Matayo 1 - Osotua Ng'ejuk

¹ Enkitabu eiunoto e Yesus Kristos, enkerai e David, enkerai e Abraham.

² Etoiwuo Abraham Isaak. Neiu Isaak Yakoob. Neiu Yakoob Yuda o lalashera lenyena;

³ neiu Yuda Peres o Seraa te Tamar; neiu Peres Esrom; neiu Esrom Raam;

⁴ neiu Raam Aminadab; neiu Aminadab Naashon; neiu Naashon Salmon;

⁵ neiu Salmon Boas te Rahab; neiu Boas Obed te Rut; neiu Obed Yese;

⁶ neiu Yese olkarsis David. Neiu David Salomo tʼengʼoroyoni e Uria:

⁷ neiu Salomo Rehabeam; neiu Rehabeam Abia; neiu Abia Asa;

⁸ neiu Asa Yosafat; neiu Yosafat Yoram; neiu Yoram Usiya;

⁹ neiu Usiya Yotam; neiu Yotam Ahas; neiu Ahas Hiskiya;

¹⁰ neiu Hiskiya Manase; neiu Manase Amon neiu Amon Yosiya;

¹¹ neiu Yosiya Yekonya o lalashera lenyena tʼenkata enkibooroto te Babel.

¹² Ore peishunye enkibooroto te Babel, neiu Yekonya Sealtiel; neiu Sealtiel Serubabel;

¹³ neiu Serubabel Abihud; neiu Abihud Eliakim; neiu Eliakim Asor;

¹⁴ neiu Asor Sadok; neiu Sadok Akim; neiu Akim Eliud;

¹⁵ neiu Eliud Eleasar; neiu Eleasar Matan; neiu Matan Yakoob;

¹⁶ neiu Yakoob Yosef, olmoruo le Maria natoiwuo Yesus, oji Kristos.

¹⁷ Akae, ore lajijik pookin eiter te Abraham metabaiki David, naa lajijik tomon o ong'wan; ore eiter te David metabaiki enkibooroto te Babel, lajijik tomon o ongʼwan; ore eiter tʼenkibooroto te Babel metabaiki Kristos, lajijik tomon o ong'wan.

¹⁸ Neaku eiunoto e Yesus Kristos nji: Ore Maria ng'otonye enye, esanjanita Yosef neton eitu enyikakino, nelioi emena tʼenkidimata Olmumua Sinyati.

¹⁹ Tiaraki nara Yosef oltung'ani supat, neitu eyeu neitukurru neyeu neing'ua ninye tʼemikio.

²⁰ Ore eibirribirrita kuna, ng'orai, nelioi olmalaika lʼOlaitoriani te ninye tʼenkidetidetata ejo: Yosef, nakerai e David, miurei iamaa eng'oroyoni ino Maria, amu etaa emenai enye tʼenkidimata Olmumua Sinyati.

²¹ Nelaiu ninye enkerai olee nimpot engarna enye Yesus, amu ninye olaitopok olorere lenye tiatua nkitarruot enye.

²² Etaa kuna pookin, pebaia enairoro Olaitoriani tʼolayolounoni ejo:

²³ Ng'orai, elamenai entito neiu enkerai olee, nepuo aaipot ninje engarna enye: Imanuel, ore enkitaalata enye: Eboitare yook Engai.

²⁴ Ore peinyototo Yosef too njok, neitobir anaa peitanapa ninye olmalaika lʼOlaitoriani, neamaa eng'oroyoni enye.

²⁵ Neitu eyolou ninye tukul, metabana nelaiu olkikau lenye; neipot engarna enye Yesus.