Marko 9 - Osotua Ng'ejuk

¹ Nejoki ninye ninje: Japa, aliki ndai: Etii iltung'anak atua kulo ooitashe tene lemeinyorrinyor enkea, metabana nedol enkarsishu Engai eewuo tʼengolon.

² Ore peishunye ngolong'i ile, negelu Yesus Petros o Yakobos o Yohanes nerik ninje keper oldonyo oado, ewueji enye oopeny, neitaali emua enye too ngomomi enye.

³ Neaku eitintilu ilkilani lenyena neiborru naleng' anaa esiret lemeidim aiborrie olaria lʼenkop neijia.

⁴ Nelioi too ninje Eliya te nebo o Mose, neaku eder ninje o Yesus.

⁵ Nealu Petros nejoki Yesus: Laiteng'enani, sidai kitii yook ene! Mateshet tene iltomboitie okuni: obo lino, obo le Mose, obo le Eliya.

⁶ Amu eitu eyolou ninye enataalua; amu etaa kureti.

⁷ Neaku erukenya naiopoiye ninje nepuku oltoilo tʼerukenya ojo: Nyele Oinoti lai lanyor: entoning' ninye!

⁸ Ore te ina kata peing'oraa ngaloli pookin neitu eitoki aadol oltung'ani neme Yesus ake openy te nebo o ninje.

⁹ Ore edou ninje tʼoldonyo, neitanap ninje, pemeinosaki oltung'ani naatadua ninje metabaiki ina kata, eidipa atopiu Enkerai oltung'ani tiatua lootuata.

¹⁰ Neibung' ninje ilo rorei neikilikwanaro oopeny tʼempolos enye: Kainyo empiunoto too lootuata?

¹¹ Neikilikwan ninje ninye ejo: Mejo layolok lʼesirata, aajo meata kata nemeng'as alotu Eliya?

¹² Nejoki ninye ninje: Esipa, eng'as alotu Eliya, peitobiraki pookin; kake te nebo o nena etisirakinyeki Enkerai oltung'ani, ajo eisilisili naleng' nemeni.

¹³ Kake aliki ndai: Eidipa aeu Eliya, neitobiraki ninje ninye anaa petayeutuo, anaa petisirakaki ninye.

¹⁴ Ore pelotu ninye enetii laiteng'enuok lenyena, nedol esiamu kitok emanita ninje o layolok lʼesirata ooikilikwanare ninje.

¹⁵ Ore nabokata pedol esiamu ninye, neing'asia nekwetiki aairo roki ninye.

¹⁶ Neikilikwan ninye layolok lʼesirata: Kainyo inkilikwanarere ninje?

¹⁷ Nealiki oltung'ani obo tiatua esiamu ninye: Laiteng'enani, aaua enkerai ai enitii, neata ninye Olmumua lemeiro;

¹⁸ ore teni edumaki ninye, neiponyipony ninye; nepuku olaburra nenya lala netoi; nairorie laiteng'enuok linono, petum aatimir; neitu eidim ninje.

¹⁹ Nealiki ninje ejo: Ndai, enkishon nemeiruk, ke metabaiki anu aboitare nanu ndai? Ke, metabaiki anu ang'iriaki ndai? Eakaki!

²⁰ Neaki ninye. Ore pedol Olmumua ninye, neiponyipony nabokata ninye, neurokino enkop neibeleleng'ori nepuku olaburra.

²¹ Neikilikwan ninye menye lenye: Ke ti aa kata eitera aibung' kuna? Nejo ninye: Tʼenkitishu.

²² Etanang'aka ninye aigil kumok atua enkima o atua engare, peiminye ninye. Kake teni indim toki, mbung'aki yook engoshoke nanana, piretoki yook!

²³ Nejoki Yesus ninye: Teni indim airuko! Eidimai pookin tʼoloiruk.

²⁴ Neapaa nabo kata menye lʼenkerai oltoilo, nepuku ilkiyo, nejo: Airuk, Laitoriani, taretokoki mairuk!

²⁵ Ore pedol Yesus, ajo ekwetu olorere amurutokino, nebuaki Olmumua duruki nejoki ninye: Lemumua lemeiro naa ming'ani, aaitanap nanu iye: Tupuku te ninye nimintoki ajing' atua ninye!

