Matayo 16 - Osotua Ng'ejuk

¹ Nepuonu Ilfarisayoi o Sadukayoi netem ninye, peitadol ninje olponoto oing'ua shumata.

² Nealuninyenejoki: Ijojo ndai teipa: Elakiny, amu edo shumata;

³ ore enasirie ijojo ndai: Eirujuruj taata, amu edo shumata neopoko. Ndai laitusupatuok, indimidimi aatayolo emua e shumata, kake mindimidimi aatayolo ntokitin kituak ena kata?

⁴ Eing'oru ena kishon torrono nanyor mbaak eloloito olponoto, nemeishori olponoto neme olponoto lʼolayolounoni Yona. Neing'ua ninje alo.

⁵ Ore peidip aatalang' laiteng'enuok lenyena aabaiki lido kekun, nerikino enap ilmkaten.

⁶ Nejoki Yesus ninje: Eng'orai, piduaiaia aten tʼenkisiijoi oo Lfarisayoi o noo Sadukayoi.

⁷ Neishangarrakino ninje oopeny nejo: Tiaraki mikinapita ilmkaten.

⁸ Ore peyolou Yesus ina, nejoki ninje: Ainyo pinjangarrakinono ndai maten, ndai lʼenkirukoto kinyi, tiaraki neitu iauu ilmkaten?

⁹ Epon eitu iyolouu ndai o nyoo? Midamumu ndai kulo mkaten imiet too kulo iip onom o ilbenia aja litudumutua ndai?

¹⁰ Baiki kulo mkaten oopishana too kulo iip artam o ilbenia aja litudumutua?

¹¹ Kaji inkoko teni miyololo, aajo maliki ndai embae oo lmkaten, teni ajo: Entaduai aten tʼenkisiijoi oo Lfarisayoi o noo Sadukayoi!

¹² Neyolou ninje te ina kata, aajo eitu ejo, peduaia aten tʼenkisiijoi olmkate, kake tʼenkiteng'enare oo Lfarisayoi o noo Sadukayoi.

¹³ Ore pelotu Yesus engalo engang' Kaisarea-Filipi, neikilikwan ninye laiteng'enuok lenyena nejo: Kejo iltung'anak era Enkerai oltung'ani ng'ai?

¹⁴ Nejo ninje: Ejo ilkulekai, aajo ira Yohanes Olaibatisani, nejo ilkulekai: Eliya, nejo ilkulekai: Yeremiya, arashu obo too layolounok.

¹⁵ Nejoki ninye ninje: Kake ijojo ndai ara nanu ng'ai?

¹⁶ Nealu Simon Petros nejo: Ira iye Kristos, Oinoti lʼEngai naishiu!

¹⁷ Nealiki Yesus nejoki ninye: Ira tesh, Simon le Yona, amu eitu kintayolo nkiri o osarge, kake Papa lai le shumata.

¹⁸ Naaliki si nanu iye: Ira iye Petros, nayeu nashet te shumata ele soit esirit ai nemegilu kishomini engang' e satan ninye.

¹⁹ Nayeu naaisho iye mboleta enkarsishu e shumata. Ore pookin nien iye tʼenkop, neaku eteenaki te shumata; o pookin nilalak iye tʼenkop, neaku etalaaki te shumata.

²⁰ Neitanap te ina alo naleng' laiteng'enuok lenyena, pemeliki ninje oltung ani, ajo era ninye Kristos.

²¹ Ore te ina kata neiter Yesus aitayolo laiteng'enuok lenyena, ajo meata kata nemelo ninye Yerusalem, neitame naleng' laigwenak o laidasak kituak o layolok lʼesirata ninye, neari metua, nepiu tʼengolong' e uni.

²² Neibung' Petros ninye nerik enkilepata neiter aikok ninye nejo: Laitoriani, taduai kion, njoo mikitum kuna!

²³ Neibelekenya ninye nejoki Petros: Nyaai kurum ai, satan, ira erikata ai, amu mimbirribir nara nʼEngai neme nʼentung'anishu.

²⁴ Nejoki Yesus te ina kata laiteng'enuok lenyena: Ore oltung'ani loyeu naasuj, njeisim kion, njedumakino esalaba enye, paasuj.

²⁵ Amu teni eyeu oltung'ani neitopok empuan enye, neiminye ninye; ore oltung'ani oiminye empuan enye tʼolbae lai, netum ninye.

²⁶ Kaa dupoto etum oltung'ani, teni eng'eru olmaa pookin, netum elaunoto olmumua lenye? Arashu kainyo elakunye oltung'ani olmumua lenye?

²⁷ Amu eaku elotu Enkerai oltung'ani tʼenkitook e Menye lenye te nebo o ilmalaikan lenyena; te ina kata elalaaki oltung'ani pookin anaa peitobira ninye.

²⁸ Japa, aliki ndai: Etii iltung'anak atua kulo ooitashe tene, lemeinyorrinyor ninje enkea tukul, metabana nedol Enkerai oltung'ani elotu tiatua enkarsishu enye.