Yakobo 5 - Osotua Ng'ejuk

¹ Akae, aiya, ndai ladupak, enjira nilishilishi tʼolbae lʼosina olotu shumata inyi.

² Etobobua endupoto inyi, nenya laing'ur ilkilani linyi.

³ Ore esahabu inyi o ngoshola inyi etadoro einosa enkop, ore endoron enkinosata enkop, neijakenu, nenya nkiri oo seseni linyi anaa enkima. Inturrurro masaa too ngolong'i naatulusoitie.

⁴ Ng'orai, ore olkwaje loo laitobirak ooisambutua nkuruman inyi litomito ndai tʼenkikonya, ninye oishir; etijing'a enkishirata oo laisambuak atua nkiyaa Olaitoriani loo ltimito.

⁵ Inosa ndai olkar tʼenkop, nitonini tiatua naaitiship osesen, nintotiti iltauja linyi tʼengolong' eyeng'are.

⁶ Ingwenakitia olora supat niariara, neitu eany ninye ndai.

⁷ Enting'iria ndai, lalashera, metabau elotunoto Olaitoriani. Eng'orai olaturoni lʼenkuruma eanyu ilmomo sidan lʼenkop, neng'iri metabana netum enjan elukunya o en e tekurum.

⁸ Enting'iria si ndai, nintagoligolo iltauja linyi; amu etinyikua elotunoto Olaitoriani.

⁹ Emiang'iang'akino obo o olekai, lalashera lainei, pemeigwenakini ndai. Ng'o rai, eitashe olaigwenani te kutukaji.

¹⁰ Entusuj, lalashera lainei, enkisiloto o olng'iria loo layolounok, ooirorie tʼengarna Olaitoriani.

¹¹ Ng'orai, kijo ninje teshi looting'iria. Itoning'o olng'iria le Iyob, nitadua enkiting'oto Olaitoriani; amu eata Olaitoriani engoshoke nanana, naa ninye oata enking'urroto.

¹² Kake enang'or, lalashera lainei, eminturuj, me te shumata, neme tʼenkop, neme tʼengai kiturujata. Njeaku ororei linyi: ee, ora ee, o: me, ora me, pemibatatata abori enkigwena.

¹³ Ore peisili obo too ndai, njesaisho! Ore peng'ida oltung'ani, njerany singolioitin lʼengauo!

¹⁴ Ore pemoi obo too ndai, njeipot ninye laigwenak lʼesirit, pesayaki ninje ninye, neelie eilata tʼengarna Olaitoriani.

¹⁵ Nelaitopok esayata enkirukoto oltamoiyai, neapaa Olaitoriani ninye; naa teni eitobira nkitarruot, nepuoi aaitaiki ninje.

¹⁶ Akae, embalakinoto nkitarruot, entasayakinoto, pitumutumu aaishiutu. Eidim esayata engolon osupat nkumok.

¹⁷ Nera Eliya oltung'ani onyanyukie yook, nesaisho tʼesayata, pemesha enjan, neitu eshaiki enjan enkop laritin okuni o lapaitin ile;

¹⁸ neitoki asaisho, neishoru shumata enjan, neiu enkop ilmomo lenyena.

¹⁹ Lalashera lainei, teni eimalimal obo linyi neing'ua esipata, neibelekenya oltung'ani ninye,

²⁰ njeyolou ele, ajo ooibelekenya olaitarruoni tʼengoitoi enye naimalimalie, nelaitopok ninye empuan enye tʼenkea neopoo enkumoi oo nkitarruot.