Matayo 4 - Osotua Ng'ejuk

¹ Nerik Olmumua Yesus te ina kata ang'ata, peiye etem satan ninye.

² Neitupukoo kion ngolong'i artam, dama o kiarie, netum tekurum olamei.

³ Nelotu olaitasuroni enetii ninye nejo: Teni ira Oinoti lʼEngai, ntanapa kulo soito, peaku endaa.

⁴ Nealiki nejo: Etisiraki: Meishiu oltung'ani tʼendaa ake, kake tʼororei pookin opuku tʼenkutuk Engai.

⁵ Neitoki arik satan ninye atua engang' sinyati neitasheye ninye tʼoldidio lʼengaji sinyati

⁶ nejoki ninye: Teni ira Oinoti lʼEngai, tusulakinoi enkop, amu etisiraki: Kintanapaki ilmalaikan lenyena, pekinap te shumata oo ngaik, pemikinkob osoit enkeju ino.

⁷ Nejoki Yesus ninye: Eitoki si asira: Mitem Olaitoriani, Engai ino!

⁸ Neitoki arik satan ninye shumata oldonyo oado naleng' neitadol ninye nkarsishuni pookin olmaa o enkitook enye

⁹ nejoki ninye: Aaisho iye kuna pookin, teni kibatatakino nikiserem.

¹⁰ Nejoki Yesus ninye: Nno, satan! amu etisiraki: Teserema Olaitoriani, Engai ino, syayaki ninye openy ake!

¹¹ Neing'ua satan ninye, ng'orai, nepuonu ilmalaikan aaisyayaki ninye.

¹² Ore pening' Yesus, ajo eteenaki Yohanes, nedumunye alo Galilaya.

¹³ Neing'ua engang' Nasaret nelotu aton te Kapernaum natii embata olbalbal, erishata e Sebulon o Naftali,

¹⁴ peiye ebaia enairoro olayolounoni Yesaya ojo:

¹⁵ Olosho le Sebulon o olosho le Naftali tʼembata engoitoi olbalbal, lido kekun le Yordan, o Galilaya oo loreren,

¹⁶ olorere otii atua enaimin, etadua ninye enkilang'et kitok; o kulo oototonitio tʼolosho o tʼoloip lʼenkea, eilepaka ninje enkilang'et.

¹⁷ Neiter Yesus te ina kata ainosu lomon lʼEngai ejo: Entaalata, amu etinyikua enkarsishu e shumata.

¹⁸ Nelimana Yesus tʼembata olbalbal le Galilaya nedol lalashera aare, Simon oji Petros, o Andreas, olalashe lenye, enang'aki rresheta enye atua olbalbal, amu era larreshok loo singir.

¹⁹ Nejoki ninje: Entusujaki, aitaa ndai larreshok loo ltung'anak!

²⁰ Neing'ua nabokata rresheta enye nesuj ninye.

²¹ Ore peigut peno, nedol kulekai alashera aare, Yakobos le Sebedayos o Yohanes, olalashe lenye, te nebo o Sebedayos, menye lenye, tiatua engalawa, eripita rresheta enye; neipot ninje.

²² Neing'ua ninje nabokata engalawa o menye lenye, nesuj ninye.

²³ Nemanaa Yesus te Galilaya pookin, eiteng'enisho too ngajijik Engai enye neinosu lomon lʼeng'ida lʼenkarsishu neishiunye moiyaitin pookin o menatishuitin pookin tiatua olorere.

²⁴ Neibulu mbaak enyena atua Siria pookin. Neaki ninye loomoiyaa pookin, looibung'a nkeaitin o mioitin kumok, looata ilmeneng'a, looata olkiterriata, looata supeta, neishiunye ninje pookin.

²⁵ Nesuj isiamin kumok ninye eing'ua Galilaya o Manyat tomon o Yerusalem o Yudaya o lido kekun le Yordan.