Tito 2 - Osotua Ng'ejuk

¹ Kake ore iye, roro lomon anaa perisiore enkiteng'enare naishiuniisho.

² Tiaki ilpaiyani, pememera, neata enganyit o eng'eno, neaku biot tʼenkirukoto, tʼenyorrata, tʼolng'iria;

³ neija si ntasati, peata orregie oaku too sinyat, nemeaku naakurrisho arashu naaok enaisho sapuk, neaku ngaiteng'enak sidan,

⁴ aaiteng'enu nkituak kutiti, penyor ilmoruak lenye o nkera enye,

⁵ neitore aten, neaku shaati, neramat ngajijik enye, neata emborran, nening' ilmoruak lenye, pememori ororei lʼEngai.

⁶ Neijia tididing'a leak ooti, peitore aten.

⁷ Kake tiatua ntokitin pookin, tang'asa ntadua kion anaa enkitanyanyukiet oo nkitobirat sidan, tʼenkiteng'enare nemeshula nkulie baak, tʼesinyatishu,

⁸ tʼororei oishiuniisho lemeata eleyata, pekurru olmang'atinda torrono nemetum enaimaki yook tʼentorroni.

⁹ Njening' laisyayak laitoriak lenye neiting'id ninje too pookin, nemeing'unyung'uny,

¹⁰ nemepurrisho, kake peitadolu esupato pookin sidai, peiye ekaj enkiteng'enare Engai, Olaitoriani lang', too mbaak pookin.

¹¹ Amu etaliokine eng'adunoto Engai naitopokisho iltung'anak pookin,

¹² eiteng'enita yook, pikiany empaashata Engai o ilng'warran lʼolmaa, pikinjiu tiatua ele maa tʼeng'eno o tʼesupato o tʼenkuretishu Engai,

¹³ nikimaririu eanyunoto tesh o enkitadolunoto enkitook Engai kitok o Olaitopuani lang' Yesus Kristos,

¹⁴ oishorua kion tʼolbae lang', pelaku yook tʼempaashata pookin oo nkitanapat neisujaki kion olorere lemeata entemakino nenyok nkyasin sidan.

¹⁵ Roro kuna baak nididing' ningwenaki tʼempijan sidai. Niminjo oltung'ani obo kiany.