Matayo 22 - Osotua Ng'ejuk

¹ Nealu Yesus neitoki ajoki ninje too nkitanyanyukieta ejo:

² Enyanyukie enkarsishu e shumata olkarsis obo oamaka olaiyoni lenye.

³ Neirriwaa laisyayak lenyena, peipot looyeuni, pepuonu enkiama; neitu eyeu nepuonu.

⁴ Neitoki airriwaa ilkulekai aisyayak nejo: Entiakiti looyeuni: Eng'orai, aitobiraka ndai endaa ai, ateyeng'a ilmong'i o ilkerra oopir, eidipate pookin; ewotu enkiama!

⁵ Neitu eshilu ninje ina nepuo wuejitin enye: obo enkuruma enye, olekai enkinyang'a enye.

⁶ Ore lootelekutua neibung' laisyayak lenyena, nesul near ninje metuata.

⁷ Ore pening' olkarsis ina, negoro neirriwaa iltimito lenyena near kulo arak metuata, nepej engang' enye.

⁸ Tekurum nejoki laisyayak lenyena: Eitobirakine enkiama, kake eitu eaku too kulo looitobirakaki.

⁹ Onaa enjom rishat oo ngoitoi, entorikutu pookin lidolidolo meetu enkiama.

¹⁰ Nepuku laisyayak aapuo ngoitoi neiturrur pookin lootadua, iltorrok o sidan, neborei enkiama too lomon.

¹¹ Nejing' olkarsis, peing'oraa lomon, nedol oltung'ani obo tiatua lemeishopito olkarash lʼenkiama;

¹² nejoki ninye: Oljore, kaji inkuna teni ijing'u iye ene, miata olkarash lʼenkiama? Negira ninye.

¹³ Nejoki olkarsis laisyayak lenyena: Enteen nkejek o ngaik enyena, entanang'akiti ninye atua enaimin e aulo; neaku ine enkishirata o eonyoto oo lala.

¹⁴ Amu eipotoki ilkumok, negeluni ilkuti.

¹⁵ Nepuo ina kata Ilfarisayoi aanya enkigwena eneiko, perresh ninye too rorei.

¹⁶ Neirriwaki ninye laiteng'enuok lenye te nebo o laisyayak le Herodes. Nejo ninje: Laiteng'enani, kiyolo iye, aajo ira oltung'ani lʼesipata nintorioo aiteng'enu engoitoi Engai tʼesipata nimishilu oltung'ani o obo niming'oraa entemet oltung'ani.

¹⁷ Akae, tiaki yook, ijo aa? Ke sidai, teni eishori kaisar kodi arashu me?

¹⁸ Ore peyolou Yesus olosek lenye nejo: Ndai laitusupatuok, ainyo pikitemiteme?

¹⁹ Entaduaki engosholai e kodi! Neaki ninye endenarion nabo.

²⁰ Nejoki ninye ninje: Ken e ng'ai ena mua o ena sirata?

²¹ Nejoki ninje ninye: Ne kaisar. Nejoki ninye ninje: Akae, enjoo kaisar en e kaisar, o Engai en Engai!

²² Ore pening' ninje kuna, neiputukuny neing'ua ninye nepuo.

²³ Nepuonu te ina olong' Sadukayoi enetii ninye, oojo: metii empiunoto oo lootuata, neikilikwan ninye,

²⁴ nejo: Laiteng'enani, etejo opa Mose: Teni ee oltung'ani nemeata ninye nkera, njeea olalashe lenye eng'oroyoni enye, peiye etumoki ainyeyeki olalashe olmuate.

²⁵ Etii opa atua yook lalashera oopishana. Neamisho ol elukunya nee; ore meata olmuate, neing'uaiki olalashe eng'oroyoni enye;

²⁶ neijia si ninye oliare o oliokuni metabaiki pokira oopishana.

²⁷ Ore tʼenkiting'oto oo pookin nee si ninye, ina ng'oroyoni.

²⁸ Akae, keaku eng'oroyoni en e alo too kulo oopishana tʼengolong' empiunoto? Amu eama pookin ninye.

²⁹ Nealiki Yesus nejoki ninje: Imanimanaana ndai, amu miyololo sirat o engolon Engai.

³⁰ Amu metii atua empiunoto looamisho o naayamari, kake enyanyukie ninje ilmalaikan lʼEngai te shumata.

³¹ Eitu isomama ndai tiatua mbaak empiunoto oo lootuata enatiaka Engai ndai ejo:

³² Ara nanu Engai e Abraham o Engai e Isaak o Engai e Yakoob? Mera Engai Engai oo lootuata, kake noo looishiu.

³³ Ore pening' siamin nena, neing'asia tʼeng'eno enye.

³⁴ Ore pening' Ilfarisayoi, aajo eitigira ninye Sadukayoi, neiturrurro te nebo.

³⁵ Ore obo too ninje lora olayoloni lʼesirata neikilikwan etem ninye nejo:

³⁶ Laiteng'enani, kaa kitanapata nara kitok tiatua nkitanapat?

³⁷ Nejoki Yesus ninye: Meata kata niminyor Olaitoriani, Engai ino, tʼoltau lino pookin o tʼolmumua lino pookin o tʼeng'eno ino pookin.

³⁸ Ena enkitanapata elukunya nara kitok.

³⁹ Ore eniare narisiore ninye ena: Meata kata niminyor oltung'ani lʼelatia ino anaa pinyor kion.

⁴⁰ Kuna kitanapat are naaum nkitanapat pookin o layolounok.

⁴¹ Ore peiturrurro Ilfarisayoi, neikilikwan Yesus ninje

⁴² ejo: Ijojo aa tiatua mbaak e Kristos? Kera enkerai e ng'ai? Nejoki ninje ninye: Ne David.

⁴³ Nejoki ninje: Kaji eiko teni eipot David ninye tʼolmumua Olaitoriani ejo:

⁴⁴ Etiaka Olaitoriani Olaitoriani lai; Totona te tatene ai, metabana napik ilmang'ati linono abori oo nkejek inono?

⁴⁵ Akae, teni eipot David ninye Olaitoriani, kaji eiko teni eaku enkerai enye?

⁴⁶ Nemetii oltung'ani oitewuo aikilikwana ninye ororei eiter te ina olong'.