Yakobo 1 - Osotua Ng'ejuk

¹ Yakobos, osinga lʼEngai o lʼOlaitoriani Yesus Kristos: eninyi ena palai, ndai kuna tipati tomon o are naaisardakakinote nkwapi. Entasupai!

² Enkena aajo eng'ida nabore, lalashera lainei, ten ibatatakinono atua nkitasurot oo mpukunot kumok,

³ niyololo, aajo eitaa enkirukoto inyi, ten eitoriori, olng'iria.

⁴ Ore olng'iria, meata kata nemebik egol metabaiki enkiting'oto, piakuku lbaiarot oolulung'a lemeng'oriki toki.

⁵ Ten etii oltung'ani linyi otong'orikia eng'eno, njesai ninye Engai naisho oltung'ani pookin tʼenkumoi nemeisikong'aki, neaku eishori ninye.

⁶ Kake njoo metasaya tʼenkirukoto, meata enking'arrirroto. Amu oloing'arrirro nenyanyukie lopir lʼenaiposha, ooreota neiposhiposh enkijape.

⁷ Njoo mejo ilo tung'ani, ajo elang'amu ninye toki tʼOlaitoriani;

⁸ ore oltung'ani orisha oltau, nemeitoriori too ngoitoi enyena pookin.

⁹ Ore olalashe lora oti, njeitadaraa kion tʼenkitook enye,

¹⁰ ore oladupani, njeitadaraa kion tʼenkitadounoto enye, amu elusoo anaa entapukai oo nkujit.

¹¹ Eilepu engolong' te nebo o enkirowuaj, netoi nkujit, nerarunye entapukai enye, neimin enkishaa enkitobirata enye. Neijia si etiu oladupani, einaaia too nkyasin enyena pookin.

¹² Tesh oltung'ani oting'iria tʼenkitasuroto, amu ore etaa etaleenoki, nelang'amu enkaja empuan naisiliga Olaitoriani kulo loonyor ninye.

¹³ Njoo mejo o obo loitasuri: aaitasur Engai. Amu meitasuri Engai too ntorrok, nemeitasur ninye openy oltung'ani o obo.

¹⁴ Eitasuri oltung'ani pookin tʼolng'warra lenye openy, loroju neisis ninye.

¹⁵ Ore tekurum eidipa atang'amu olng'warra neiu ninye enkitarruoto, ore petabaiye enkitarruoto neiu ninye enkea.

¹⁶ Emimanimanaa, lalashera lainei lanyor!

¹⁷ Eing'ua enkishooroto pookin sidai o enkishooroto nabaia shumata, edou eing'ua enetii Menye loo nkilang'eta, nemetii enetii ninye enkitaalata arashu oloip lʼenkibelekenyata.

¹⁸ Etoiwuo ninye yook tʼeyeunoto enye, tʼororei lʼesipata, pekiaku yook enkiterata oo nkitobirat enyena.

¹⁹ Onaa, lalashera lainei lanyor, njeaku oltung'ani pookin losioki ainining'u, lemesioki agoro;

²⁰ amu meitobir engoro oltung'ani enaaku tʼEngai.

²¹ Onaa, entautu olduruki pookin o enkumoi entorroni, ning'amumu tʼemborran ororei, lotuunoki atua ndai, loidim aitopua iltauja linyi.

²² Entaa laitobirak lʼororei, me laning'ok ake, pemilejileje aten.

²³ Amu teni era oltung'ani olaning'oni lʼororei nemera olaitobirani, nenyanyukie ninye oltung'ani loing'oraa engomom osesen lenye tʼenking'oret.

²⁴ Ore peidip aing'orai, nelo nerikino nabo kata enetiu.

²⁵ Ore loturuma atua nkitanapat naabaia elakunoto, nemera olaning'oni lorikinisho, kake olaitobirani lʼenkyas, neaku ninye tesh tiatua enkitobirata enye.

²⁶ Teni ejo oltung'ani, ajo era olaisyayani lʼEngai, nemeitore olng'ejep lenye, kake elej oltau lenye, nera enkisyayare enye ne pesho.

²⁷ Ore enkisyayare sidai nemeata eleyata tʼengomom Engai, Papa, era ena: Enking'orare oo lokishin o en oo ngolia tiatua enkilishoto enye, o erripore e kion tʼolmaa, pemeata entibili.