Matayo 26 - Osotua Ng'ejuk

¹ Neaku ore peidip Yesus kulo rorei pookin, nejoki ninye laiteng'enuok lenyena:

² Iyololo, aajo ore peishunye ngolong'i are, neaku pasaka; nepuoi aaitarasaa Enkerai oltung'ani, peoshokini esalaba.

³ Nepuo aaiturrurro te ina kata laidasak kituak o layolok lʼesirata o laigwenak lʼolorere tʼengaji olaidasani kitok oji Kayafas,

⁴ neigwena te nebo, peiye eibung' Yesus tʼolosek near ninye metua.

⁵ Etejo ninje ake: Me tʼenkata oo ngolong'i kituak, pemeaku enkiposhai tiatua olorere!

⁶ Ore etii Yesus te Betania, atua engaji e Simon loata enkea oo lbolot,

⁷ nenyikaki ninye eng'oroyoni nabo, naata oltulet lʼeilata narropil nagol enkinyang'a, nejiaki ninye elukunya, eton edaa.

⁸ Ore pedol laiteng'enuok lenyena ina, neibai nejo: Ken e nyoo ena kiminata?

⁹ Amu anaata etimiraki ena ilata too ngoshola kumok neishori laisinak.

¹⁰ Ore peyolou Yesus ina, nejoki ninje: Ainyo pinosiesie osina eng'oroyoni?

¹¹ Etii laisinak atua ndai ngolong'i pookin, kake mikiatata nanu ngolong'i pookin.

¹² Ore paatubukoko ninye ena ilata osesen lai, naaitobiraki enukare ai.

¹³ Japa, aliki ndai, ore tʼewueji pookin neinosuni kulo omon lʼeng'ida, neinosuni baiki nedamuni enaitobira ninye.

¹⁴ Nelo te ina kata obo too lelo tomon o are, oji Yudas Iskariotes, enetii laidasak kituak,

¹⁵ nejo: Kainyo iyeuu nikinjosho, paitarasaki ndai ilo? Ayeu naitarasaki ninye ndai. Nedung'oki ninye ngoshola osom.

¹⁶ Neiter aing'oru te ina kata erishata naitarasarie ninye.

¹⁷ Ore tʼengolong' elukunya oo lmkaten lemeisiijo nepuonu laiteng'enuok enetii Yesus nejoki ninye: Kaji iyeu nikintobirakinye endaata e pasaka?

¹⁸ Nejo ninye: Enjom engang' enetii ng'ania, entiakiti ninye: Ejo Olaiteng'enani: Etaana enkata ai; ayeu naitaa pasaka tʼengaji ino te nebo o laiteng'enuok lainei.

¹⁹ Neiko laiteng'enuok neijia anaa peitanapa Yesus ninje, neitobir pasaka.

²⁰ Ore peaku teipa, neton te nebo o kulo aiteng'enuok tomono are.

²¹ Ore edaa ninje, nejo: Aalikioo obo too ndai.

²² Neilish ninje naleng', neiter oltung'ani pookin ajoki ninye: Ke nanu, Laitoriani?

²³ Nealu ninye nejo: Ore ele likiriamaki endaa tʼengirra, ninye laalo alikioo.

²⁴ Elo Enkerai oltung'ani anaa petisirakaki ninye; ee, kake aiya ele tung'ani lolaitarasaa Engerai oltung'ani! Eikash, ten emutu eitu eiuni ele tung'ani.

²⁵ Nealu Yudas otolikioiye ninye nejo: Ke nanu, Laiteng'enani? Nejoki ninye: Itejo iye.

²⁶ Ore einosita endaa, neibung' Yesus olmkate, nemayan nebelibel neisho laiteng'enuok lenyena nejo: Enkoito, entaam; nera ele osesen lai.

