Marko 7 - Osotua Ng'ejuk

¹ Neiturrurrokino ninye Ilfarisayoi o ematua o layolok lʼesirata ooing'ua Yerusalem.

² Ore pedol ninje ematua oo laiteng'enuok lenyena einosita endaa too ngaik torrok, eji nemeisuja, neisurdany.

³ Amu menya Ilfarisayoi o Yudayoi pookin endaa eitu eisuj ngaik enye naleng', neibung' ng'amunot oo lpaiyani.

⁴ Naa teni epuonu t'osingira, nemedaa eitu eisuja. Netii nkulie ng'amunot kumok naatang'amutua aaibung', anaa enkisujata oo nkwarun o noo lkoboi o noo nareta osuiai o noo lkitareta.

⁵ Akae, neikilikwan Ilfarisayoi o layolok lʼesirata ninye: Ainyo pemesuj laiteng'enuok linono ng'amunot oo lpaiyani, kake enya endaa too ngaik torrok?

⁶ Nejoki ninye ninje: Sidai enaitayolouo Yesaya too ndai laitusupatuok anaa pesira: Aaitaa kitok ele orere too njonito oo nkutukie, kake aalakwaniki iltauja lenye;

⁷ naaisyayaki ninje pesho, neiteng'enu nkiteng'enareitin aa nkitanapat oo ltung'anak.

⁸ Ipalipala ndai enkitanapata Engai nimbung'ubung'u ng'amunot oo ltung'anak, enkisujata oo lkoboi o noo nkwarun o nkulie kumok naanyanyukie nena nintobiribiri.

⁹ Nejoki ninye ninje: Sidai ianyianya enkitanapata Engai, pitumutumu aatorrip ng'amunot inyi.

¹⁰ Amu etejo Mose: Ntaa kituak minyi o ng'utunyi! o: oloimaki menye arashu ng'otonye torrono, njeari tʼenkea.

¹¹ Nijojo ndai: Ore pejoki oltung'ani menye arashu ng'otonye „Korban“, eji: „eishooki Engai“, naaku endupoto ino te nanu, nebaiki,

¹² nimintokiki aaisho ndai meitobiraki ninye menye o ng'otonye toki,

¹³ niariara ororei lʼEngai too ng'amunot inyi nitang'amutua; nintobiribiri nkumok naanyanyukie kuna.

¹⁴ Neitoki aipot ninye esiamu nejoki ninje: Enining'oki pookin, piyolouu!

¹⁵ Metii entoki e oriong' oltung'ani najing' atua ninye naidim aitaa ninye torrono; kake enapuku tiatua ninye, ninye naitaa oltung'ani torrono.

¹⁶ Oloata nkiyaa naaning'ie, njening'!

¹⁷ Ore pejing' ninye atua aji, eing'ua olorere, neikilikwan laiteng'enuok lenyena ninye ina kitanyanyukiet.

¹⁸ Nejoki ninye ninje: Ke nji miatata si ndai eng'eno? Epon eitu iyolouu si ndai, ajo entoki pookin e oriong' oltung'ani najing' atua ninye, meidim aitaa ninye torrono?

¹⁹ Amu mejing' ninye atua oltau, kake atua engoshoke ake, nepuku tʼosiadi oitai ndaikin pookin.

²⁰ Nejo ninye: Ore enapuku tʼoltung'ani, ninye naitaa oltung'ani torrono;

²¹ amu epuku tiatua oltau lʼoltung'ani ndamunot torrok, entalare, empurrore, earata metua,

²² earata osotua lʼenkiama, olng'warra, ntorrok, olosek, enkiborra oo ngonyek, engong'u torrono, morot Engai, olwuasa, emodaishu.

²³ Amu tiatua epuku kuna torrok pookin neitaa oltung'ani torrono.

²⁴ Nedumunye ninye te ina alo nelo metabaiki rishat e Tiros o Sidon. Ore peidip atijing'a aji, neyeu, pemeyolou oltung'ani, neitu eidim aisudori.

²⁵ Amu etoning'o nabokata eng'oroyoni nabo mbaak enyena, neata entito enye Olmumua duruki, nelotu nebatatakino ninye nkejek

²⁶ (nera ena ng'oroyoni Engriki entipat e Siro-Foinike) nesai ninye, pemir olmeneng'ani tiatua entito enye.

²⁷ Nejoki Yesus ninye: Tang'asa njoo eraposho nkera; amu me sidai, teni eitauni endaa oo nkera, penang'akini ildiain.

²⁸ Nealu si ninye nejoki ninye: Ee, Laitoriani, kake enya si ildiain mbelat oo nkera te kop enaraa.

²⁹ Nejoki ninye: Tʼolbae le ilo rorei nno! Etupukuo olmeneng'ani tʼentito ino.

³⁰ Nelo ang' neinepu entito, eirrag tʼerruat, etupukuo olmeneng'ani.

³¹ Neitoki apuku tʼerishata e Tiros neim Sidon nelotu metabaiki olbalbal le Galilaya, erishata oo Manyat tomon.

³² Nerikoki ninje ninye oltung'ani ming'ani lemeiro sidai nesai ninye, peiteleiki ninye engaina.

³³ Nerishu ninye lʼesiamu nerik ewueji enye openy nepik ilkimojik lenyena atua nkiyaa enyena nenotu nkamulak neing'unye olng'ejep lenye

³⁴ neimariri shumata neang' nejoki ninye: Efata! eji: Taboloi!

³⁵ Nebolo nabokata nkiyaa enyena nelaa eenet olng'ejep lenye neiro sidai.

³⁶ Neitanap ninye ninje, pemeliki oltung'ani. Kake neijia anaa peitanapa ninje, nepon naleng' aainosaa.

³⁷ Neing'asia naleng' nelang' ejo: Eitobira ninye pookin sidai; neisho ilming'an, pening'ishoi, peiro lemeidim aairoro.