Matayo 17 - Osotua Ng'ejuk

¹ Ore peishunye ngolong'i ile, negelu Yesus Petros o Yakobos o Yohanes, olalashe lenye, nerik ninje shumata oldonyo oado oopeny.

² Neala emua enye neilang'isho engomom enye anaa engolong' neiborru ilkilani lenyena anaa enkilang'et.

³ Naa ng'orai nelioi too ninje Mose o Eliya; neirorie ninje ninye.

⁴ Nealu Petros nejoki Yesus: Laitoriani, sidai, kitii yook ene! Teni iyeu, nashet tene iltomboitie okuni: obo lino, obo le Mose, obo le Eliya.

⁵ Ore epon eirorita, neopoo ninje erukenya naibor; naa ng'orai, neing'ua oltoilo erukenya ejo: Nyele Oinoti lai lanyor oshipakino oltau lai; entoning' ninye!

⁶ Ore pening' laiteng'enuok kuna, nebatata aaijululo neureishoi naleng'.

⁷ Nelotu Yesus enetii ninje neiseiye ninje nejo: Enyoito, emiureisho!

⁸ Ore peapu ngonyek enye, neitu edol oltung'ani neme Yesus ake.

⁹ Ore pedou ninje tʼoldonyo, neitanap Yesus ninje ejo: Emiliki oltung'ani ina duaroto, metabana nepiu Enkerai oltung'ani tiatua lootuata.

¹⁰ Neikilikwan laiteng'enuok lenyena ninye ejo: Ainyo naa pejo layolok lʼesirata, aajo meata kata nemeng'as alotu Eliya?

¹¹ Nealu Yesus nejoki ninje: Esipa, eng'as alotu Eliya neibelekeny pookin metaa ng'ejuko;

¹² kake aliki nanu ndai: Eidipa aeu Eliya, neitu eyolou ninje ninye, kake eitobirakitia ninye enatayeutuo ninje. Neijia meata kata nemeitame ninje Enkerai oltung'ani.

¹³ Neyolou te ina kata laiteng'enuok lenyena, aajo einosaki ninje mbaak e Yohanes Olaibatisani.

¹⁴ Ore pepuonu ninje enetii esiamu, nelotu oltung'ani obo enetii ninye negilaki kung'

¹⁵ ejo: Laitoriani, to-kordu enkerai ai, amu eibung' olkiterriata ninye neata emion torrono: Eurokino aigil kumok enkima, aigil kumok engare;

¹⁶ nariku ninye enetii laiteng'enuok linono, neru aaishiunye ninye.

¹⁷ Nealu Yesus nejo: Ndai enkishon nemeiruk neriwuo, ke metabaiki anu atii e nebo o ndai? Ke metabaiki anu ang'iriaki ndai? Eakaki ilo!

¹⁸ Nebuaki Yesus ninye, nepuku olmeneng'ani te ninye neishiu ena kerai eiter te ina kata.

¹⁹ Nepuonu ina kata laiteng'enuok enetii Yesus tʼewueji enye oopeny nejo: Ainyo peitu kindim yook aatimir ninye?

²⁰ Nejoki Yesus ninje: Tiaraki nimirukuruku ndai; amu japa, aliki ndai: Teni iatata enkirukoto anaa embeu e karadali, nijokiki ele donyo: Tadotunye tene abaiki idya alo! nedotunye si ninye; nemetii entoki nemeaku too ndai.

²¹ Kake mepuku ena mua neme tʼesayata o tʼempukoroto.

²² Ore etii ninje Galilaya, nejoki Yesus ninje: Eaku eitarasakini Enkerai oltung'ani ngaik oo ltung'anak,

²³ near ninje ninye metua, nepiu tʼengolong' e uni. Neilish ninje naleng'.

²⁴ Ore pepuonu ninje Kapernaum, nepuonu kulo loobosu kodi engaji Engai enetii Petros nejo: Melak olaiteng'enani linyi kodi engaji Engai?

²⁵ Nejo: Elak. Ore pelotu engaji, neiter Yesus aikilikwan ninye nejo: Ijo aa, Simon? Ke too akua tung'anak eaiye ilkarsisi kodi? Too nkera enye arashu too lomon?

²⁶ Nejoki Petros: Too lomon. Nejoki Yesus ninye: Akae, elakuno nkera.

²⁷ Kake pimikintirik yook ninje, nno embata olbalbal, ntadoiki erreshet, mbung'a osingirri lʼelukunya opuku; ore pibol enkutuk enye, nilatum engosholai: mbung'a ina, njooi tʼolbae lai o lino.