²⁷ Neibung' enkwaru nejo ashe, neisho ninje nejo: Entookie pookin ena;

²⁸ amu era ele osarge lai lʼosotua ng'ejuk, oibukorieki ilkumok, peaku enkitaunoto oo nkitarruot.

²⁹ Kake aliki ndai: Maitoki aok tukul eiter taata te ina ishoi oo nkeek olmarua metabaiki ina olong' naok eng'ejuk te nebo o ndai tiatua enkarsishu e Papa lai.

³⁰ Ore peidip aaitadarai, nepuku boo, nepuo Oldonyo loo loirienito.

³¹ Nejoki Yesus ninje: Kipuopuo aarikare ndai pookin tʼena kiarie; amu etisiraki: Alaar olairritani, neisardak enjoo oo ntare.

³² Kake ore paidip atopiu, naaiturukie ndai alo Galilaya.

³³ Nealiki Petros nejoki ninye: Teni kirikare ilkulekai pookin, namaarikare nanu tukul.

³⁴ Nejoki Yesus ninye: Japa, aaliki iye: Ore tʼena kiarie, eton eitu eorito olkikusieki, nikimiki iye kat uni.

³⁵ Nejoki Petros ninye: Baiki teni ae te nebo o iye, maamiki iye. Nejo laiteng'enuok pookin neijia.

³⁶ Nelotu Yesus te nebo o ninje metabaiki enkuruma naji Getsemane nejoki laiteng'enuok lenyena: Entotoni tene, palo idyalo asaisho.

³⁷ Nerik ninye Petros o nkera are e Sebedayos neiter atum enkilishoto neisuuto.

³⁸ Nejoki Yesus ninje te ina kata: Eata olmumua lai enkilishoto metabaiki enkea; entotoni tene, enjololoto te nebo o nanu!

³⁹ Nenyikaa peno, nebatata aijululo nesaisho ejo: Papa lai, teni eaku, njaalusoo ena kwaru; kake me neijia anaa payeu nanu, njeaku anaa piyeu iye!

⁴⁰ Nelotu enetii laiteng'enuok neinepu, eirurate, nejoki Petros: Ke nji miatata engolon ninjololorere te nebo o nanu esaa nabo?

⁴¹ Enjololoto, entasaishoto, pemijing'ijing'i atua enkitasuroto! Eidipakine Olmumua, kake eshal osesen.

⁴² Neitoki alo engaigil e are nesaisho nejo: Papa lai, teni meaku, paalusoo ena kwaru, pamaok ninye, njeaku eyeunoto ino!

⁴³ Nelotu neinepu ninje, einyaakitia aairura, amu eiroshiutuo ngonyek enye.

⁴⁴ Neitoki aing'ua ninje nelo nesaisho en e uni nelimu kulo rorei ake.

⁴⁵ Tekurum nelotu enetii laiteng'enuok lenyena nejoki ninje: Erraga tekurum, eeng'ieng'ata! Eng'orai, etabaua enkata, peitarasakini Enkerai oltung'ani atua ngaik oo laitarruok.

⁴⁶ Enyoito, maapeti! Eng'orai, etinyikua olaaitarasaa.

⁴⁷ Ore epon eirorita, ng'orai, nelotu Yudas, obo too kulo tomon o are, te nebo o esiamu kitok, neata lalema o siaren, eing'ua enetii laidasak kituak o laigwenak lʼolorere.

⁴⁸ Eidipa aishoo olaitarasaroni lenye ninje olponoto nejo: Ore olang'utut, ninye ilo; embung'a ninye!

⁴⁹ Nelotu nabokata enetii Yesus nejo: Supai, Laiteng'enani! neng'utut ninye.

⁵⁰ Nejoki Yesus ninye: Oljore, kainyo ieunye? Nepuonu neaki Yesus ngaik neibung' ninye.

⁵¹ Naa ng'orai, obo too kulo lootaboitare Yesus, neitorioo engaina enye neshitu olalem lenye neosh olaisyayani lʼolaidasani kitok adung'u ninye enkiyok.

