Matayo 27 - Osotua Ng'ejuk

¹ Ore pekenyu, neigwena laidasak kituak o laigwenak lʼolorere tʼolbae le Yesus, petum aataar metua.

² Neen ninje ninye nerik neitarasaki olkitok lʼolosho Pontios Pilatos.

³ Ore pedol Yudas oitarasaiye ninye, ajo eidipaki aaigwenaki, neirridu ninye entorroni enye, nerrinyoki laidasak kituak o laigwenak kuna dung'ot oo ngoshola

⁴ nejo: Aitarruoiye, tiaraki natolikioiye osarge lemeata eleyata. Nejo ninje: Akae, naa ainyo naatii ninje yook? Ng'orai, eninko openy!

⁵ Nenang'aki ninye kuna dung'ot oo ngoshola atua engaji sinyati nedumunye nelo negor kion.

⁶ Nedumu laidasak kituak kuna dung'ot oo ngoshola nejo: Menare, teni kipik nena atua osanduku lʼEngai; amu era enkinyang'a osarge.

⁷ Neigwena neinyang'u too ninje enkuruma olaitobirani loo motiok, penukieki lomon.

⁸ Onaa eipoti ena kuruma enkuruma osarge oo taata.

⁹ Nebaia enairoro olayolounoni Yeremiya ejo: Eibung'a ninje ndung'ot osom oo ngoshola nara enkinyang'a olotimiraki loinvang'utua ninje too nkera Israel,

¹⁰ neishooio tʼenkuruma olaitobirani loo motiok anaa paaitanapa Olaitoriani.

¹¹ Neitashe Yesus tʼengomom olkitok lʼolosho neikilikwan olkitok lʼolosho ninye nejo: Ira iye olkarsis loo Yudayoi? Nejoki Yesus ninye: Itejo iye.

¹² Ore peitang'or laidasak kituak o laigwenak ninye, neitu ealu ororei.

¹³ Nejoki Pilatos ninye: mining'ito, ke mbaak aja kintang'orie ninje?

¹⁴ Neitu ealiki ninye ororei o obo neiputukuny baiki olkitok lʼolosho naleng'.

¹⁵ Ore tʼenkata oo ngolong'i kituak neata olkitok lʼolosho orregie, pelaaki olorere obo loena lotayeutuo ninje.

¹⁶ Neata ake te ina kata oloena oyoloi oji Barabas.

¹⁷ Akae, ore peiturrurro ninje, nejoki Pilatos ninje: Kalo iyeuu nalaaki ndai? Barabas arashu Yesus oipoti Kristos?

¹⁸ Amu etayolo, ajo eitarasutua ninye tʼengilata e tau.

¹⁹ Ore peton ninye tʼolorika lʼenkigwena, neirriwaki eng'oroyoni enye embae nejo: Miasaki toki ilo loata esupato; amu aaitamioki too nkumok taata tiatua enkidetidetata tʼolbae lenye.

²⁰ Neisis laidasak kituak o laigwenak olorere, peyeu ninje Barabas neiminye Yesus

²¹ Nealu olkitok lʼolosho nejoki ninje: Kalo iyeuu, palaaki ndai too kulo pokira are? Nejo ninje: Barabas!

²² Nejoki Pilatos ninje: Akae, kaji aikunaki Yesus loipoti Kristos? Nejo ninje pookin: Njoo eoshokini esalaba!

²³ Nejo olkitok lʼolosho: Kaa torroni eitobira ninye? Nepon ninje naleng' aapaa iltoiloi ejo: Njoo eoshokini esalaba!

²⁴ Ore pedol Pilatos, ajo meidim o nyoo, epona ake oloilepilep, neibung' engare neisuj ngaik tʼengomom olorere nejo: Maata nanu eng'oki tʼosarge lʼele tung'ani lora supat; eng'orai ndai oopeny!

²⁵ Nealu olorere pookin nejo: Njelotu osarge lenye shumata ang' o shumata oo nkera ang'!

²⁶ Nelaaki te ina kata ninje Barabas; ore peidip ataara Yesus too nkeenda, neitarasaa ninye, petumi aatooshoki esalaba.

²⁷ Nerik isikerin lʼolkitok Yesus atua engaji enkigwena, neitasheiki ninye oltim olulung'a,

²⁸ neitai ninye ilkilani neishopoki olkila odo,

²⁹ neoi olmarisian loo lkikarreta neishopoki elukunya enye neitarasaki ninye eng'udi olmoloi engaina enye e tatene negil kung' tʼengomom enye nekweniye ninye nejo: Supai, lekarsis loo Yudayoi!

³⁰ Nenotaki ninye ngamulak neoru eng'udi olmoloi nearie ninye elukunya.

³¹ Ore peidip ninje aatakweniye ninye, neitai ilo kila neishopoki ninye ilkilani lenyena nerik, peoshoki esalaba.

³² Ore peidip aatupukutu, netumore ninje oltung'ani obo le Kirene oji engarna enye Simon; neitanap ilo tʼengolon, penap esalaba enye.

