Matayo 9 - Osotua Ng'ejuk

¹ Neilepaki ninye engalawa nelang' nebaia engang' enye.

² Naa ng'orai, nerikoki ninje oltamoiyai lʼosupetai oirragieki tʼerruat. Ore pedol Yesus enkirukoto enye, nejoki ele tamoiyai lʼosupetai: Ntagoluoi tʼoltau, nakerai ai, kintaikiaki nkitarruot inono.

³ Naa ng'orai, nejo ematua oo layolok lʼesirata tiatua aten: Emor ele Engai.

⁴ Ore peyolou Yesus nkibirribirrat enye, nejo: Kaji etiu, pimbirribirrirri ntorrok too ltauja linyi?

⁵ Kaa nalelek; teni ajo: Kintaikiaki nkitarruot inono, arashu: Nyototoi, tilimanai?

⁶ Kake piyolouu, aajo eata Enkerai oltung'ani engolon naitaunye nkitarruot tʼenkop, nejoki ele tamoiyai lʼosupetai: Nyototoi, tudumu erruat ino, nno ang'!

⁷ Neinyototo nelo ang'.

⁸ Ore pedol isiamin ena, neiputukuny neitadaraa Engai naishoo iltung'anak engolon naba nji.

⁹ Ore peing'ua Yesus ina alo, nedol oltung'ani eton tʼeneitainyeki kodi, oji engarna enye Matayos, nejoki ninye; Tusujaki! Neinyototo nesuj ninye.

¹⁰ Neaku, ore peton ninye tʼengaji, pedaa, naa ng'orai, nepuonu laoshok le kodi kumok o laitarruok, netoni te nebo o Yesus o laiteng'enuok lenyena.

¹¹ Ore pedol Ilfarisayoi ina, nejoki ninje laiteng'enuok lenyena: Ainyo pedaa olaiteng'enani linyi te nebo o laoshok le kodi o laitarruok?

¹² Ore pening' Yesus ina, nejoki ninje: Meyeu loora biot olaishiunoni, kake loomoiyaa.

¹³ Embung'a engoitoi ake, enteng'enuoto enkitaalata oo kulo rorei: Anyor eng'adunoto neme enkidasare. Eitu alotu nanu, paipot supati, kake laitarruok, petum aataalata.

¹⁴ Nepuonu te ina kata laiteng'enuok le Yohanes enetii ninye nejo: Ainyo pikipukoo yook o Ilfarisayoi aigil kumok nemepukoo laiteng'enuok linono?

¹⁵ Nejoki Yesus ninje: Keidim iltung'anak lʼengiama aaishira, epon eboitare ninje osanja? Kake epuonu ngolong'i neoruni ninje osanja, nepukoo te ina kata.

¹⁶ Metii oltung'ani opik erashet olkila ng'ejuk atua olkila musana; amu epolos ena rashet olkila neaku empolosata torrono naleng'.

¹⁷ Nemepiki olmarua ng'ejuk atua ilbenia musan; teni epiki, nepolosa ilbenia neibukori olmarua, nerruoio ilbenia. Kake epiki olmarua ng'ejuk atua ilbenia ng'ejuko, nepoku pokira are.

¹⁸ Ore epon eliki ninje kuna, ng'orai, nelotu olkitok obo negilaki ninye kung' nejo: Etua entito ai taata nji, kake wou, pinteleiki engaina ino, pepiu.

¹⁹ Nedumunye Yesus nesuj ninye te nebo o laiteng'enuok lenyena.

²⁰ Naa ng'orai, nelotu tekurum enye eng'oroyoni nabo naata empukunoto osarge enkata oo larin tomon o are, neporoo enaipukoi olkila lenye;

²¹ amu etejo tʼoltau lenye: Teni aporoo ake enaipukoi olkila lenye, naishiu.

²² Neibelekenya Yesus nedol ninye nejoki: Ntagoluoi tʼoltau, entito ai, enkirukoto ino nikintopua. Neishiu ena ng'oroyoni eiter te ina kata.

²³ Ore pebaia Yesus engaji olkitok nedol lakutak loo nkisuleta o enkiposhiposharoto olorere,

²⁴ nejoki ninje: Ewuang'a! amu eitu ee entito, eirura. Nekweniye ninye.

²⁵ Ore peitupukuni olorere, nejing'aki neibung' engaina enye, neinyototo entito.

²⁶ Neibulaa kuna baak atua ilo osho pookin.

²⁷ Ore peing'ua Yesus te ina alo, nesuj ninye ilmodook aare, edarita nejo: Tokordu yook, nakerai e David!

²⁸ Ore pebaia ang' nepuonu ilmodook enetii ninye. Nejoki Yesus ninje: Irukuruku, aajo aidim aitobira kuna? Nejoki ninje: Ee, Laitoriani!

²⁹ Neporoo ninye ngonyek enye nejo: Njeaku neijia anaa piruko.

³⁰ Nebolo ngonyek enye. Neiture Yesus ninje nejo: Eng'orai, pemeyolou oltung'ani o obo.

³¹ Kake nepuku neibulunye ninye atua ilo osho pookin.

³² Ore pepuku lelo, nerikokini ninye oltung'ani lemeidim airoro neata ilmeneng'a.

³³ Ore pemiri olmeneng'ani, neiro leitu eidim airoro. Neiputukuny isiamin nejo: Eitu edoli tʼewueji o nabo tiatua Israel nji.

³⁴ Nejo ake Ilfarisayoi: Emir ninye ilmeneng'a tʼolkitok loo lmeneng'a.

³⁵ Nemanaa Yesus tiatua ngang'itie kituak o kutiti neiteng'enisho tiatua ngajijik Engai enye neinosu lomon lʼeng'ida lʼenkarsishu neishiunye nkeaitin pookin o menatishuitin pookin tʼempolos olorere.

³⁶ Ore pedol ninye siamin, neibung'aki ninje engoshoke nanana, amu etanaurate neisardaka anaa ntare nemeata oljokut.

³⁷ Nejoki ninye laiteng'enuok lenyena: Kitok enkisambuare naa kuti laitobirak;

³⁸ akae, entasai Olaitoriani lʼenkisambuare, peirriwaa laitobirak atua enkisambuare enye.