⁵² Nejoki Yesus ninye: Torrinyoki olalem lino ewueji enye! amu ore oltung'ani pookin loibung' olalem, neimin tʼolalem.

⁵³ Arashu ijo iye, ajo maidim atasaya Papa lai, paairriwaki ninye iltimito tomon o are loo lmalaikan?

⁵⁴ Kaji eiko peidipai naa esirata, ajo neijia meata kata nemeaku?

⁵⁵ Ore te ina kata nejoki Yesus nena siamin: Itupukutuo ndai too lalema o siaren ninyanyukiekie anaa iltung'anak loomirita olaisimani, pikimbung'ubung'u. O patotona too ngolong'i pookin tiatua engaji sinyati neiteng'enisho, neitu kimbung'ubung'u.

⁵⁶ Kake etaa kuna pookin, peiye ebaia sirat o layolounok. Neing'ua te ina kata laiteng'enuok pookin ninye aailanyisho.

⁵⁷ Ore kulo looibung'a Yesus, nerik enetii olaidasani kitok, Kayafas, enetutumore layolok lʼesirata o laigwenak.

⁵⁸ Nesujita Petros ninye tʼenelakwa metabaiki engang' olaidasani kitok, nejing' atua neton te nebo o laisyayak pedol enkiting'oto.

⁵⁹ Neing'oraki laidasak kituak o enkigwena pookin Yesus enjakenishu elejare, peiye ear ninye metua,

⁶⁰ neitu etum o nyoo. Tekurum nepuonu iljaken aare lʼelejare

⁶¹ nejo: Etejo ele: Aidim atigila ena aji sinyati, naitoki ashet ninye too ngolong'i uni,

⁶² Neinyototo olaidasani kitok nejoki ninye: Mialu ororei kainyo kinjakenoki kulo?

⁶³ Negira Yesus. Nealiki olaidasani kitok ninye nejoki: Aaiturujaki iye tʼEngai naishiu, piliki yook, ten ake ira iye Kristos, Oinoti lʼEngai.

⁶⁴ Nejoki Yesus ninye: Itejo iye. Kake aaliki iye: Ore eiter taata nipuopuo aadol Enkerai oltung'ani eton te tatene Engolon, elotu tʼerukenya e shumata.

⁶⁵ Nepolos te ina kata olaidasani kitok ilkilani lenyena nejo: Etamoro Engai! Kainyo pikintoki aayeu niking'oru iljaken? Eng'orai, itoning'o taata nji emoroto enye.

⁶⁶ Ijojo aa? Nealu ninje nejo: Meata kata nemee!

⁶⁷ Nenotaki ninje ngamulak engomom enye, near ninye too ntinan, near kulekai ninye too ndapi

⁶⁸ nejo: Tiaki yook, iye Kristos, kang'ai likitaara?

⁶⁹ Neton Petros ake te boo engaji: nelotu enetii ninye engaisyayani nabo nejo: Itii si iye e nebo o Yesus le Galilaya.

⁷⁰ Kake nemiki ninye too ngomomi pookin nejo: Mayolo enijoito.

⁷¹ Ore pepuku nebaiki kishomi, nedol engai aisyayani ninye nejoki kulo ootii: Etii opa ele e nebo o Yesus le Nasaret.

⁷² Neitoki amiki tʼenkiturujata: Mayolo nanu ele tung'ani.

⁷³ Ore tʼenkiti kata nepuonu looitashe te ine nejoki Petros: Esipa, ira si iye obo lenye, amu kilimu enkiroroto ino.

⁷⁴ Neiter ninye adek kion neituruj, ajo: Mayolo nanu ele tung'ani. Neorito nabokata olkikusieki.

⁷⁵ Nedamu Petros ilo rorei le Yesus lotiaka ninye: Ore eton eitu eorito olkikusieki, nikilamiki aigil uni, nelo aulo neishir tʼemion.