Matayo 15 - Osotua Ng'ejuk

¹ Nepuonu te ina kata enetii ninye layolok lʼesirata o Ilfarisayoi, eing'ua Yerusalem nejo:

² Ainyo pelang' laiteng'enuok linono ng'amunot oo lpaiyani? Amu meisuj ngaik, teni enya endaa.

³ Nealiki Yesus nejoki ninje: Ainyo pilang'ilang'a ndai enkitanapata Engai t'olbae loo ng'amunot inyi?

⁴ Amu eitanapua Engai: Ntaa kituak minyi o ng'utunyi; ore olodek menye arashu ng'otonye, njee tʼenkea.

⁵ Ilimumu ndai ake: Olojoki menye arashu ng'otonye: Era ena toki enkidasare Engai natayeuo naaisho nanu iye, — neitobir sidai.

⁶ Neaku te ina kata, ajo metii oloitaa menye o ng'otonye kitok, niariara neijia enkitanapata Engai too ng'amunot inyi.

⁷ Ndai laitusupatuok, sidai enaitayolouo Yesaya too ndai nejo:

⁸ Aanyikaki ele orere too nkutukie enye naaitaa kitok too njonito oo nkutukie enye, kake aalakwaniki iltauja lenye;

⁹ naaisyayaki ninje pesho, tiaraki naiteng'enu nkiteng'enareitin naara nkitanapat oo ltung'anak.

¹⁰ Neipot isiamin nejoki ninje: Entoning', piyolouu!

¹¹ Me enajing' atua enkutuk naitaa oltung'ani torrono, kake enapuku tʼenkutuk, ninye naitaa oltung'ani torrono.

¹² Nepuonu laiteng'enuok lenyena enetii ninye nejoki: Iyolo, ajo etirikate Ilfarisayoi te ilo rorei lotoning'o?

¹³ Nealu ninye nejo: Ore unot pookin neitu eun Papa lai le shumata, nedotuni.

¹⁴ Entung'ai lelo! Era ninje ilmodook o larikok loo lmodook; teni erik olmodooni obo olekai, nesulakino atua engumoto pokira are.

¹⁵ Nealu Petros nejoki ninye: Ntaaliki yook ena kitanyanyukiet.

¹⁶ Nejoki Yesus ninje: Epon si ndai miatata eng'eno?

¹⁷ Midamumu, aajo ore pookin najing' atua enkutuk, nelo engoshoke nenang'akini tʼosiadi?

¹⁸ Kake napuku tʼenkutuk, nepuku tʼoltau, naa nena naaitaa oltung'ani torrono.

¹⁹ Amu epuku tʼoltau ndamunot torrok: earata metua, earata enkidikidikoto olmoruo o eng'oroyoni, entalare, empurrore, enjakenishu elejare, emoroto.

²⁰ Nena tokitin naaitaa oltung'ani torrono; kake enkinosata endaa meisuja ngaik, meitaa ninye oltung'ani torrono.

²¹ Nepuku Yesus te ina alo nelo mbat e Tiros o Sidon.

²² Naa ng'orai, nepuku eng'oroyoni nara Enkananaya oo nona rishat, neapaa oltoilo nejo: Laitoriani, nakerai e David, tokorduaki! Eitameito naleng' ilmeneng'a entito ai.

²³ Neitu ealiki ninye ororei. Nepuonu laiteng'enuok lenyena nesai ninye nejo: Njoo elo ang', amu eapaa oltoilo tekurum ang'.

²⁴ Nealu ninye nejo: Eitu aairriwari nanu neme enetii nkerra naaimina engaji Israel.

²⁵ Nelotu ninye ake negilaki kung' nejo: Laitoriani, taretokoki!

²⁶ Nealu ninye nejo: Me sidai, teni eoruni nkera endaa enye nenang'akini ildiain.

²⁷ Nejo ninye: Ee, Laitoriani, kake enya si ildiain mbelat kunyinyi naadoiyo tʼenaraa oo laitoriak lenye.

²⁸ Nealu Yesus te ina nejoki ninye: Iye, nang'oroyoni, kitok enkirukoto ino! Njeaku anaa piyeu! Neishiu entito enye te ina kata ake.

²⁹ Neing'ua Yesus ina alo nelotu embata olbalbal le Galilaya neilepaki oldonyo neton te ina alo.

³⁰ Nepuonu siamin kumok enetii ninye, eata te nebo o ninje lemeidim aashom o ilmodook o lemeidim aairoro o looata rrugi o ilkulekai kumok, neitaperoki nkejek e Yesus neishiunye ninje.

³¹ Neing'asia siamin edolita eiro lemeidim aairoro naa biot looata rrugi, nepuo lemeidim aashom, nedolisho ilmodook; neitadaraa ninje Engai e Israel.

³² Neipot Yesus laiteng'enuok lenyena nejo: Aibung'aki siamin engoshoke nanana, amu etaa ngolong'i uni ebik enatii nanu nemeata endaa; namayeu naitanapaa etupukoitie, pemeiterre tʼengoitoi.

³³ Nejoki laiteng'enuok lenyena ninye: Ke ti aji kitum tene ti ang'ata ilmkaten kumok, peraposho esiamu kitok naba nji?

³⁴ Nejoki Yesus ninje: Iatata ndai ilmkaten aja? Nejo ninje: Oopishana o singir kuti.

³⁵ Neitanap isiamin, petoni tʼenkop,

³⁶ neibung' kulo mkaten oopishana o kulo singir, nejo ashe nebelibel neisho laiteng'enuok lenyena; neitarasaki si ninje, laiteng'enuok lenyena, siamin.

³⁷ Nenya pookin neraposho; nesotu lekunot oo mbelat ilbenia oopishana oolulung'a.

³⁸ Ore looinosa nera leak iip artam, metii ng'oroyok o nkera.

³⁹ Ore peidip aitanapare siamin, neilepaki engalawa nelotu embata e Magdala.