Tito 1 - Osotua Ng'ejuk

¹ Paulos, osinga lʼEngai o olairriwani le Yesus Kristos, tʼerisioroto enkirukoto oo lootegeluaki lʼEngai o eyolounoto esipata nabaiki enkisyayare Engai,

² tiatua eanyunoto empuan nemeiting', naisiliga Engai nemelejisho, eton eitu ebau nkatan enkop;

³ kake tʼenkata enye etaboluo ororei lenye tʼenkinosunoto naaishooki nanu tʼenkitanapata Engai, Olaitopuani lang':

⁴ te Titos, enkerai ai nasipa tiatua enkirukoto niking'ar yook pokira are. Njoo kiboitare eng'adunoto o enkordunoto o eseriani naing'ua Engai Papa o Olaitoriani Yesus Kristos, Olaitopuani lang'.

⁵ Te ina aatung'aiye iye te Kreta, pintabaia nena baak naatong'oro, nipik laigwenak too ngang'itie pookin, anaa enaaitanapa iye.

⁶ Ten etii olemeata entibili, olmoruo lʼeng'oroyoni nabo, olopeny nkera naairuk nemeimakini aajo era ninje naaiminye arashu nemening'isho.

⁷ Amu njoo meata olaing'orani (bishop) eleyata, anaa olaramatani lʼengaji Engai, nemeaku oltung'ani ogol ong'u, nemeaku ologoro asioki, neme olaokoni lʼolmarua, neme olaarani, me olong'oroki kion too ntorrok,

⁸ kake olorik lomon aji, Oloata emborran, Oloata eng'eno nabore, olora supat o sinyati o shaat,

⁹ oloibung'are ele rorei osipa tʼensioroto enkiteng'enare, oloyolo aiteng'enisho, peata engolon nadiding'ie tʼenkiteng'enare naishiuniisho neigwenaki looata engogong'i.

¹⁰ Amu etii laderrak o laitasurok kumok lemening'isho ooata rorei le pesho, kake naleng' kulo lʼemurata.

¹¹ Meata kata nemenuki nkutukie enye, amu eibelekeny ngajijik naalulung'a, neiteng'en nemeitoriori tʼolbae lʼendupoto enye torrono.

¹² Etejo obo too ninje, oloiboni lenye openy ajo: Era Ilkretes oshi lalejak, lowuarak torrok o ngoshuak turua.

¹³ Esipa ena jakenishu. Tiaraki natiu neijia, ngwenaki ninje tʼempijan, peidim aataa supati tʼenkirukoto,

¹⁴ nemesuj natinin oo Yudayoi o nkitanapat oo ltung'anak oolam esupato.

¹⁵ Sidan ntokitin pookin too loora sidan, kake metii entoki sidai too lduruki o lemeiruk, kake eidurukieki eng'eno o oltoilo lʼoltau lenye.

¹⁶ Ejo ninje eyolo Engai; kake too nkitobirat enye, nemiki ninye, neata ntorrok, nemening'isho, neru tiatua enkyas sidai pookin.