Yakobo 2 - Osotua Ng'ejuk

¹ Lalashera lainei, eminken, aajo eing'oraa enkirukoto e atua Yesus Kristos, Olaitoriani lʼenkitook lang', entemet oltung'ani.

² Amu ten emut ejing'u oltumo linyi oltung'ani oishopo olgisoi le sahabu o olkila sidai, neitoki alotu olaisinani oishopito olkila duruki,

³ ning'oring'oro ndai ele oishopo olkila sidai, nijokiki ninye: Totona tʼene wueji sidai, nintokiki aajoki ele aisinani: Ntasho iye tʼende, arashu: Totona ene abori olorika loo nkejek ainei:

⁴ anaata eitu intoorioro tiatua ndai aten, niakuku laigwenak oosuj ndamunot torrok?

⁵ Entoning'oki nanu, ndai, lalashera lainei lanyor, keitu egelu Engai laisinak lʼena kop loora ladupak lʼenkirukoto o lajung'ok lʼenkarsishu, naisiligaka kulo oonyor ninye?

⁶ Kake ore ndai, itemenaitie oltung'ani aisinani. Me ladupak ooek ndai neyetu ndai tʼengomom enkigwena enye?

⁷ Ke, memor ninje engarna sidai naipotieki ndai?

⁸ Ten intabaiaia enkitanapata olkarsis, anaa pejo esirata: Tonyorra oltung'ani lʼelatia ino anaa kion, ninkoko sidai,

⁹ kake ten ing'oraara entemet oltung'ani, nintarruorruo, neaku nkitanapat iljaken, aajo irara lalang'ak.

¹⁰ Amu teni eibung' oltung'ani nkitanapat pookin neitarruoki nabo, etaa oloitarruoko pookin.

¹¹ Amu olotejo: „Miar enkidikidikoto olmoruo o eng'oroyoni!“ etejo baiki: „Miar metua!“ Akae, teni eitu iar enkidikidikoto olmoruo o eng'oroyoni, kake itaara metua, itaa olalang'ani loo nkitanapat.

¹² Eroro nji, enkuna nji, anaa loopuoi aaigwenaki too nkitanapat elakunoto.

¹³ Amu etum enkigwena, metii eng'adunoto, lemenana oshoke; neitadaraa kion enanai e oshoke, meure enkigwena.

¹⁴ Kaa dupoto ena, lalashera, teni ejo oltung'ani, ajo eata enkirukoto nemeata nkitobirat? Keidim aitopua enkirukoto ninye?

¹⁵ Teni meishopo olalashe arashu enganashe nelau embaikinoto endaa,

¹⁶ nejoki obo linyi ninje: Esere naa, erowuajie aten, entaraposhoto! niminjosho ninje launot osesen: kaa dupoto ena?

¹⁷ Neijia baiki enkirukoto, teni meata nkitobirat, netua tiatua kion openy.

¹⁸ Kake ebaiki oltung'ani ejo: Iata iye enkirukoto, naata nanu nkitobirat. Ntaduaki enkirukoto ino metii nkitobirat, nayeu naaitadol iye too nkitobirat ainei enkirukoto ai.

¹⁹ Iruk iye, ajo etii Engai nabo. Itaasa sidai; neiruk si ninje loiriruani, neikirikira.

²⁰ Ke, iyeu niyolou, oltung'ani oilash, ajo etua enkirukoto nemeata nkitobirat?

²¹ Keitu eitaai Abraham, Papa lang', supat tʼolbae loo nkitobirat, peidas Oinoti lenye Isaak tʼolperere lʼenkidasare?

²² Idol taa, ajo eitobirishore enkirukoto nkitobirat enyena, neitabaiyoki enkirukoto too nkitobirat;

²³ nebaia esirata najo: Eiruko Abraham Engai, neikenakini ninye ena esupato, neipoti: oljore lʼEngai.

²⁴ Itadua ndai, aajo eitaai oltung'ani supat tʼolbae loo nkitobirat, me tʼolbae lʼenkirukoto ake.

²⁵ Neija si etiu Rahab, enda sindani: Keitu eitaai si ninye supat too nkitobirat, peng'amu lelo aikitalak, neisho epuku aulo tʼengai oitoi?

²⁶ Amu anaa petua osesen, metii Olmumua, neijia si etua enkirukoto, metii nkitobirat.