³³ Ore pebaia ewueji naji Golgota, nera enkitaalata enye: Emborbor,

³⁴ neisho ninje ninye engare naitiming'anisho neshulare olodua; ore peinyorrinyor, neitu eyeu neok.

³⁵ Ore peidip ninje aatooshokiti ninye esalaba, neor ninje ilkilani lenyena neosh olenkukuo, peiye ebaia enairoro olayolounoni: Etoorikinote ilkilani lainei tʼempolos enye neosh olenkukuo tʼolbae lʼolkarash lai.

³⁶ Netoni aarrip ninye te ina alo.

³⁷ Nepik shumata elukunya enye enkitang'oroto enye natisiraki: Era ele Yesus, olkarsis loo Yudayoi.

³⁸ Neoshokini te ine laisimak aare esalaba te nebo o ninye, obo te tatene o olekai te kedyanye.

³⁹ Ore kulo looimita engoitoi nemor ninye eipiripir lukuny enye,

⁴⁰ nejo: Iye logil engaji Engai nintoki ashet ninye too ngolong'i uni, ntopua kion! Teni ira Oinoti lʼEngai, tadou tʼesalaba!

⁴¹ Neiko si ninje neijia, laidasak kituak, nekweniye ninye te nebo o layolok lʼesirata o laigwenak nejo:

⁴² Eitopua kulekai nemeidim aitopua kion. Teni era ninye olkarsis le Israel, njedou taata tʼesalaba, pikiruk si yook ninye.

⁴³ Eting'idare ninye Engai; njeitopok taata, teni enyor ninye; amu etejo ninye: Ara nanu Oinoti lʼEngai.

⁴⁴ Etamoro si ninje laisimak ootooshokoki esalaba te nebo o ninye.

⁴⁵ Ore eiter te saa ile nejing' enaimin shumata enkop pookin metabaiki saa enturuj.

⁴⁶ Ore te saa enturuj nedar Yesus tʼoltoilo lʼengolon nejo: Eli, Eli, lamaa asabtani? eji: Engai ai, Engai ai, ainyo pikitung'aiye?

⁴⁷ Ore kulekai looitashe te ine nening' nejo: Eipot Eliya.

⁴⁸ Nekwet nabokata obo lenye neibung' enjutet neigany ninye engare naitiming'anisho nepik shumata eng'udi olmoloi neitook ninye.

⁴⁹ Nejo ake kulekai: Tapala, maing'orai, ten ake elotu Eliya aitopok ninye.

⁵⁰ Ore peidip Yesus ataapai kat are oltoilo tʼengolon, nedung'o tau.

⁵¹ Naa ng'orai, nepolosa olkarash lʼengaji sinyati matuan are, eiter te shumata metabaiki enkop.

⁵² Neikirikira enkop nedanya soito kituak, nebolo nkuraren nepuku seseni kumok loo sinyat ooirura;

⁵³ ore peidip aatupukutu, eidipe empiunoto enye, nejing' engang' sinyati nelioi too lkumok.

⁵⁴ Ore pedol olkitok loo sikerin te nebo o lootaboitare ninye, erripito Yesus, enkikirikirata enkop o mbaak naataa, neureishoi naleng' nejo: Esipa, era ele tung'ani Oinoti lʼEngai!

⁵⁵ Netii ng'oroyok kumok naaing'oraitie t'enelakwa, naa nena naatusuja Yesus, eing'ua Galilaya neisyayaki ninye;

⁵⁶ netii empolos enye Maria Magdalena o Maria, ng'otonye e Yakobos o Yosef, o ng'otonye oo nkera e Sebedayos.

⁵⁷ Ore peaku teipa, nelotu oltung'ani obo adupani le Arimatia, oji engarna enye Yosef, nera si ninye olaiteng'enuoni le Yesus.

⁵⁸ Nelo ninye enetii Pilatos neomonu osesen le Yesus. Neitanapu Pilatos, peishori ninye.

⁵⁹ Neibung' Yosef osesen neirin ninye tʼolkarash opukenya sidai

⁶⁰ nepik ninye atua enkurare natabatua tiatua osoit neibeleleng'oki osoit kitok kutukaji enkurare, nelo.

⁶¹ Netii ina alo Maria Magdalena o engai Maria, netoni tʼeneitoriokinore enkurare.

⁶² Ore tʼengai olong' nasuj engolong' enkitobirakinore, neiturrurrokino laidasak kituak o Ilfarisayoi Pilatos

⁶³ nejo: Laitoriani, kitadamutua, aajo etejo ilo alejani te ina kata eishiu: Ayeu napiu, eishunye ngolong'i uni.

⁶⁴ Akae, ntanapu, perripi enkurare metabaiki engolong' e uni, pemepuonu laiteng'enuok lenyena kiarie aapurroo ninye, nejoki olorere: Etopiwuo ninye aing'ua lootuata, — nelang' elejare enkiting'oto en elukunya.

⁶⁵ Nejoki Pilatos ninje: Iatata larripok, enjom, entorrip naleng' anaa piyololo.

⁶⁶ Nepuo ninje nerrip naleng' enkurare te nebo o larripok neen osoit tʼolmishire.