Matayo 8 - Osotua Ng'ejuk

¹ Ore pedou tʼoldonyo, nesuj isiamin kumok ninye.

² Naa ng'orai, nelotu oltung'ani obo loata enkea oo lbolot neserem ninye, ejo: Laitoriani, teni iyeu, nikindim aisuja.

³ Neitorioo Yesus engaina enye neing'unye ninye nejo: Ayeu, sujai! Neisujunye nabokata enkea enye oo lbolot.

⁴ Nejoki Yesus ninye: Ng'orai, pimiliki oltung'ani, kake nno, pintadol kion olaidasani, pinjooio enkishooroto naitanapua Mose, peaku enjakenishu too ninje.

⁵ Ore pejing' Yesus Kapernaum, nelotu olkigeluni obo loo lmurran enetii ninye nesai ninye:

⁶ nejo: Laitoriani, eirrag olaisyayani lai tiatua aji, emoi osupetai nemeikini torrono naleng'.

⁷ Nejoki Yesus ninye: Alotu paishiunye ninye.

⁸ Nealiki olkigeluni loo lmurran ninye nejo: Laitoriani, mara toki, pijing' iye abori e keperaji ai, kake tolimu ororei obo ake, neishiu olaisyayani lai.

⁹ Amu ara si nanu oltung'ani otii abori enkitoria, naata ilmurran tiabori ai. Teni ajoki obo: Nno! nelo; o olekai: Wou! nelotu; o olaisyayani lai: Ntobira ena! neitobir.

¹⁰ Ore pening' Yesus ena, neiputukuny nejoki kulo lootusuja ninye: Japa, aliki ndai, eitu aikata adol tiatua Israel enkirukoto kitok anaa ena.

¹¹ Kake aliki ndai: Kumok loopuonu eing'ua enkilepunoto o endoiyoroto engolong' netoni te nebo o Abraham o Isaak o Yakoob tʼenkarsishu e shumata,

¹² kake eiturrakini nkera enkarsishu atua enaimin e aulo; netii ina alo enkishirata o eonyoto oo lala.

¹³ Nejoki Yesus olkigeluni loo lmurran: Nno, njeaku neijia anaa piruko! Neishiu olaisyayani lenye te ina kata ake.

¹⁴ Ore pelotu Yesus engaji e Petros, nedol engaputani enye eirrag, emoi oltikana.

¹⁵ Neibung' engaina enye neingʼuaiki oltikana ninye. Neinyototo neisyayaki ninye.

¹⁶ Ore peaku teipa, nerikoki ninje ninye ilkumok looata ilmenengʼa, nemir ilmeneng'a too rorei neishiunye loomoiyaa,

¹⁷ peiye ebaia enairoro olayolounoni Yesaya, ejo: Nedumaki ninye kion menatishuitin ang', nenap nkeaitin ang.

¹⁸ Ore pedol Yesus siamin kumok emanita ninye, neitanapu, pelangʼaa aabaiki lido kekun.

¹⁹ Nelotu olayoloni obo lʼesirata nejoki ninye: Laiteng'enani, ayeu naasuj iye tʼewueji pookin nilo.

²⁰ Nejoki Yesus ninye: Eata ntirrashin ngumot neata ntaritik singin, kake meata Enkerai oltung'ani eneiteleiki elukunya enye.

²¹ Nejoki olekai tiatua laiteng'enuok lenyena ninye: Laitoriani, njooki, pang'as alanuk papa lai.

²² Nejoki Yesus ninye: Tusujaki iye, tapala lootuata metunuka lootuata lenye.

²³ Neilepaki ninye engalawa nesuj laitengʼenuok lenyena ninye.

²⁴ Naa ng'orai, nejing' enkiposhiposhata kitok atua olbalbal neopoo lopir lʼengare engalawa; neirura ninye.

²⁵ Nepuonu laitengʼenuok lenyena enetii ninye neinyeye ninye nejo: Laitoriani, ntopua yook, kimin!

²⁶ Nejoki ninje: Ainyo pirara kureti, ndai lʼenkirukoto kinyi? Neinyototo nebuaki olkutati o olbalbal; neaku olgira kitok.

²⁷ Neiputukuny ake iltung'anak nejo: Kalo tung'ani ele loning' olkutati o olbalbal ninye?

²⁸ Ore pebaiki ninye lido kekun atua olosho loo Lgadarenoi, netumore ninye iltung'anak aare looata ilmeneng'a eing'ua nkuraren, malmalin naleng', neitu eiteu oltung'ani aima baiki ena oitoi.

²⁹ Naa ng'orai, nedar tʼoltoilo nejo: Ainyo kiataiye yook iye, Yesus, Oinoti lʼEngai? Amaa, iewuo ene, pintame yook, eitu ebau enkata?

³⁰ Netii enelakwaniki ninje emboo oo lbitiro looirrititai.

³¹ Nesai ilmeneng'a ninye nejo: Teni imir yook, njoo yook, pikijing' atua emboo oo lbitiro.

³² Nejoki ninje: Enjom! Nepuku nejing' atua ilbitiro. Naa ng'orai, nesulakino emboo pookin aasioki tʼemarti atua olbalbal nee tʼengare.

³³ Nekwet lairritak nepuo engang' neinosu mbaak pookin naataa o mbaak oo kulo looata ilmeneng'a.

³⁴ Naa ng'orai, nepuku engang' pookin alanang'are Yesus. Ore pedol ninye, nesai, pepuku too mbatai enye.