²⁶ Neapaa Olmumua oltoilo neiponyipony ninye naleng' nepuku; neaku enyanyukie lemeishiu, nejo baiki ilkumok: Etua ninye.

²⁷ Kake eibung'a Yesus ninye engaina neapaa; neitashe ninye.

²⁸ Ore peidip atijing'a aji, neikilikwan laiteng'enuok lenyena ninye tʼewueji enye oopeny; Ainyo peitu kindim yook aatimir ninye?

²⁹ Nejoki ninye ninje; Meidim ena mua atupuku neme tʼesayata o tʼempukoroto.

³⁰ Nepuku ninje te ina alo neibung' engoitoi neim Galilaya; neitu eyeu ninye, peyolo oltung'ani.

³¹ Amu eiteng'ena ninye laiteng'enuok lenyena nejoki ninje: Eitarasakini Enkerai oltung'ani atua ngaik oo ltung'anak near ninje ninye metua. Ore peidip aataar, nepiu ninye, eishunyete ngolong'i uni.

³² Neitu eyolou ninje ilo rorei neurei eikilikwan ninye.

³³ Nepuonu ninje Kapernaum. Ore etii ninje atua aji, neikiliwan ninye ninje: Kainyo imbirribirrutua tʼengoitoi?

³⁴ Negira ninje, amu eibirribirrutua tʼempolos enye: Kalo lora kitok.

³⁵ Neton ninye neipot kulo tomon o are nejoki ninje: Oloyeu neaku lʼelukunya, njeaku lʼenkiting'oto too pookin o olaisyayani loo pookin.

³⁶ Neibung' ninye enkerai nabo neitasheye ninye tʼempolos enye nejap ninye nejoki ninje:

³⁷ Oloitoomon nabo too kuna kera tʼengarna ai, nanu eitoomon; ore olaaitoomon nanu, me nanu eitoomon, kake olaairriua.

³⁸ Nejoki Yohanes ninye: Laiteng'enani, kitadua oltung'ani lomirita ilmeneng'a tʼengarna ino leitu esujare yook, nikimitiki yook ninye, tiaraki neitu esuj yook.

³⁹ Nejo Yesus: Emimitiki ninye, amu metii oltung'ani loitobir entoki engolon tʼengarna ai neiriamare aaimaki nanu tʼentorroni.

⁴⁰ Amu olemeiba yook, nera lʼematua ang'.

⁴¹ Amu oloitook ndai tʼeoket engare tʼengarna ai, tiaraki nirara le Kristos, japa, aliki ndai: Meiminaki ninye tukul olkwaje lenye.

⁴² Oloitapong'oo nabo too kuna kutiti naairuk nanu, eikash, teni eenikini emurt enye osoit oituutishoreki, nenang'akini ninye atua olbalbal.

⁴³ Teni kintapong'oo engaina ino, tudung'o ninye; eikash, ijing' atua empuan, iata enkumur, nelang' iata ngaik pokira are, nilo atua ewueji e satan, atua enkima nememuta,

⁴⁴ enemee olkurto lenye nemee enkima enye.

⁴⁵ Teni kintapong'oo enkeju ino, tudung'o ninye; eikash, ijing' atua empuan, ira ng'ojine, nelang' iata nkejek pokira are, nikinang'akini atua ewueji e satan, atua enkima nememuta,

⁴⁶ enemee olkurto lenye nemee enkima enve.

⁴⁷ Teni kintapong'oo engong'u ino, nturrai ninye; eikash, ijing' atua enkarsishu Engai, ira mulug ong'u, nelang' iata ngonyek pokira are nikinang'akini atua enkima e satan,

⁴⁸ enemee olkurto lenye nemee enkima enye.

⁴⁹ Amu eitijing'ari oltung'ani pookin emakat tʼenkima, neitijing'ari enkidasare pookin emakat.

⁵⁰ Sidai emakat, kake teni etarruoiye emakat, te nyoo eitaai ninye sidai? Njoo iatata emakat tiatua ndai o eseriani tʼempolos inyi.