Matayo 2 - Osotua Ng'ejuk

¹ Ore peiuni Yesus te Betlehem e Yudaya, tʼenkata olkarsis Herodes, ng'orai, nepuonu lang'eni ooing'ua enkilepunoto engolong', nebau Yerusalem,

² ejo: Kaji etii olotoiwuoki olkarsis loo Yudayoi? Amu kitadua olakira lenye tʼenkilepunoto engolong, nikietuo si yook aaserem ninye.

³ Ore pening' olkarsis Herodes kuna, neng'ayung'ayu ninye te nebo o Yerusalem pookin.

⁴ Ore peiturrur laidasak kituak pookin o layolok lʼesirata tiatua olorere, nesipunye ninje eneiunyeki Kristos.

⁵ Nejoki si ninje: Te Betlehem e Yudaya, amu neijia etisiraki tʼolayolounoni:

⁶ Ore iye, Betlehem, olosho le Yuda, mira kiti tukul too laigwenak le Yuda; amu epuku te iye olaiturukoni olairrita olorere lai Israel.

⁷ Ore peidipai, neipot Herodes lang'eni tʼenkilepata netum too ninje esiparoto enkata natalie olakira,

⁸ neutaki Betlehem, nejo: Embung'a engoitoi, entisiputu naleng' mbaak enkerai; ore pindipidipi aatadol, nikintayololo, peiye alotu si nanu aserem ninye.

⁹ Ore peidip aatoning' olkarsis, neibung' engoitoi, naa ng'orai, neiturukie ninje ilo akira lotadua tʼenkilepunoto engolong', metabana nelotu aitashe te shumata ene wueji netii enkerai.

¹⁰ Ore pedol ninje ilo akira, neng'ida tʼeng'ida kitok naleng'.

¹¹ Nejing' aji nedol enkerai te nebo o Maria ng'otonye enye, nebatata aaserem ninye; nebolu masaa enye neisho ninye esahabu o emanoo narropil o eilata enkinyang'a nagol.

¹² Neitanap Engai ninje tiatua enkidetidetata, pemerrinyokino Herodes; neim engai oitoi aapuo enkop enye.

¹³ Ore peidip aashom lelo, ng'orai, nelioi olmalaika lʼOlaitoriani te Yosef tiatua enkidetidetata, ejo: Tudumunye, toriko enkerai o ng'otonye, sikaki Misri, pibik te ina alo metabana naaliki iye; amu eyeu Herodes neing'oru ina kerai, peiminye.

¹⁴ Nedumunye ninye neibung' enkerai o ng'otonye kiarie nelo metabaiki Misri.

¹⁵ Nebik te ina alo, metabana nee Herodes, pebaia enairoro Olaitoriani tʼolayolounoni ejo: Aipoto enkerai ai aitung'ua Misri.

¹⁶ Ore pedol Herodes, ajo eteleja lang'eni ninye, negoro naleng', neirriwaa, peari nkera oo leak pookin naatii Betlehem o nkutot enyena pookin, eiter too noo larin aare o neitu eishu, tʼenkata natisipua too lang'eni.

¹⁷ Nebaia enairoro olayolounoni Yeremiya ejo:

¹⁸ Etoning'oki oltoilo te Rama, enkishirata kitok o olkiyoi; Rahel naishiraki nkera enyena, nemeitigirai, amu mekure etii.

¹⁹ Ore pee Herodes, ng'orai, nelioi olmalaika lʼOlaitoriani te Yosef tiatua enkidetidetata te Misri

²⁰ ejo: Tudumunye, mbung'a enkerai o ng'otonye, mbung'a engoitoi alo olosho le Israel, amu etuata looing'orutua oltau lʼenkerai.

²¹ Nedumunye neibung' enkerai o ng'otonye nelotu olosho le Israel.

²² Kake ore pening', ajo eitorisho Arkelaos te Yudaya tʼewueji e Herodes lora menye, neurei elo ina alo; neroji tʼenkidetidetata, pelo metabaiki mbat e Galilaya.

²³ Nelotu nebik tʼengang' naji Nasaret, pebaia enairoro layolounok aajo: Eipoti ninye Olnasarayos.