenye: Ng'orai, Oisraeli osipa nemetii olosek atua ninye.

⁴⁸ Nejoki Natanael ninye: Ke ti aji kitayolo? Nealiki Yesus nejoki ninye: Ore epon eitu kimpot Filipos, aatadua iye itii abori olng'aboli.

⁴⁹ Nealiki Natanael ninye: Rabi, ira iye Oinoti lʼEngai, ira iye olkarsis le Israel!

⁵⁰ Nealiki nejoki Yesus ninye: Iruko iye, tiaraki naatiaka iye, ajo aatadua iye tiabori olng'aboli; iladol nalang' kuna.

⁵¹ Nejoki ninye: Japa, japa, aliki ndai: Ore eiter taata ipuopuo aadol shumata ebolo, neilep nedou ilmalaikan lʼEngai te shumata Enkerai oltung'ani.