Matayo 28 - Osotua Ng'ejuk

¹ Ore peishunye engolong' naeng'ieng'areki nekenyu engolong' elukunya enjuma, nelotu Maria Magdalena o engai Maria aaing'oraa enkurare.

² Naa ng'orai, neaku enkikirikirata kitok enkop. Amu etadouo olmalaika lʼOlaitoriani te shumata nelotu neibeleleng'oo osoit te kutukaji neton te shumata enye.

³ Nenyanyukie emua enye enkiwang'ata neibor ilkilani lenyena anaa esiret.

⁴ Neikirikira larripok tʼenkuretishu neaku anaa lootuata.

⁵ Nealiki olmalaika nejoki ng'oroyok: Emiureisho ndai! Amu ayolo nanu, ajo ing'oruru Yesus otooshokoki esalaba.

⁶ Metii ene; amu etopiwuo anaa petejo. Ewotu, eng'orai ewueji neirragie Olaitoriani.

⁷ Embung'a engoitoi aasioki, entiakiti laiteng'enuok lenyena, aajo etopiwuo ninye aing'ua lootuata. Eng'orai, elaiturukie ninye ndai alo Galilaya, nipuopuo aadol ninye te ina alo. Eng'orai, atiaka ndai.

⁸ Nedumunye ninje aasioki t:enkurare, eata enkuretishu o eng'ida kitok, nekwet aainosaki laiteng'enuok lenyena. Ore epuoito ninje aainosaki laiteng'enuok lenyena,

⁹ naa ng'orai, netumore Yesus ninje, nejo: Entakwenia! Nepuonu neibung' nkejek enyena neserem ninye.

¹⁰ Nejoki Yesus ninje: Emiureisho! Enjom, enosakiti lalashera lainei, pepuo Galilaya, ina alo aapuo aadolie.

¹¹ Ore epuoito tʼengoitoi, nepuonu kulekai too larripok atua engang', neinosaki laidasak kituak mbaak pookin naataa.

¹² Neiturrurro ninje te nebo o laigwenak neigwena, neisho sikerin ngoshola kumok

¹³ nejo: Entejo: Laiteng'enuok lenyena ooetuo kiarie nepurroo ninye, kirura yook.

¹⁴ Ore pening' olkitok lʼolosho ena bae, nikiropirop yook ninye nikimitoo ndai.

¹⁵ Neng'amu ninje ngoshola neiko neijia anaa peiteng'enaki. Neibulu ele rorei atua Yudayoi metabaiki taata.

¹⁶ Neibung' kulo aiteng'enuok tomon o obo engoitoi aapuo Galilaya metabaiki oldonyo oitanapa Yesus ninje.

¹⁷ Ore pedol ninje ninye, neserem ninye; neing'arrirro kulekai.

¹⁸ Nelotu Yesus enetii ninje neirorie ninje nejo: Aaishooki engolon pookin te shumata o tʼenkop.

¹⁹ Akae, embung'a engoitoi, entaa laiteng'enuok loreren pookin, imbatisisi ninje atua engarna e Papa o Oinoti o Olmumua Sinyati,

²⁰ inteng'ening'ene ninje, peibung' pookin naitanapa nanu ndai. Naa ng'orai, aboitare nanu ndai ngolong'i pookin metabaiki enkiting'oto olmaa.